Bible in duytsche (Delftse bijbel 1477)

[p. *296]

§ Ca .xiiij

1

DIt is dat die kinder van israhel besaten int lant van chanaan. dat hem gauen eleazar die pape ende iosue nuns sone. ende die princen vanden familien inden gheslachte van israhel:

2

ende si deeldent al mitten lote alsoe die here beuolen had in moyses hant. den neghen gheslachten ende enen haluen geslachte.

3

Want den twee gheslachten ende enen haluen hadde moyses possessie gegeuen ouer die iordane sonder den leuiten. die int lant en ontfingen onder haer brueders:

4

mer in haer stat waren gheuolghet iosephs sonen. die hi in twe gheslachten deelde effraym ende manasses. Die leuyten en ontfinghen ne ghena ander dele int lant. sonder poorten in te wonen. ende haer huyten lande om haer vee ende haer beesten in te voeden.

5

Die kinder van israhel deden also moyses die here gheboden hadde ende si deelden tlant

6

Iudas sonen quamen tot iosue in galgala: ende caleph iephone soen die cenezeus sprac an hem Du weetste wat die here ghesproken heeft van mi ende van di tot moyses gods man in cadesbarne.

7

ic was veertich iaer out doe mi moyses sheren knechte sant van cadesbarne dat ic tlant bespien soude: ende ic boetscapte hem dat mi waer dochte.

8

Mer mine broderen die mit mi opghehaen waren si vernederden des volcs herte: mer niettemin ic volghede den here minen god.

9

Ende moyses swoer in dien daghe ende seide: tlant dat dijn voete betreden heuet sal dijn possessie wesen ende dijnre sonen ewelike: om dattu den here dinen god gheuolghet biste.

10

dus heuet mi die here tleuen verleent alsoe hi mi beloeft heeft tot in desen dage. Het sijn leden wel vijf ende veertich iaer van dier tijt dat die here dit woert sprac tot moysen. doe israhel wanderde doer die wildernisse. Ic bin huden vijf ende tachtich iaer out.

11

ende alsoe vrome als ic was te dier tijt. doe ic gesonden was om tlant te bespien. die starcheit van dien tide geduyrt noch tot huden in mi. beide om striden ende om te gaen

12

Ende daer om soe geeft mi desen berch die mi die here gheloeft heeft daer duut oec hoerdes. daer die enachim in sijn ende grote poorte ende ghemuert: of machschien die here mit mi sij dat icse moghe ofdoen: also hi mi belouet heeft

13

Ende iosue benedide hem ende leuerde hem hebron in possessien:

14

ende van dier tijt was hebron calephs iephone soen des ceneseus tot in desen dage: om dat hi volghede den here god van israhel.

15

Hebrons naem hietmen te voren cariatharbe die grote adaem is daer begrauen onder enachim: ende tlant hielt op van stride.