Bible in duytsche (Delftse bijbel 1477)

§ Capittel .ix.

1

DOe dit hoerden alle die coninghen ouer die iordane die woenden in den montangen ende indeu campangen int zeelant ende biden ouer van der groter zee. ende oec die gene die woenden neuen dien libanus etheus. ende amorreus. chananeus. pherizeus. eueus. iebuzeus

2

so vergaderden si alle te gadere: om dat si vechten souden iegen iosue ende israhel mit enen moede ende mit eenre sentecien.

3

Ende die ghene die woenden in gabaon. doe si hoerden al dat iosue gedaen hadde hay ende iericho.

4

so pensden si behendeliken ende namen te haren behoef spise. ende leiden oude sacken op ezelen. ende gescoerde wijnlagele ende verbonden.

5

ende hare oude gescoeyte die in enen teyken van outheden mit lappen genaeyt waren: ende si cleden hem mit ouden clederen: ende tbroot dat si voerden om inden wech te eten was hart ende in stucken ghebriselt.

6

Ende si tiden tot iosue die doe was inden getelden te galgala: ende si seiden hem ende al israhel. Wij sijn comen van verren landen om paeys mit v te maken.

7

Ende die mannen van israhel antwoerden: ende seiden Machschien ghij woent int lant dat ons sculdich is te wesen mitten lote: ende wij en moghen mit v ne ghene belofte angaen.

8

Ende seiden tot iosue: wij sijn dijn knechten. Ende iosue seide hem. Wie si di. ende waen si di comen?

9

Si antwoerden. Dijn knechten sijn comen van harden verren lande: in sheren dijns gods name. Want wi hebben ghehoert die nyemare van sijnre machte: al dat hi ghedaen heeft in egipten

10

ende den tween coninghen vanden amorreen ouer die iordane. seon den coninc van esebon. ende og den coninc van basan. die in astaroth waren

11

ende onse ouders ende al die gene die wonen in onsen lande: seiden ons Neemt in die hande spise om den alten langen wech: ende gaet hem te ghemoet ende

[p. *289]

segt hem. Wij sijn v knechten: ende aengaet mit ons belofte.

12

Siet die brode die wij namen doe wij wt onsen huse quamen. om tot v te comen. si sijn nu droghe gheworden: ende van groter outheit ghebriselt.

13

Wij volden dese laghele mit nyewen wijn: nv sijn si ghescoert ende ontbonden. Die cleden ende tgeschoeyte dat wi an hebben ende dat wi aen die voete hebben om die lanchede van den langhen weghen sijn vertreden: ende wel na al versleten.

14

Dus namen si van haren spisen: ende en vraechdens sheren monde niet.

15

Ende iosue maecte mit hem paeys: ende doe hi belofte mit hem ghemaect hadde. so beloefde hi hem datmense niet doden en soude. Ende die princen vanden menichten sworent hem oec.

16

Mer na drien daghen dat die belofte gemaect was. soe hoerden die van israhel dat si daer bi woenden: ende dat si onder hem wonen souden.

17

Ende die kinder van israhel ruerden haer teten: ende inden derden daghe quamen si in haren steden: der welkere dit die namen sijn: gabaon ende chaphiram ende beroth ende cariathiarim.

18

Ende si en sloghense niet: om dat hem die princen vander menichten gesworden hadden ints heren gods naem van israhel. Ende hier om soe murmureerde alt volc iegen die princen van israhel

19

Ende si antwoerden hem. Wi hebbent hem ghesworen inden naem des gods van israhel: ende hier om en moghen wi hem niet ghenaken.

20

Mer wi sulen hem dit doen. Men houdse leuende dat sheren gramscap ieghen ons niet gheporret en worde waert dat wi ons versworen.

21

Mer si sullen aldus leuen: dat si hout houwen sullen alder menichten behoef ende twater toedraghen.

22

Ende doe die princen dit seiden. so riep iosue die van gabaon. ende seide hem. Waer bi woudi ons honen mit loesheden. dat ghi seit wi wonen harde verre van uwen luden. als gi in midden ons sijt?

23

Hier om suldi wesen onder maledictien: ende van uwen geslcahte en sal niemant ghebreken hout houwende ende water toedraghende in sheren mijns gods huys.

24

Si antwoerden. Ons dine knechten was geseit wat die here god beloeft had moysen sinen knechte dat hi v al dit lant leueren soude: ende dat hi alle die ghene dier in woenden verdriuen soude. Hier om ontsagen wi ons sere. ende wi voersaghen onse zielen hier in om die vrese van v die ons dwanc: ende wij hadden desen raet

25

Mer nv so sijn wij in dijn hant: ende dat v guet ende gherecht dunct dat doe ons

26

Dus dede iosue also hi gheseit hadde ende hi verlostese vander kinder van israhels hande: datmense niet doden en soude.

27

Ende hi gaf wt in dien dage dat si wesen souden in alt volcs dienste ende van sheren outaer. hout houwende ende water draghende: tot in deser tijt in die stat die de here kiesen soude.