Bible in duytsche (Delftse bijbel 1477)

§ Capittel. .viii.

1

ENde die here seide tot iosue En ontsich niet noch en vrese niet. Neemt mitti alle die menichte vanden vechters: ende stant op ende ganc ter poerte van hay. Sich ic heb di in dijn hant gheleuert haren coninc ende haer volc: ende die poerte ende tlant.

2

Ende du sultste der poerte ven hay doen ende haren coninc: alsoetstu daetste iericho ende haren coninc. Mer den roef ende alle die beesten suldi te uwen behoef houden. Leg laghen achter die poort.

3

Ende iosue stont op ende alt heere vanden vechters mit hem: dat si te hay waert gaen souden ende iosue coes dertich dusent stercke mannen ende santse bi nachte:

4

ende hij beual hem ende seide. Legt laghen achter die poorte. Ende en gaet niet verre van daer: ende ghi sult alle ghereet wesen

5

Want ic ende dandere menichte die mit mi is. wij sullen opcomen recht iegen die poorte. Ende als si wtcomen sullen ieghens ons soe sullen wij vlien alsoe wij te voren daden:

6

ende wij sullen hem die rugghen keren tot dat si ons nauolghen ende verre buyten der poorte getogen sijn. Want si sullen wanen dat wi vlien sullen also wi te voren deden Want als wij vlien sullen ende si na ons volghen.

7

so suldi opstaen vanden laghen ende sult die stat woesten: ende die here v god die salse in uwen handen leueren.

8

Als ghijse ghewonnen hebt so ontsteecste: ende ghi sult al doen so ic v beuolen hebbe.

9

Ende hi lietse gaen ende si tiden ter stat waert vanden laghen: ende si saten tusschen bethel ende hay ter westzide van der poorte hay. Ende iosue bleef dien nachte in midden tvolc.

10

Ende hi stont op in die dagheraet ende telde die gesellen: ende hi ghinc mitten ouders int hooft vanden heere:

11

ende omsettet mit hulpen vanden vechters ende doe sij ghecomen waren ende opghegaen ieghen die stat so stonden si ter noortzide vander poorten: ende tusschen die poorte ende hem. was in midden een valeye.

12

Ende hi hadde vijf dusent manne wtghecoren ende hadse gheleit in la-

[p. *287]

ghen tusschen bethauen ende hay ter westziden vander seluer poort:

13

mer alle tander heer maecte betaeldie ten noerden so dat dachterste vanden betaeldien ghinc totter westziden vander stat ende iosue ghinc binnen der nachte: ende stont in midden der valeye.

14

Doe dat die coninc van hay ghesien hadde smorghens so haeste hi hem: ende hi trac vte mit al den heere vander stat ende hi gheleide sine betaeldie ter wildernisse waert: ende hi en wiste niet dat si achter sinen rugghe laghen ende scuylden.

15

Mer iosue ende al israhel ruymden die stat ende veinsden hem dat si hem ontsaghen ende vlouwen alden wech ter wildernissen waert

16

ende die coninc vander poort. ende sijn volc riepen onderlinge ende verstouten dene dandere: ende volgheden hem na.

17

Ende doe si vander stat verre waren so datter enen niet bleuen en was in die stat hay ende bethel die israhel niet en volgheden: ende si lieten haer poorten open alsoe sier wtcomen waren.

18

Doe seide die here tot iosue. Heffe op dine schilt die in dine hant is iegen die poorte hay: want ic salse di leueren. Ende doe iosue den schilt opgheheuen hadde ieghen die poorte

19

soe stonden te hant op die laghen ende scuylden: ende si tiden ter stat waert ende wonnense: ende ontstakense

20

ende die mannen vander stat die iosue nauolgheden doe sij scouweden ende saghen den roke vander stat opgaen totten hemel: so en mochten si hier noch daer gheulien: sonderlinghe om dat die gene die geueinst hadden die vlucht ende ter wildernisse waert tiden: starckeliken wederstonden iegen die ghene diese iagheden

21

Doe iosue ende al theer van israhel sach dat die stat gewonnen was ende dat die roock vander poort op ghinc: so keerde hi weder ende sloech die manne der poorte van hay.

22

Want die ghene die die stat ghewonneu hadden ende ontsteken: si quamen ieghen die haer vter poorte. ende begonsten te slaen in die middewaert vanden vianden. Ende doemen dus van beiden ziden die vianden sloech also dat nyemant van alder menichten behouden en wort:

23

soe vinghen si oec leuende den coninc vander poort hay: ende brachten tot iosue.

24

Doe si dus al doot geslaghen waren die israhel ter wildernissen waert tidende waren geuolghet ende si in die selue stat mitten zwaerde waren gheuallen: soe keerden die kinder van israhel weder ende sloghen die stat

25

Want die binnen dien daghe gheslaghen waren vanden mannen totten wiuen: waren twaelf dusent menschen al vander stat hay.

26

Mer iosue en trac sijn hant te hem waert niet die hij opwert vte ghesteken hadde den schilt houdende: voer dat alle die gene gedoot waren die binnen hay woenden.

27

Ende die kinder van israhel deylden onderlinghe die beesten ende den roef vander stat: also die here iosue beuolen hadde.

28

Ende iosue ontstac die poort: ende maectese ene ewelike hope

29

Ende haren coninc hinc hi an die galghe totten auonde ende totter sonnen onderganghe toe. Ende iosue geboot ende si daden sinen corre of vanden cruce: ende si worpen inden inghanghe vander stat ende vergaderden op hem een grote hoop stene die daer legghen tot in

[p. *288]

desen daghe

30

doe stithte iosue den here god van israhel een outaer opten berch hebal:

31

also moyses sheren knecht beuolen hadde den kinderen van israhel ende also ghescreuen is inden boec van moyses wet. ende hi maecte den outaer van oneffenen stenen die ne ghene iser gemaect en hadden: ende hi droech den here daer op holocauste ende offerde daer op vreedsame offerhande

32

Ende iosue screef opten steen deutronomium moyses wet: dien hi gemaect had voer den kindere van israhel.

33

Ende al tvolc ende alle die meeste van gheboerten. ende die leitmannen ende die rechters stonden in beeden ziden der arcken inder papen aenscouwen die die arke der beloften droghen: beide die toecomelinc ende die ingheboren. Half deel van hem luden stonden neuen den berch garisim ende half neuen den berch hebal: also moyses sheren knecht had gheboden Ende eerstwarf ghebenedide hi den volke van israhel:

34

ende daer na las hi al die woerden der benedictien ende der maledictien ende al dat ghescreuen was inden boec der wet.

35

Hine liet niet onghehandelt van dien dat moyses beuolen had: ende hi verlast voer alle die menichte den kinderen van israhel voer wiue ende voer cleyne kindere ende voer toecomelingen die onder hem woenden.