Bible in duytsche (Delftse bijbel 1477)

§ Capit .v.

1

NAdien dat alle die coninghen van amorreen hoerden die ouer die iordane ter westziden woenden. ende alle die coninghen van chanaan die neuen die grote zee woenden. dat die here die vluet vander iordanen ghedroghet hadde voer die kinder van israhel tot dat sere ouergegaen waren. so wort haer herte ontbonden ende ne gene gheest en bleef in hem: so ontsagen si hem dat incomen der kinder van israhel.

2

Te dien tiden seide die here tot iosue. Make di stenen messen: ende besnijt anderwarf die kinder van israhel.

3

Ende hi dede dat die here geboden hadde: ende hi besneet den kinderen van israhel inden halse der ouersloue.

4

Ende dit was die sake vander ander besnidinge. Al tvolc van mans maecsele dat wt egipten quam ende alle die mannen van oerloghe bleuen alle doot inder wildernisse

5

inden langhen omganghe vanden weghe die alle besneden waren: mer tvolc

6

dat gheboren is inder wildernissen binnen veertich iaren vanden widen wegen vander wildernissen was onbesneden tot dat si verteert worden die sheren stemme niet ghehoert en hadden: ende dien hi gesworen had dat hi hem thonen soude tlant vloeyende van melc ende van honighe

7

deser sonen volghenden na inder vader stat: ende worden besneden van iosue ende waren noch mitten ouerslouen also si gheboren waren. ende inden wege en hadse nyemant besneden.

8

Ende na dien dat si al besneden waren: so bleuen si in die selue stat vanden getelden tot dat si ghenesen waren

9

ende die here seide tot iosue. Huden heb ic den lachter van egipten van v luden ghedaen. Ende den naem van dier stat wort gheheten galgala tot in desen dage

10

Dus bleef israhel in galgala: ende si deden phase inden viertienden daghe inden campaengen tsauonts van iericho:

11

ende si aten tsander daghes vanden vruchten vanden lande derue brode ende wellinghe vanden seluen iare.

12

Ende na dien dattet tvolc at van-

[p. *283]

der vruchte vanden lande. soe gebrac hem manna ende voert meer en besichden die spise niet die kindere van israhel: mer si aten vanden vruchten van dien iare slants van chanaan

13

ende doe iosue was in enen acker der poort van iericho so hief hi sijn oghen op: ende sach enen man iegen hem staende ende houdende een bloot zwaert: ende hi ghinc tot hem ende seide biste ons: ofte van onsen vianden?

14

Hi antwoerde. Neen ic Mer ic bin die prince van sheren heere: ende nv come ic.

15

Ende iosue viel lancs op die aerde: ende hi aenbeden ende seide

16

wat spreect minen here tot sinen knechte. Hi seide. Ontbinde tgheschoeyte van dinen voete. Want die stat daer du in staetste is heylich. Ende iosue dede: also hem beuolen was.