Bible in duytsche (Delftse bijbel 1477)

§ Ca .x.

1

ALse dit hoerde adonisedech die coninc van iherusalem dat iosue hay ghewonnen hadde ende ter neder geworpen: ghelijc dat hij iericho ende haren coninc ghedaen hadde: soe hadde hij oec hay ghedaen ende haren coninc: ende dat die van gabaa ouer waren gheulouwen tot israhel: ende dat sij

[p. *290]

beloften mit hem ghemaect hadden:

2

so ontsach hi hem sere. Want gabaon was een grote poorte ende een vanden conincliken steden: ende meerre dan die stat hay ende alle haer vechters waren alte starcke.

3

Hier om sant adonisedech die coninc van iherusalem tot oham die coninc van hebron ende tot pharan die coninc van yerimoth ende tot iaphie die coninc van lathis ende tot dabir den coninc van eglon: ende seide.

4

Coemt op te mi ende brenct salchoirs dat wij gabaon vercrachten: om dat sij ouergheulouwen is tot iosue ende totten kinderen van israhel.

5

Dus vergaderden ende opclommen vijf coninghen van den amorreen: die coninc van iherusalem. die coninc van hebron. die coninc van yerimoth die coninc van lachis ende die coninc van eglon te gadere mit haren heere: ende si sloghen tenten omtrent gabaon ende vochtenre op.

6

Ende die in die poorte gabaon woenden die beleit was senden tot iosue die doe was inden ghetelden te galgala: ende si seiden hem En wedertrecke dijn hant niet vander hulpe dijnre knechten. Com haestelike ende verlos ons ende brenct salchoirs. Want iegen ons sijn vergadert alle die coninghen vanden amorreen. die inden montaengen wonen.

7

Ende iosue voer op van galgala: ende al theere vanden vechters mit hem die alte starcke mannen

8

Ende die here seide tot iosue. En ontsich hem niet. Want ic hebse gheleuert in dinen handen. Niemant van hem luden en sal di moghen wederstaen.

9

Ende iosue ginc op snellike alle den nachte van galgala. Ende viel op hem.

10

Ende die here verstoerdese van israhels aensichte: ende verdreefse mit groter plaghen in gabaon: ende hi volchde hem na alden opganc van bethorem:

11

want die here sende op hem vanden hemele grote stenen totte azecha ende machede. Ende als si vlouwen voer den kinderen van israhel. ende si waren inden nederganc van bethtoron: so sende die here op hem grote hagelstenen vanden hemel al tot der stat azecha toe ende vele mere bleef ter doot vanden haghelstene: dan die kinder van israhel mitten zwaerde versleghen hadden

12

Doe sprac iosue totten here in dien dage dat hi die amorreen leuerde in israhels hande: ende hi seide voer hem luden. Sonne en porre dij niet ieghen gabaon: ende die mane ieghen die valeye aialon

13

ende die sonne ende die mane bleuen staende: tot dat hem israhel wraecte ouer sine viande. En is dit niet ghescreuen inder rechter boec? Ende die sonne bleef dus staende inden hemel midden: ende si haeste haer niet neder te gaen in die spacie van enen daghe.

14

Voer noch na en was nye so langhen dach om dat die here enen mensche so ghehodrde ende om dat hi ouer israhel vacht

15

Ende iosue keerde weder mit alden heere van israhel inden getelden van galgala.

16

Want die vijf coninghen vlouwen ende si bergeden hem in een duwiere vander poorte macheda.

17

Ende iosue wort ghebootscapt datter gheuonden waren vijf coningen scuylende in die spelonke maceda.

18

Ende iosue gheboot den gesellen ende seide. Welft grote stenen voerden speloncken gat: ende legt

[p. *291]

daer naerstelike mannen diese gesloten wachten.

19

Mer wilt ghi niet staen soe volghet den vianden na: ende slaet alle die achterste vanden genen die vlien. Ende en laetse niet gaen binnen den vriheden van haren poorten: die de here god in uwen handen geleuert heeft.

20

Doe dus die vianden met groter plaghen gesleghen waren: ende wel na totter doot al bederft. Die ghene die israhel ontvlien mochten sijn ghetoghen inden ghemuerden steden.

21

Ende al there keerde weder tot iosue in macheda want doe waren daer die ghetelde: al ghesont ende gehele van ghetale. Ende nyemant en dorste ieghen die kinder van israhel steken

22

Ende iosue beual ende seide. Doet opt gat vander duwieren: ende brenghet te mij voert die vijf coninghen die daer in geborghen sijn.

23

Ende die knapen deden also hem beuolen was: ende brachten tot hem vter duwieren die vijf coninghen. den coninc van iherusalem. den coninc van hebron. den coninc van yerimoth. den coninc van lachis. ende den coninc van eglon

24

Ende doe si tot hem wtgebracht waren soe riep hi alle die mannen van israhel: ende seide totten princen vanden heere die mit hem waren. Gaet ende settet v voete opter coninghen halse. Ende doe sijre gegaen waren ende si der geenre halse traden die onder hem laghen:

25

so seide hi echter tot hem. En wilt u niet ontsien noch en vreset v niet: wort starc ende weset vrome. Want dus sal die here alle uwen vianden doen: daer ghi ieghen oerloghet.

26

Ende iosue sloechse ende doodse ende hi hincse op vijf stilen: ende si waren ghehanghen tot ten auonde toe.

27

Ende doe die sonne onder ghinc so beual hi den ghesellen dat sijse vander galgen of daden: ende doe sijse vander galghen ofgedaen hadden so worpen sijse in die duwiere daer si in gheborghen waren: ende si leiden op tgat grote stenen die to nv daer legghen

28

In dien seluen tiden so wan iosue oec in. macheda ende versloechse in zwaerts mont: ende hi dode haren coninc: ende alle dier in woenden ende hi en lieter ne ghene ouerbliuen. Ende hi dede den coninc van macheda: also hi ghedaen had den coninc van iericho

29

Ende hi ghinc ouer mit al israhel van macheda in lebna ende vachter ieghen

30

ende die here leuerdese mit haren coninc in israhels hande. Ende si slogen die stat ende alle dier in woenden in zwaerts mont Ende si en lietenre nyemant in ouer bliuen. Ende si daden den coninc van lebna: al si ghedaen hadden den coninc van iericho.

31

Van lebna voer hi ouer mit al israhel in lachis: ende hi leider theere al om en tomme ende vachter op:

32

ende die here leuerde lachis in israhels handen ende hi wanse tsanderdaghes: ende sloech alle die zielen die daer binnen waren ints swaerts mont als hi lebna had ghedaen

33

Te dien tiden quam op hyram die coninc van gazar dat hi lachis salcoersen soude: ende dien sloech iosue mit al sijn volc ter doot.

34

Ende hij voer ouer van lachis in eglon: ende hi omleidese ende anvachtse

35

ende wanse in enen daghe: ende alle die zielen die daer in waren sloech hi ints zwaerts mont na al dat hij lachis hadde ghedaen

36

Ende hi ghinc op

[p. *292]

mit al israhel van eglon in hebron ende hi vachter ieghen:

37

ende hi verwanse ende sloechse ints swaerts mont: ende haren coninc ende al die poort van dien lantscepe ende al die zielen die daer in gewoent hadden. Si en lieter ne ghene ouerblijuen binnen. Ghelijc dat hi eglon ghedaen had alsoe dede hi oec hebron: ende al dat hi daer binnen vant verbrande hi mitten vyere

38

Ende van daer keerde hi weder in dabir

39

ende wanse ende verwoestese: ende hi sloech in swaerts mont haren coninc ende al die poort al om ende omme: ende hi en lieter en ghene ouerbliuen binnen Ghelijc dat hi hebron ende lebna ende haren coninghen ghedaen hadde: also dede hi dabir ende haren coninc.

40

Ende aldus sloech iosue alt montandien lant ende tsuyden lant ende campandien lant: ende asedoch mit haren coninghen. Ende hi en lieter ne ghene ouerbliuen in: mer hij dode al dat adem binnen hadde

41

van cadesbarne tot ghasa also hem gheboden hadde die here van israhel alt lant van gosen tot gabaon:

42

ende alle haer coninghen ende conincriken die wan hi al mit enen bestande ende woestese. Want die here god van israhel vacht mit hem

43

Ende hi keerde weder mit al israhel ter stat vanden getelden in galgala