Bible in duytsche (Delftse bijbel 1477)

§ Ca .vii

1

MEr die kinder van israhel braken tghebot ende stalen vanden verbodene want achor charmits soen zabdi soen die sara sone was van iudas geslachte hi nam yet vanden verbodene. Ende die here is vergramt op die kinderen van israhel.

2

Ende doe iosue ghesonden hadde mannen van iericho. ieghen hay die neuen bethauen is ter oestsiden ter poorten bethel: soe seide hi hem gaet op ende bespiet tlant Ende si daden dat hi hem beual ende si bespieden hay.

3

Ende si keerden weder ende seiden hem. Al tvolc en gae daer niet: mer twee dusent of drie dusent man tiden darwaert ende doen die stat of. Waer om soudmen te vergeefs al dit volc moeyen ieghen luttel vianden?

4

Hier om ghinghen op drie dusent vechters. Ende si keerden te hant

[p. *285]

die rugghen

5

ende si worden ghesleghen vanden mannen der poorten van hay: ende van hem vielen xxxvi mannen. Ende die vianden vander poorten volgheden hem na tot sabarim: ende si vielen daer si ten ghereesten waert vlogen. Ende des volcs harte ontsach hem: ende smalt geliken watere.

6

Ende iosue scoerde sijn cledere: ende viel lancs op die aerde voer sheren arke totten auonde toe beide hi ende al douders van israhel. Ende si worpen gemul op hair hoefde:

7

ende iosue seide. Ay here god. Waer bi woutstu dit volc ouer die iordane doen gaen: om dattu ons leueren soudes in amorreus hant ende afdoen? Ende ofte wij ouer die iordane ghebleuen waren also wij begonnen hadden.

8

Mijn here god wat sal ic segghen: als ic sien sal dat israhel sine vianden den rugghe keren sal?

9

Die chananeen sullent horen ende al die int lant wonen: ende si sullen hem te gader hopen ende ons omcrupen: ende si sullen onsen naem ofdoen van aertrike. ende wat doetstu dan dinen groten naem?

10

Ende die here seide tot iosue. Stant op: wat legstu op die aerde?

11

Israhel heeft ghesondicht ende heeft mine belofte ghebroken ende sij hebben ghenomen vanden verbodene ende si hebbent gestolen ende hebben gheloghen ende hebbent verborghen onder haer vaten.

12

Ende israhel en sal niet moghen staen voer sine vianden: ende het salse vlien: want het is besmet vanden verbodene guede. Ende ic en sal voert an niet meer mit v sijn: te dier tijt toe dat ghi en gedoot hebt die dese quaetheit sculdich is.

13

Stant op ende heilich tvolc: ende segghe hem. Wort gheheylicht ieghen morghen. Want dit seit die here god van israhel. Israhel in midden di is vermeensaemheit du en sultste niet moghen staen voer dine viande. voer dat hi wt di sal wesen afghedaen die mit deser misdaet besmit is.

14

Elkerlike sal morghen voertcomen na sinen geslachte: ende wat geslachte tlot vinden sal. dat sal voertcomen bi sinen maechscappen ende maechscappen bij haren husen ende die huisen bi elken manne:

15

ende so wie in deser misdaet sal worden geuonden: men salne verbranden mitten vyere mit alle sinen guede: want hi heeft sheren belofte gebroken: ende hi heeft een quade daet ghedaen in israhel.

16

Ende doe iosue smorghens op ghestaen was soe dede hi israhel voertcomen bi sinen gheslachten: ende men vant tgheslachte van iuda.

17

Ende doe dit gheslachte bi sinen familien voertghecomen was: so vantmen zara familie ende doe die familie bij namen voortquam soe vant hi zabdi:

18

ende doe hi sijn huys biden mannen ghescheiden hadde so vant hi achor charmi zone zabdi soen die sara soen was van iudas geslachte

19

Ende iosue seide tot achor Sone mijn ghif den here van israhel glorie. ende belye. ende seg mi ende en lochens niet wattu ghedaen hebste.

20

Achor antwoerde iosue: ende seide hem. Waerliken soe heb ic ghesondicht den here god van israhel: ende aldus ende aldus heb ik ghedaen.

21

Want ic sach onder den roef enen harden gueden mantel. ende twee hondert cicle siluers ende enen gulden regule van vijftich cyclen: ende ic

[p. *286]

begeerdese ende droechse wech ende ic hebse gheborghen in die aerde ieghen die middewaerde van minen tabernacule: ende tsiluer oec ende hebt ghegrauen in die aerde.

22

Ende iosue sant knapen: ende si liepen tot sinen tabernaculen ende si vondent al gheborghen in die selue stat: ende tsiluer daer mede.

23

Ende si droghent vter tenten ende droghent tot iosue ende tot alden kinderen van israhel: ende si worpent neder voer den here

24

Ende iosue nam achor zare soen. ende tsiluer ende den mantel ende die gulden regule. ende sijn sonen ende sijn dochteren. ossen ende ezelen. ende scapen ende tente ende alt huisraet ende al israhel mit hem: ende si leydense ter valeyen achor?

25

Daer seide iosue. Om dattu ons ghestoert heebste: soe moetti die here verstoren in desen daghe. Ende al israhel steenden: ende al dat sijn was verbrande hi mitten vyere.

26

Ende sij vergaderden op hem enen groten hope stenen: die noch geduert tot in desen daghe. Ende sheren gramscap wort van hem ghekeert. Ende die naem van dier stat wort gheheten achors valeye tot in desen daghe.