Bible in duytsche (Delftse bijbel 1477)

§ Ca .iiij.

1

DOe si ouerghegaen waren: soe seide die here tot iosue

2

Kiest twaelf mannen enen wt elken gheslachte:

3

ende beuele hem dat si van midden den gront der iordanen brengen daer die papen voeten stonden twaelf herde stenen: die ghi sult legghen in die stat daer ghi te nachte ghetelde slaen sult.

4

Ende iosue riep die twaelf mannen die hi ghecoren had vanden kinderen van israhel een wt elken geslachte:

5

ende hi seide tot hem. Gaet voer sheren uwes gods arke ter middewaert vander iordanen: ende elc bi sondere breng vandaen enen steen op sine scouderen na tgetal der kinder van israhel

6

dattet onder v een teyken si. Ende morghen als uwe kinder vraghen sullen ende segghen. wat willen hem dese stenen:

7

soe suldi hem antwoerden. Die water vander iordanen liepen ewich ende ghebraken voer sheren arke doe si daer doer leet: hier om sijn dese stene gheleit in een ghedencken der kinder van israhel tot inden eweliken daghen.

8

Dus daden die kinder van israhel also hem iosue beual ende brachten van midden den gronde der iordanen twaelf stenen also hem die here beuolen hadde naden getale der kinder van israhel ende drogense totter stat daer si tenten sloghen: ende daer leiden sij se.

9

Ende iosue leide twaelf ander stenen in midden die iordane daer die papen stonden die drogen de arke van sheren belofte: ende si sijn daer tot in desen daghe.

10

Ende die papen die de arke drogen stonden in midden die iordane tot dattet al voldaen was dattie here iosue beual dat hi totten volke spreken soude: ende also moyses hem gheseit hadde Ende tvolc haeste hem. ende ghinc ouer.

11

Ende doe si al ouer ghegaen waren doe ghinc sheren arke oec ouer: ende die papen ghinghen voer tvolc

12

Ende rubens ende gads kindere ende half tgheslachte van manasses ghinghen ghewapent voer die kinder van israhel also moyses hem beuolen had:

13

veertich dusent vechters ghinghen bi haren betaeldien ende haren hopen opt pleyne ende den campaengen den poorte van iherico.

14

In dien daghe soe verhief die here iosue voer al israhel: om dat si hem ontsien souden. also si moyses ontsien hadden doe hi noch leuede.

15

Ende hi seide tot hem.

16

Beuele den papen die dragen de arke der beloften: dat si opcomen vander iordanen.

[p. *282]

17

Ende iosue gheboot den priesters seggende. Climt op van die iordane.

18

Ende doe si opcomen waren dragende die arke van sheren beloften ende si begonsten die droghe aerde te treden. soe keerden die wateren weder in hare diepten: ende vloeyden also si te voren hadden gheplogen

19

Ende tvolc clam vander iordanen inden thienden daghe vander eerster maent: ende si sloghen tenten in galgalis in die oestzide der poort iericho.

20

Ende die twaelf stenen die si ghebrocht hadden vten gronde vander iordanen die leide iosue in galgalis:

21

ende hi seide totten kinderen van israhel. Morghen als v kinder vraghen sullen haren vaderen ende si hem segghen wat willen hem deze stenen:

22

so suldi hem leren ende seggen

23

Ouer den droghen gront ghinc israhel ouer die iordane doe die here onse god haer watere verdroechde in onsen aenscouwen ende tot dat wier ouer ghegaen waren

24

also hi te voren gedaen hadde in die rode zee die hi verdrogede tot dat wier ouerleden waren:

25

om dat alle volc van aertrike leren sullen sheren starcke hant: ende dat ghi oec ontsien sult in alle tijden den here uwen god