Bible in duytsche (Delftse bijbel 1477)

§ Ca .xiij

1

IOsue was out van tidigher outheit: ende die here seide tot hem. Du biste out geworden van tidigher outheit. ende dit brede lant leit hier dat noch mitten lote nie gedeelt en is:

2

dat is weten al galilea philistiim ende al gessuri

3

vander modderighe riuieren die egipten veuersschet. totten termine van ackeers ieghen tnoerden: tlant van chanaan dat ghedeelt is in vijf coninghen vanden philistinen. die van gaza die van azethon die van aschalon ende die van geth ende die van ackeers.

4

Mer ten zuden sijn die eueen alt lant van chanaan ende maara diere van sydonen tot afeca. ende die termine vanden amorreen ende datter bi leit:

5

ende tlant dat neuen den libanus leit ieghen toeste van abaalgad onder den berch hermon tot dattu in emath gaetste.

6

haer alre lant die woenden inden berch van lyhano totten wateren van masserephot ende al die van sydonen. Ic bin diese ofdoen sal vander kinderen van israhels aensichten. Daer om sal dit lant comen int dele van israhels erfachticheit also ic di beuolen heb.

7

Ende nu so dele dit lant in possessien den neghen gheslachten ende half den geslachte van manasses:

8

mit welken half geslachte ruben ende gad besitten tlant. dat hem moyses sheren knechte gaf: ouer die vluet vander iordanen ter oestziden.

9

van aroer die gesticht is int ouer vander vluet arnon. ende inden midden die valeye: ende al die campaengen van medaba tot dy-

[p. *295]

bon

10

ende alle steden seons sconincs van amorreen. die regneerden in esebon totten termine van ammons kinderen:

11

ende galaad totten termine gessuri ende machati ende alden berch hermon ende al basan tot salecha.

12

al ogs rike in basan die regneerden in astaroth ende in edray. hi was vanden ouerbliue van raphaym: ende moyses sloechse ende deedse af

13

Ende die kinder van israhel en wildense niet verdriuen van gessuri die van machati: ende si woenden in midden israhel tot in desen daghe.

14

Mer leui gheslachte en gaf hi ne ghene possessie: mer haer erfachticheit is die sacrificien ende die victimen sheren gode van israhel: also hi hem ghesproken heeft.

15

Dus gaf moyses possessie den gheslachten van rubens kinderen na haren maechscap.

16

Ende haer termine was van aroer die ghesticht is ant ouer der vluet arnon. ende in midden die valeye vander seluer vluet. ende alt pleyne dat te medaba waert leyt ende te esebon.

17

ende al haer dorpen inden campangen: dibon oec ende abamothbaal ende die poort baalmaon

18

yessa ende cedymoth ende mephet

19

ende cariathaim ende sabama ende sarathasar. inden berghe bider valeye

20

bethphogor: ende asedoch ende phasga ende bathaysmoth

21

alle die poorten vanden campangen. ende al seons sconins riken coninc van amorreen die in esebon regneerden: die moyses sloech mit sinen princen madyan: eueseen ende recen ende sur ende vr ende rebee. seons princen die int lant woenden:

22

ende balaam beors sone dien waersagher slogen die kinder van israhel doot mitten zwaerde mitten anderen die si doot sloghen:

23

ende die riuiere vander iordane was rubens kinderen termine. Dit is den rubeniten possessie na haren maechscappen in poorten ende in dorpen.

24

Ende moyses gaf den gheslachte van gad ende sinen kinderen possessie na haren maechscappen: ende daer af is dit scheiden.

25

Hi gaf hem die termine van gazer ende alle steden van galaad ende half dele van ammons kinderen lande. tot aroer die ieghen rabba is.

26

ende van esebon tot ramaoth. van masphe ende bethanim ende van manaym totten termine van dabir.

27

In die valeye oec van betharan ende bethnemra ende soccoth ende saphon dander dele van seons sconincs rike coninc van esebon. Hier of is die iordane ende toten achtersten einde die zee van chemereth ouer die iordane ter oestziden.

28

dit is gads kindere possessie na haren maechscappen ende haer steden ende haer dorpen.

29

Ende moyses gaf half den gheslachte manasse horen kinderen possessie na horen maechscappen:

30

waer of dit beghin is. Amanaim. ende al basan ende alle ogx rijc coninc van basan. ende alle die wegen van rahyr die in basan sijn tsestich poorten

31

ende half dat dele van galaad ende astharoth ende edray ogs sconins poorte in basan.

32

Moyses deelde dus die possessien inden campangen van moab ouer die iordane iegen iericho ter oestziden machirs kinderen die manasses sone was half den partyen machirs kinderen na haren maechscappen.

33

Mer leuijs gheslachte en gaf hi ne gene possessie: want die here god is sine possessie alsoe hij ghesproken heeft.