Bible in duytsche (Delftse bijbel 1477)

§ Ca .xi

1

DOe dit iabin den coninc van asor hoerde so sant hi boden tot iobab den coninc van madon ende totten coninc van semeron ende totten coninc van acsaph:

2

ende totten coninghen van noorden die woenden inden montaendien ende inden pleynen lande iegen tsuyden van themeroth: inden campaendien oec. ende inden lantscepen van daer neuen die zee:

3

ende totten chananeen van west ende van oest ende totten amorreen ende etheen ende die pherizeen ende die iebuzeen inden montaendien: ende totten eueen die woenden te voeten vanden berghe hermon int lant masphe.

4

Ende si quamen al mit haren scaren: sere veel volcs gheliken den sande dat aen douer vander zee is: paerden ende waghenen van ouertalliker menichten.

5

Ende alle dese coninghen vergaderden in een ten watere meron: dat si ieghen israhel vechten souden.

6

Ende die here seide tot iosue. En ontsich niet. Want morghen in dese seluen vre soe sal ic alle dese leueren in dijn hant om te wonden int aensicht israhels Hare paerden sultstu ontsenuen: ende die wagenen mitten vyere verbarnen

7

Ende iosue ende alt here quam mit hem haestelike. iegen die ten wateren meron ende si vielen op hem:

8

ende die here leuerdese in israhels hant. Ende si sloghense ende iaechdense totten groten sydonen ende totten wateren maspherephot: ende totten velde masphe dat ter oestziden leit van dien deele. Ende aldus sloech hijse: also dat hi ne gene van hem ouerblijuen en liet.

9

Ende hi dede alsoe hem die here beuolen hadde Hare paerde ontseuude hi: ende hare waghenen verbrande hi.

10

Ende hi keerde te hant weder ende wan azor. ende hi sloech haren coninc mitten zwaerde. Want in ouden tiden so hadde azor die heerlijcheit bouen al desen riken

11-12

Ende hi sloech al die zielen die daer woenden. Hi en lieter ne ghene ouerblijuen binnen: mer hi woestet al totter doot: ende die poorte ende alle die steden daer

[p. *293]

omtrent verbrande hi mitten brande. Hi vinc haer coninghen ende sloechse ende deedse of. als moyses sheren knecht hem beual.

13

Al sonder die poorten die op die berghen waren ende op die houelen ghesticht. dander verbrande israhel al: ene van desen alleen die alte vast was azor die verbrande tuyer.

14

Ende die kinder van israhel deelden onderlinge den roef van desen steden ende die beesten: als si alle menschen doot ghesleghen hadden.

15

Ghelike dat die here moyses sijnen knechte beuolen hadde: also beualt moyses iosue. ende hi voldeet al. Hi en liet niet achter van alden geboden noch een woert niet allene van die die here moysen geboden hadde.

16

Ende aldus wan iosue al montandien lant ende tsuden lant ende tlant van gosen ende tpleyne ende die westzide ende de berge van israhel ende haer campandien:

17

ende een deel vanden berghe die te seyr waert opgaet tot baalgath dore tpleyne sberghes van libano onder den berch hermon: hi vinc alle haer coningen ende hi sloeghse ende dodese.

18

Veel tijts vacht iosue ieghen dese coninghen.

19

ne ghene stede en was die haer den kinderen van israhel op en gaf: niet sonder die eueen die woenden in gabaon.

20

Want iosue wantse al vechtender hant Want het was sheren sentencie: dat haer harten verhart worden ende datsi ieghen israhel vechten souden. ende neder vallen ende ne gene barmherticheit verweruen ende dat si veruaren souden also die here moysen gheboden had

21

In dien tide quam iosue ende sloech enachim doot vanden montandien ende van hebron ende dabir ende anab ende van alden berghen van iuda ende van israhel. ende hi dede al haer poorten af.

22

Ende hine en liet niemant van enachims gheslachte in die kinder lant van israhel: sonder die steden gaza ende geth ende azoten in die welke si allene bleuen.

23

Dus wan iosue alt lant alsoe die here sprac tot moysen: dat hijt den kinderen van israhel in possessien gheuen soude na haren delen ende haren gheslachten: ende tlant rustede van striden.

24[12:1]

Dit zijn die coningen die die kinder van israhel sloghen ende si besaten haer lant ouer die iordaen ter sonnen opganghe. vander riuieren arnon totten berghe hermon: ende al die oestzide die de wildernisse scouwet.

25[12:2]

Seon den coninc van amorreen die woonde in esebon die here was van aroer die gesticht is op douer vander riuieren arnon: ende van half den dele in die valeye ende half galaad totter vluet ieboc. die termine is van ammons kinderen

26[12:3]

ende van der wildernisse totter zee ceneroth ieghen dat oeste ende totter zee vander wildernisse die de alre soutse zee is: ter oestziden alden wech die leit te bethsimoth ende vander zuitziden

27[12:4]

die onder azedoch leyt tot phasga was die termine ogs sconincs van basan. die was vanden ouerbliuen van raphaim die in astaroth woonde ende in edray:

28[12:5]

ende hi was here inden berghe hermon ende in salecha ende in al basan totten termine van gessuri ende machati ende van half den deel van galaad ende totten termine sconincs van esebon.

29[12:6]

Moyses sheren knechte ende die kindere van israhel sloghense: ende moyses leuerde haer lant in possessien

[p. *294]

rubens ende gads kinderen ende half den gheslachte van manasses.