Bible in duytsche (Delftse bijbel 1477)

§ Ca .iij.

1

IOsue stont op bi nachte ende ruerde die ghetelde: ende si ghinghen van sethim ende quamen ter iordanen hi ende alle die kinder van israhel: ende bleuen daer drie daghen.

2

Ende doe die leden waren so ghingen heraude midden doer die ghetelde.

3

ende begonsten te ropen. Als ghi sien sult sheren uwes gods arke ende die papen van leuijs gheslachte diese draghen sullen: so suldi oec opstaen ende volghen den ghenen die voer gaen:

4

ende tusschen v ende die arke sal sijn spacie van twee dusent cubiten dat ghijse van verre sien moget ende dat gi moghet weten al welken wech ghi ingaen sult want ghi en hebten hier te voren niet ghewandert: ende wacht u dat ghi der arken niet en genact.

5

Ende iosue seide totten volke Heilicht v want morgen sal die here onder v luden wonder doen.

6

Ende hi seide totten papen. Neemt die arke der beloften: ende gaet voer tfolc. Ende si daden dat hi hem beual: ende namen die arcke ende wanderden voer haer.

7

Ende die here seide tot iosue. Huden sal ic di beghinnen te verheffen voer al israhel: dat si weten moghen dat ic mitti wesen sal. als ic mit moyses was.

8

Mer beuele du den papen die draghen die arke der beloften ende segt hem. Als ghi ghegaen sult sijn een deel vanden watere der iordanen: so blijfter in staende.

9

Ende iosue seide totten kinderen van israhel. Coemt herwaert: ende hoert sheren uwes gods stemme ende

10

echter seide hi hier in suldi weten dattie leuende god mit v luden is: ende hi sal verdriuen in uwen aenscouwen die chananeen ende die etheen ende die eueen ende die phereseen ende die gergezeen ende die amorreen ende iebuzeen.

11

Siet die arke van beloften sheren van al aertrike. sal voer v gaen doer die iordane.

12

Bereet twaelf man vanden twaelf gheslachten van israhel: enen wt elken gheslachte.

13

Ende also die papen die draghen die arke der beloften sheren van al aertrike sullen hebhen gheset die voetstappen van haren voeten inden wateren van den iordane. so sullen die wateren die beneden sijn nederwaert lopen ende ghebreken. mer die bouen comen si sullen te enen hope bliuen staende.

14

Dus ghinc tvolc wt haren tabernaculen om dat sij ouer die iordaen gaen souden: ende die pa-

[p. *281]

pen die die arke der beloften drogen ghinghen voer.

15

Ende doe die papen in die iordaen ghegaen waren ende doe haer voeten een deel ghenet waren int water: want die iordane hadde inden tide vanden ouxt haren gront gheuolt:

16

so bleuen die wateren die van bouen quamen staende in een stat: ende si hieuen hoech als een berch. so datmense sach van verre vander poort die hiet edom totter stat die sarthan hiet: mer twater dat beneden was liep neder in die zee ter wildernissen diemen nu hiet die dode zee tot dattet al wech was.

17

Ende tvolc ginc voert tegen die iordane. ende die papen die welcke drogen de arcke van sheren belofte stonden opten drogen gront in midden die iordane ende al tvolc ghinc ouer den droghen gront.