Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–1ENde het geschiede na moyses sheren knechts doot. dat die here sprac tot iosue nuns soen moyses dienre: ende dat hi hem seide. | |
2Moyses mijn knecht is doot. Stant op ende ganc ouer die iordane du ende al tvolc metti: int lant dat ic den kinderen van israhel geuen sal. | |
3Ic sal v leueren alle stat die de voetstap uwes voets treden sal: also ic moyses ghesproken hebbe. | |
4Vander wil dernissen ende den libano ende totter groter riuieren van eufraten: al- | |
[pagina *278]
| |
der etheen lant totter groter zee iegen der sonnen onderganc sal uwe termine wesen. | |
5Niemant en sal v wedermogen staen in allen den daghen dijns leuens Alsoe ic mit moysen was alsoe sal ic metti wesen: ic en sal di niet laten noch ofgaen | |
6Wes vrome ende sterc. wanttu sultste den volc deylen tlant mitten lote: daer ic dinen vaders of ghesworen hebbe dat ict hem gheuen soude. | |
7Hier om worde sterc ende wes seer vrome: dattu wachtes ende duetste alle die wet die di moyses mijn knecht beuolen heeft. Ende en kere di niet of noch ter rechter hant noch ter luchter hant: dattu verstaen moechste alle dattu doetste. | |
8Dese boke van deser wet en sal niet gaen van dinen monde: mer du sultster in pensen dach ende nacht: so dattu wachtste ende doetste al datter in ghescruen is Dan sultstu dinen wech vertecken: ende verstaen. | |
9Sich ic beuele di: wes vroem ende worde sterc. En wil niet vresen noch en wil niet ontsien. want die here dijn god is mitti in al dien daer du toe tides | |
10Hier om beual iosue den princen vanden volc ende seide. | |
11Gaet doer die middewaert vanden ghetelden: ende ghebiet den volc ende segt. Bereet tuwen behoef teten ende spise: want naden derden dach suldi ouer die iordane gaen: ende ghi sult ingaen omt lant te besitten dat v die here v god geuen sal. | |
12Ende iosue seide tot rubens ende gads sonen ende tot half den gheslachte van manasses. | |
13Ghi sult ghedencken der redenen die v moyses sheren knechte beual doe hi seide: | |
14die here v god heuet v ruste ghegheuen ende al tlant. V wiue ende v kindere ende v beesten sullen bliuen int lant: dat v moyses sheren knecht heuet ghegheuen ouer die iordaen. Mer gaet ghi ouer gewapent voer v brueders alle die starc sijt in die hant ende vecht voer hem | |
15tot dat die here vwen bruederen ruste ghegheuen heeft ghelijc hi v ghegheuen heeft. ende dat si oec besitten tlant dat hem die here v god gheuen sal: ende also keert weder int lant van uwer posessien ende ghi sulter in wonen dat v moyses sheren knecht gegheuen heeft ouer die iordane ieghen der sonnen opganc. | |
16Ende si antwoerden tot iosue: ende seiden. Al dattu ons beuolen heefste dat sullen wij doen ende so waer dattu ons sentste sullen wi gaen. | |
17Also wij in allen moysen gehoersaem waren alsoe sullen wij di oec ghehoersaem sijn: allene moet die here dijn god mit dij wesen alsoe hij was mit moysen | |
18So wie dat dinen monde wedersegghen sal ende niet ghehoersaem sijn en wil alden redenen dies du hem beuelen sultste: hi sal steruen. Mer alleen wes du vroem: ende doch manlike |
|