Bible in duytsche (Delftse bijbel 1477)

§ Ca .xxxij

1

HOert ghi hemelen wat ic spreke ende die aerde hoer die woerden mijns monts.

2

Mijn leringhe wasse als die reghen: mijn sprake vloeye als die. douwe gelijc die reghen op dat cruit ende gelijc die dropelen op den grase

3

want ic sal des heren name anropen. Geuet mogentheit onsen gode:

4

gods werken sijn volmaect: ende alle sijn wegen sijn vonnissen God is ghetrouwe ende sonder enighe ongherechticheit: gherechte ende recht

5

si sondichden hem: ende ten sijn sine kinderen niet inden smetten. Het is een quaet gheslachte ende verkeert:

6

gheldestu den here aldus sotte volc ende onwijs En is hi dijn vader niet die di beseten heuet. ende ghemact ende ghescepen heeft.

7

Ghedencke der ouder dagen: penyse elke geslachten. Vraghe dinen vader ende hij salt di boetscappen: dijn meesten ende si sullent di segghen.

8

Doe die alre hoechste die luyden deylde: doe hi adams kindere scheyde: so sette hi die terminen vanden volken na dat ghetal der kinder van israhel.

9

Mer des heren deel is sijn volc. iacob is die termine sijnre erfachticheit.

10

Hi vanten inden woesten lande: in die stat des anxtes ende der woester wildernissen. Hi leiden al omme ende leerden: ende hi wachten als dat sien van sinen oge

11

Gelijc die aerne die sijn iongeren voert roept om te vliegen: ende bouen hem vliecht So ondede hi sijn vloghelen ende aennam hem: ende droechen in sijn scouderen.

12

Die here was alleen sijn leyder: ende mit hem en was gheen vreemt god.

13

Hi setten op hoghe lant: om dat hi eten soude die vruchte vanden ackers. Dat si sughen soude honich vten steen ende olye wt alte harden steen.

14

But-

[p. *274]

ter vanden vee ende melc vanden scapen: mitten ruete der lammeren ende der rammen van basans kinderen. Ende bocken mitten morghe vanden tarwe: ende dat si drincken souden den alte wijnachtich bluet van druuen.

15

Die gheminde wort vet ende wederspoedich: hij wort dicke vet ende ghewidet. Hi liet god sinen maker: ende ghinc wech van gode sijn salicheit.

16

Si vergramden hem in vreemden goden: ende in haren onwaerdicheden soe verwecten si hem te gramscappe.

17

Si offerden den duuel ende niet gode: den goden dien si niet en kenden. Nieuwe ende verssche quamen si: die haer vaders niet en oeffenden.

18

Du lietes god die di wan: ende du hebste vergheten des heren dijns sceppers.

19

Ende die here heeftet ghesien ende is gheporret te gramscepen: want sijn sonen ende sijn dochteren vergramden hem.

20

Ende hi seide. ic sal mijn aensicht van hem verberghen: ende ic sal haer achterste merken Want het is een verkeert gheslachte ende onghetrouwe kinderen.

21

Si vergramden mi in dien die gheen god en was: ende veronwaerden mi in haren ydelheiden. Ende ic salse vergrammen in dien die gheen volc en is: ende in sotte luden sal icse veronwaerden.

22

Dat vyer is ontsteken in minen toerne ende het sal bernen totten achtersten der hellen. Ende het sal verteren dat lant mit sinen spruten: ende het sal der berghen fondamenten verbernen.

23

Ic sal op hem quaet vergaderen: ende ic sal op hem mine scutten voldoen.

24

Si sullen verteert worden van hongher: ende die voghelen sullense eten mit alte bitteren bete. Ic sal in hem senden der beesten tanden: mit gramscappen treckende bouen der aerden ende die serpenten

25

Buyten salse dat zwaert woesten ende binnen anxte: den ionghelinc te gader ende die maghet den sughende mit den ouden man.

26

Ende ic seide. Waer sijn si nu? . Ic sal haer ghedencken doen ophouden vanden menschen.

27

Mer ic hebt ouerdraghen om der vianden gramscap: dat machschien haer vianden niet en souden moghen verhouaerden. Ende segghen onse hoghe hant: ende niet die here heeft dit al ghedaen.

28

Ende het sijn luden al sonder raet ende sonder wijsheit:

29

ende of si ghesmaecten ende verstonden ende die achterste voersaghen.

30

Hoe hem een dusentieh volghede: ende hoe sij twe hem dusent veriagheden. En wast daer om niet dat haer god haer vercochte: ende datse die here besloet.

31

Want onse god en is niet als haer goden: ende onse vianden sijn vonnissers.

32

Vanden wijngaert der sodomiten is haer wijngaert: ende vanden buyten landen van gomorra. Haer druue is druue van galle: ende die alte bitterste besien.

33

Galle der draken is haer wijn ende ongheneselijc venijn van aspiden.

34

En sijn dese dingen niet verholen neuen mi: ende gheteykent in minen tresoren

35

Mijn is die wrake ende ic salt hem ghelde inden tide: so dat haer voet vallen sal. Die dach des verlies is bi: ende die tiden haesten hem te comen

36

Die here sal sijn volc vonnissen: ende hi sal ontfermenisse hebben in sinen knechten. Hi sal sien dat die hant ghecranct is. ende dat die besloten oec ge-

[p. *275]

braken: ende die ander sijn verteert.

37

Ende hi sal segghen? . Waer sijn haer goden: daer si haer betruwenisse in hadden?

38

Welker offerhande si dat vette aten: ende droncken den wijn vanden libamenten Si staen op ende helpen v: ende beschermen v inder noot.

39

Siet dat ic alleen bin: ende dat gheen ander god en si sonder mi. Ic sal doden ende ic sal doen leuen: ende ic sal slaen ende ic sal doen genesen: ende nyemant en is die van mijnre hant sal beschermen.

40

Ic sal mijn hant opheffen ten hemel: ende ic sal segghen ic leue inden ewelike.

41

Ist dat ic wette mijn zwaert als die blixem: ende begripet mijn hant dat vonnisse. Soe sal ic wrake ghelden minen vianden: ende dien mi haten sal ict ghelden.

42

Ic sal mijn ghescutte droncken maken van bluede: ende mijn zwaert sal verteren dat vleisch. Vander ghedoder bluede: ende vander gheuanghenisse des ondects hoefts der vianden.

43

Ghi heidene louet sijn volc: want hi sal wreken sijnre knechten bluet. Ende hi sal wrake ghelden in haren vianden: ende hi sal guedertieren wesen den lande sijns volcs

44

Dus quam moyses ende sprac alle die woerden des liedekijns in des volcs oren: hi ende iosue nuns soen.

45

Ende hij voldede alle dese redenen. sprekende tot al israhel:

46

ende hi seide tot hem. legt uwe herten in alle mine woerden. die ic v huden oerconde: dat ghise gebiet uwen kinderen te wachten ende te doen. ende te voldoen alle dat ghescruen is inden boec van deser wet.

47

want si en sijn v niet te vergheefs geboden: mer om datter elc in leuen soude: mer ist dat ghi dese dinghen duet so moet ghi langhe dueren int lant daer ghi toe gaet om te besitten als ghi ouer die iordane coemt.

48

Ende in dien seluen daghe sprac die here tot moysen ende seide.

49

Ganc op desen berch abarim dat is ouer den berch nebo die is int lant van moab teghen iericho: ende besich dat lant van chanaan dat ic gheuen sal den kinderen van israhel te besitten:

50

ende sterf inden berch. Ende altstu daer op gegaen biste so suldi worden geuoghet te dijnen volke. alsoe aaron dijn broeder doot is inden berghe hor ende hi is te sinen volke gheleyt:

51

want ghi misdedet ieghen mi in midden den kinder van israhel ten wateren der wedersegghinghe in cades vander wildernisse sin: ende ghi en heylichde mi niet in midden der kinder van israhel.

52

Hier om sultstu dat lant sien: ende niet en sultstu in dat lant gaen: dat ic den kinderen van israhel gheuen sal