Bible in duytsche (Delftse bijbel 1477)

§ Capittel .ij

1

IOsue nuns soen. sende doe allene heimelike van sethim twee mannen spiers: ende seide hem: Gaet ende merct tlant: ende die poerte iherico. Ende si ghingen ende ghinghenin eens lichts wijfs huus die raab hiet ende rusteden bi haer.

2

Ende twort die coninc van iherico gheboetscapt. ende gheseit. Sich hier sijn bi nachte mannen in ghecomen vanden kinderen van is-

[p. *279]

rahel: om tlant te bespien.

3

Ende die coninc van iherico sant tot raab ende seide. Brenct vte die mannen die totti comen sijn: ende in dijn huys ghegaen sijn. Want het sijn spiers ende si comen om tlant te merken.

4

Ende twijf nam die mannen ende barchse. ende seide. Ic lye dat si te mi quamen: mer ic en wiste niet wanen dat si waren.

5

Ende doemen die poorte sloot inder donckedheit: so ghinghen si te gader vte: ende ic en weet niet warwaert dat si gegaen sijn. Volget hem haestelike. ende ghi sultse vaen

6

Mer si dede die mannen gaen opten solder van haren huse: ende si ouerdectese mit vlas stoppelen dat daer was.

7

mer die ghene die daer ghesonden waren si volgheden hem na alden wech die leet ten ghewade waert vander iordanen: ende doe si wt waren ghegaen sloetmen te hant die poorte.

8

Ende noch en waren si niet in slape die daer gheborghen waren: ende lich twijf ghinc tot daer bouen ende seide.

9

Ic weet dat v die here tlant leueren sal. Want v anxte is in ons gheuallen: ende alle die int lant wonen quellenre af.

10

Wij hebben gehoert dat die here heeft verdroghet die wateren vander roder zee doe ghi daer in ghinct doen ghi wt egipten ghinct: ende wat ghi ghedaen hebt den tween coningen vanden amorreen die ouer die iordane waren seon ende og die ghi ghedoot hebt.

11

Ende doe wij dit hoerden so ontsaghen wij ons ende onse herte vercrancte: ende in ons en is ne ghene gheest gebleuen te uwen incomen. Want die here v god hi is god inden hemel bouen: ende in die aerde beneden.

12

Nu daer om soe zweert mi biden here alsoe ic mit v ontfermenisse heb ghedaen dat ghi oec alsoe doen sult mit mijns vaders huus: ende gheuet mi een ghewarich teyken

13

dat ghi behout minen vader ende mijnre moeder. mijn bruederen ende mijn susteren. ende al dat haer is: ende verlost onse zelen vander doot

14

Ende si antwoerden haer. Onse ziele sal voer v luden wesen in die doot op dattu ons niet en wrogheste. Ende als ons die here sal hebben tlant gheleuert: so sullen wij in di doen ontfemicheit ende waerheit.

15

Dus liet sijse neder mit enen zele doer tvenster neder. Want haer huys stont an die muyre

16

ende si seide tot hem. Gaet opt gheberchte dat si v machschien niet te ghemoete en comen als si weder keren: ende daer hout v heymelike drie daghe tot dat si wedercomen sijn: ende dan suldi gaen uwen wech.

17

Si seiden tot haer. Wij sullen onsculdich wesen van desen ede daer du ons mede besworen hebste

18

als wij int lant comen sullen is dat dit rode zee ons niet en si teyken ende en bintstuus niet in die venster daer du ons doer neder lietste: ende en heefstu niet vergadert binnen dinen huse dinen vader ende dinen moeder dijn broederen ende alle dijn maechscap.

19

Soe wie buyten der doren van dinen huse gaen sal zijn scult salt zijn. ende sijn bluet sal op sijn hooft wesen ende wi sullen ontsuldich wesen vanden ede met alder gheenre bluet die binnen dinen huse wesen sullen sal op ons hoeft vallen: ist dat hem

[p. *280]

yemant ghenaect.

20

Mer ist dattu ons wroghen wilts ende dese reden voertbrenghen in midden: so sullen wij suuer wesen van desen ede daer du ons mede besworen hebste.

21

Ende si antwoerde. Also ghi gheseit hebt also gheschie. ende doe sise neder liet dat si wech tiden souden so hinc dat rode zeel in die venstere.

22

Ende si ghingen ende quamen ten gheberchte: ende si bleuen daer drie daghe. tot dat si wedercomen waren die hem na gheuolghet waren. Want si sochtense alden wech dore ende si vondenre niet. Ende doe dese in die poort wedercomen waren.

23

soe quamen die spiers neder vanden berghe: ende ghingen ouer die iordaen ende quamen tot iosue nuns soen: ende vertelden al dat hem gesciet was:

24

ende seiden. Die here heeft in onsen handen al dit lant gheleuert: want al die gene die daer in wonen sijn van vresen ter neder gheuallen.