Bible in duytsche (Delftse bijbel 1477)

§ Ca .xxix.

1

DIt sijn die woerden dien die here moysen beual vander beloften dat hijse maken soude mitten kinderen van israhel in dat lant van moab: al sonder die belofte die hij mit hem settede in oreb.

2

Ende moyses riep alle israhel: ende seide tot hem. Ghi hebt al gesien wat die here ghedaen heeft voer v int lant

[p. *269]

van egipten. pharaoni ende alle sinen knapen ende alle sinen lande:

3

grote beruerringhen die dijn oghen ghesien hebben: die teykene ende die grote wonderen:

4

ende tot in desen dage so en heeft v die here niet ghegheuen verstandel herte noch siende oghen: noch oren diet moghen horen.

5

Hi heeft v gheleit doer die wildernisse veertich iaer: uwe clederen en sijn niet versleten: noch dat ghescoeyte van uwen voeten en is niet versleten van outheden.

6

Ghi en hebt gheen broot ghegheten noch ghi en hebt ghenen wijn noch clareit ghedroncken: om dat ghi weten sout dat hi is die here v god

7

Ende ghi sijt ghecomen te deser stat: ende seon die coninc van esebon quam wt. ende og die coninc van basan ons te ghemoet om te striden.

8

ende wij sloghense ende wi namen haer lant: ende wi hebbent ghegheuen te besitten ruben ende gad. ende half den gheslachte van manasses.

9

Daer om wacht die woerden van deser beloften ende voldoetse: dat ghi verstaen moghet al dat ghi doen sult.

10

Ghi staet huden al voerden here uwen god. uwe princen ende uwe dusentich heren ende die meeste van gheboerte ende die leraers ende alt volc van israhel

11

uwe kinderen ende uwe wiuen ende die toecomelinghen die mit di wonen inden ghetelden wtghenomen die hout houwen. ende die wateren toedraghen:

12

om dattu ouergaen sults in des heren dijns gods belofte. ende mit recht van ede dat die here dijn god huden mit di slaet:

13

om dat hi hem di verwecken sal in volc ende dat hi dijn god sal sijn alsoe hij dij gesproken heeft. ende also hi dinen vaderen heeft gesworen abraham ysaac ende iacob

14

Ende ic en slae v dese belofte niet allene noch en maec v luden dese eden vast:

15

mer alle den ghenen die hier sijn ende die hier niet en sijn.

16

Want ghi weet hoe wi ghewoent hebben inden lande van egipten. ende hoe wi ouerleden sijn doer midden der gheslachten: die du ghesien hebts doerlidende.

17

ende haer onwaerdicheden ende haer smetten siende. dat waren haer afgoden hout ende steen siluer ende gout dat si oeffenden

18

dat machschien onder v luden niet en si man wijf familie of gheslechte wies harte ofgekeert is huden vanden here uwen god so dat hi gae ende diene dier luden goden: ende dat onder v lude si wortele die groeyt galle ende bitterheit.

19

Ende als hi horen sal die woerden van desen ede dat hi hem seluen benedie in sijn herte ende segghe my sal paeys wesen. ende ic sal wanderen. in die quaetheit mijnre herten: ende een dronckene neme den dorstighen

20

ende die here en salt hem niet vergheuen: mer dan sal sijn gramscap alte seer op comen ende sijn toren teghen dien mensche: ende op hem moeten comen alle die maledijtheden die in desen boec gescreuen sijn: ende die here moet sinen naem wtdoen van onder den hemel

21

ende hi moeten verteren ende verliesen wt alle den gheslachten van israhel: nader maledictien die inden boec van deser wet sijn ende des beloften bescreuen sijn.

22

Ende dat nauolghende gheslachte sal segghen ende die kinderen die voertan gheboren sullen worden. ende die vreemde die van ver-

[p. *270]

re ghecomen sijn. als si die plaghen van dien lande sien sullen ende die siecheden daerse god mede heeft ghequellet.

23

dat lant vanden sulphure ende vander sonnen hetten daer hijt mede verbernen sal. also datment nemmermeer saeyen en sal noch dattet niet groens groeyen en sal inden exempel der omwerpinghe van sodoma ende gomorra adame ende seboym. die die here omwerp in gramscappe ende in sinen toerne:

24

ende alle die lude sullen seggen. Waer om heeft die here desen lande aldus gedaen? Ende wat sonderlinghe gramscap sijns torens is dit?

25

Ende si sullen antwoerden Want si hebben des heren belofte gelaten dien hi mit haren vaders settede doe hise vten lande van egipten leide

26

ende si hebben vreemden goden ghedient: ende aenghebeet dien si niet en kenden ende dien si niet toeghegheuen en waren:

27

hier om is des heren toren vergramt op dit lant soe dat hij daer op brenghen soude alle die maledictien die in desen boec ghescruen sijn:

28

ende hi heeftse wt haren lande verdreuen in gramscap ende in toren ende in alte grote onwaerdicheit: ende hi heeftse gheworpen in vreemden lande also ment huden prooft.

29

Die verholen dinghen ons heren ons gods die ons openbaert sijn ende onsen kinderen tot inden eweliken: om dat wi moeten doen alle die geboden van deser wet.