Bible in duytsche (Delftse bijbel 1477)

§ Ca .vi.

1

IHericho die stat was ghesloten ende vast bemuert. om den anxt vanden kinderen van israhel: ende nyemant en dorste in die stede gaen of daer wt gaen

2

Ende die here seide tot iosue. Sich ic heb in dijn hant gegeuen iericho ende haren coninc: ende alle die starcke mannen

3

Gaet die stat om. ende alle vechters eenwarve sdaghes. Aldus suldij doen ses daghen.

4

Mer inden seuenden daghe soe sullen die papen nemen die seuen trompen diemen besicht in iubileo: ende si sullen voer die arke der beloften gaen. Ende seuenweruen suldi om die stede gaen ende die papen sullen blasen mit trompen.

5

Ende alse der trompen gheluyt. luyden sal langher ende hogher ende si in v oren crijten: soe salt tvolc ropen mit alten groten geruchte: ende die mure vander stat sal altemale vallen: ende elc sal daer ingaen te dier stede daer hi iegen staet.

6

Hier om riep iosue nuns soen den papen ende seide tot hem neemt die arke der beloften. Ende seuen ander papen nemen die seuen basunen van iubileo: ende si gaen voer sheren arke.

7

Ende hi seide totten volke Gaet. ende omgaet die stat ende gaet ghewapent voer die arke des heren.

8

Ende doe iosue die woerden gheeynt had ende die seuen papen trompten mitten basunen voer die arcke van sheren belofte

9

ende alt heer daer voer ghewapent ghinc: soe volchde tander volck die arke ende alle dinc haerluyde vanden trompen.

10

Ende iosue had gheboden den volcke ende gheseit. Ghi en sult niet ropen: noch men en sal v stemme niet horen noch en ghene reden en sal wt uwen monde gaen: voer dat die dach comen sal. daer ic v in seggen sal. Roept ende maect gherucht.

11

Dus ghinc die arke al om die poort eenwarue tsdaghes: ende si keerde weder inden getelden ende bleef daer.

12

Ende iosue stont op bi nachte ende die papen namen die arke sheren:

13

ende die seuen van hem luden die seuen basunen diemen besicht in iubileo: ende si ghingen voer sheren arke wanderende ende trompende: ende tgewapende volc ghinc voer hem: mer tander volc volghede die arke: ende si doerludent al mitten trompen.

14

Dus ghinghen si die stat om tsanderdaghes eenwarue: ende si keerden weder in die ghetelden. Dus deden si ses daghen.

15

Ende opten seuenden dach soe stonden si op in die dagheraet: ende si ghin-

[p. *284]

ghen om die poort alsoet gheseit was seuenweruen.

16

Ende doe inden seuenden omganghe die papen trompten mit basunen: so seide iosue tot al israhel. Roopt Want die here heuet die stat gheleuert v.

17

Ende dese stat sal wesen verbannen ende al dat daer binnen is. Mer raab tlichte wijf sal alleen te liue bliuen: mit al die binnen haren huse sijn Want si verbarch die boden die wij senden

18

Mer wacht v dat gi niet en ghenaect van dien die verboden sijn dat ghi der misdaet niet sculdich en sijt: ende dat dan alle die ghetelden van israhel onder sonden sijn. ende worden ghestorit

19

so wat datter sijn sal van goude ende van siluere ende van coperen vaten ende van ysere dat worde den here gheheylicht: ende op geleit in sinen tresore.

20

Doe dus alt volc riep ende die basunen trompten ende doe inder menichten oren die stemme ende dien geluyt luyde so vielen die mueren haestelike: ende elc ginc op die stat die ieghen hem was. Ende si wonnen die stat:

21

ende sloghent al doot datter binnen was vanden mannen totten wiuen: vanden ionghen kinderen totten ouden menschen. Ende si sloghen oec int swaerts mont ossen ende scapen ende die ezelen oec

22

Ende iosue seide totten tween mannen die spiers gesonden waren. Geat ints licht wijfs huys. ende leytse wt ende al dat haer is also ghi haer gesekert hebt mit ede.

23

Ende die ionghelinghen ginghen daer in ende si leiden raab ende haren vader ende haer moeder wt. ende haer broeders ende al haer maechscap ende al haer hauelic guet: ende si dadense bliuen buyten den ghetelden van israhel.

24

Mer die poorte ende al datter binnen was dat verbranden si sonder siluer ende gout ende die coperen vate ende tyser. dat si heilichden in sheren trisore.

25

Mer raab tgemene wijf ende haers vader huys ende al dat si hadde dede iosue leuen ende si woenden in midden israhel tot in desen dage: om dat si die boden verberch die hi ghesonden hadde dat si iericho bespien souden.

26

In dien tiden so bat iosue ende seide Vermaledijt moet die man wesen voer den here die verwecken ende stichten sal die stat iericho In sine eerste geboren sone moet hi haer fondamente legghen: ende in den achtersten sone so moet hi haer poorten setten.

27

Ende die here was mit iosue. Ende sinen naem wort vermaert in alt lant.