Bible in duytsche (Delftse bijbel 1477)

§ Ca xxxi

1

MOyses ghinc wech

2

ende sprac alle dese woerden tot al israhel: ende seide tot hem. Ic bin huden hondert ende twintich iaer out: ic en mach niet voert ingaen ende wtgaen: sonderlinghe om dat mi die here gheseit heeft du en sults dese iordane niet ouerliden

3

Daer om sal die here dijn god voer di daer overgaen. Hi sal alle dese heidenen ofdoen in dinen aenscouwen: ende du sultstese besitten. Ende dese iosue sal voerdi ouergaen: also die here gesproken heeft.

4

Ende die here sal hem doen also hi ghedaen heeft seon ende og den coninghen van amorreen ende haren lande: ende hi salse ofdoen.

5

Als hi v oec dese alsoe gheleuert heeft: so suldi hem doen also ic v beuolen heb.

6

Doet manlijc: ende wort vroem. Ende en wilt niet ontsien: noch en vreset niet te haren aenscouwen want die here dijn god is dijn leider: ende hi en sal di niet laten. noch ofgaen

7

Daer om soe riep moyses iosue: ende seide hem voer alle ysrahel. Wert vrome: ende weest sterc. Want du sult dit volc in leiden int lant dat die here haren vaderen ghesworen heeft: dat hijt hem gheuen soude. Ende du sultstet hem delen mitten lotte.

8

ende die here die dijn lei-

[p. *272]

der is sal mit di wesen: ende hi en sal di niet laten. noch ofgaen En wilt niet ontsien noch en vrese niet.

9

Ende moyses screef aldus dese wet ende leuerdese den papen leuijs sonen die die arke van des heren belofte drogen: ende alle den ouders van israhel.

10

Ende hi beual hem ende seide. Nae seuen iaer int ander iaer der verlatenissen in die solempniteit van den tabernaculen.

11

als alle die kinder van israhel vergaderen dat si in des heren aenscouwen openbaren sullen. in die stat die die here verkiesen sal. so sultstu lesen die woerden van deser wet voer alle israhel: dat sijt horen sullen

12

beide mannen ende wiuen ende den cleynen kinderen ende den toecomelinghen die binnen dinen poorten sijn: daer al vtolc in een vergadert sal wesen. als sise horen: dat sijse leren moghen. ende dat si ontsien den here uwen god: ende dat si wachten ende voldoen alle die woerden deser wet.

13

Haer kinder oec dies nu niet en gheuroeden: dat sijse moghen horen ende dat si den here haren god ontsien alle die daghen dat si in dat lant wonen sullen: daer ghi toe tidet om te besitten als gi ouer die iordane sult wesen.

14

Ende die here seide tot moysen Siet die daghen dijnre doot sijn bi. Rope iosue: ende staet in die tabernakel der beloften dat ic hem beuele. Daer om ghinghen wech moyses ende iosue ende si stonden in die tabernakel der beloften:

15

ende die here openbaerde in die columme eenre wolken die stont inden inganc van den tabernakel:

16

ende die here seide tot moysen. Sich du sults slapen mit dinen vaderen: ende dit volc sal opstaen ende vernoyeert worden na vreemden goden int lant daert ingaet ende daert in wonen sal: daer salt mi laten ende het sal te niet maken die beloefte die ic mit hem gheset hebbe.

17

Ende in dien daghe sal minen toren teghen hem vergrammen ende ic salse laten ende ic sal mijn aensichte teghen hem berghen: ende het sal wesen in verslindinge. Ende alle quaet salt vinden ende quellinghe: also dattet in dien daghe sal segghen. Waerlijc om dat god mit mi niet en is: so hebben mi dese quade dinghen geuonden

18

Mer in dien daghe sal ic berghen ende bedecken mijn aensichte. om alle dat quade dattet volc gedaen heeft: om dattet vreemde goden gheuolghet heeft.

19

Nu hier om so scriuet v dit liedekijn ende leertet den kinderen van israhel. dat sijt onthouden in die memorie ende mitten monde singhen: ende dit liedekijn sal mij sijn voer een oercontscap onder die kinder van israhel

20

Want ic sal dit volc leiden int lant daer ic sinen vaderen of gesworen heb vloeyende van melc ende van honich. Ende als si sullen ghegheten hebben ende ghesadet sijn ende vet gheworden. soe sullen si hem ofkeren an vreemde goden ende dienen hem: ende mi lachteren ende si sullen mine belofte breken.

21

Ende als hem veel quades gheuonden sullen hebben ende quellinghen: so sal hem dit liedekijn antwoerden voer oercontscappe: dus dat gheen vergetelheit ofdoen en sal van sijns saets monde. Want ic weet sijn ghepense: wat dattet huden doen sal eer dat icket leiden sal int lant

[p. *273]

dat ic hem ghelouet heb.

22

Dus screef moyses dat liedekijn: ende leerdet den kinderen van israhel.

23

Ende die here beual iosue nuns soen: ende seide. Wort vrome: ende weest starc want du sultste die kinder van israhel leiden int lant dat ic hem belouet heb: ende ic sal mitti wesen.

24

Ende na dien dat moyses gescreuen had die woerden van deser wet in een boec ende hi en volmaect hadde:

25

so beual hi den leuiten die die arke van des heren belofte droghen: ende seide

26

Neemt desen boec ende legten in die eenzide van des heren uwes gods arke der beloften: dat hi daer si in oercontscappe teghen dij

27

Want ic weet dijn gheschel: ende dijn alte harden necke. Noch als ic leefde ende mit v inghinc so deed ghi altoes scheldende teghen den here: hoe veel te meer suldijt doen als ic doot sal wesen

28

Vergadert te mi alle die meeste van geboerten bi uwen gheslachten ende leeraers ende ic sal spreken daer sijt horen sullen dese woerden: ende ic sal teghen hem anropen heml ende aerde.

29

Want ic weet dat ghi na mijnre doot quaet sult doen ende ghi sult gheringhe ofkeren vanden weghe dien ic v beuolen heb: ende inden achtersten tide sullen v quade plaghen ouercomen als ghi quaet ghedaen hebt in des heren aenscouwen so dat ghi hem vergrammet mitten werken van dijnre handen.

30

Dus sprac moyses daert alle die vergaderinghe der kinder van israhel hoerden die woerden van desen liedekijn ende hi volseidet totten einde