Bible in duytsche (Delftse bijbel 1477)

§ Capittel .xxvij.

1

ENde moyses ende die ouders van israhel. Gheboden den volc ende seiden Wachte elc ghebot dat ic dij huden beuele

2

Alstu ouer die iordane sults gegaen sijn int lant dat die here dijn god di gheuen sal. so sultstu veele groter stenen verheffen ende du sulstese bewerpen mit calc.

3

dattu daer in moghes scriuen alle die woerden deser wet alstu ouer die ioerdane biste ghegaen:

4

om te gaen in dat lant dat di die here dijn god geuen sal: int lant vloeyende van melc ende van honich also hi dijnen vaderen ghesworen heeft.

5

Daer om alstu ouer die iordane ghegaen biste. so verheffe die stenen die ic di huden beuele inden berch van hebal ende du sultstese bestriken mit calc

6

ende sultste daer den heer dinen god stichten een outaer van steenen daer geen yser an ghecomen en is.

7

ende van oneffene ende van onghehouwen stene. ende du sultlter den heer dijnen god holocaust op offeren

8

ende du sultste offeren danckelike hostien: ende du sultste daer eten ende werscappen voer den here dinen god.

9

Ende du sults op die stenen scriuen alle die woerden deser wet slechtelijc ende claerlijc.

10

Ende moyses ende al die papen van leuijs geslachte seiden tot al israhel. Verstaet ende hoert israhel. Du biste huden gheworden des heren dijns gods volc.

11

Du sults horen sijn stemme: ende du sults doen die gheboden ende die vonnissen die ic di huden beuele. Ende moyses gheboet den volc in dien daghe ende seide

12

Dese sullen staen om den here te benedien inden berch garisim als gi onder die ioerdane ghegaen sijt: symeon leuy iudas ysachar ioseph ende beniamin

13

Ende daer teghen opten berch ebal so sullen dese staen te vermaledien: ruben gad ende aser zabulon dan ende neptalim.

14

Ende die leuiten sullen segghen: ende pronuncieren mit luder stemmen tot allen den mannen van israhel.

15

Vermaledijt si die man die maect beelde of goden in des heren onwaerdicheit. dat werc der wercluden handen: ende die dat int heymelijc settet. Ende al dat volc sal antwoerden ende segghen amen.

16

Vermaledijt si hi die vader ende moeder niet en eert. Ende alt volc sal segghen amen.

17

Vermaledijt si hi die sijns naestes palen ouersettet. Ende alt volc sal segghen amen.

18

Vermaledijt si hi die den blinden duet dolen inden weghe. Ende alt volc sal segghen amen.

19

Vermaledijt si hi die verkeert des toecomelincs ende des wesen ende der weduwen vonnisse Ende alt volc sal segghen amen.

20

Vermaledijt si hi die slaept mit sijns vaders wijf: ende die vuylheit sijns bedden ondectt Ende alt volc sal segghe amen

21

Vermaledijt sij hij die vuylheit duet mit enighen beesten. Ende alt volc sal segghen amen.

22

Vermaledijt si hi die slaept mit sijn suster sijns vaders dochter of sijnre moeder. Ende alt volc sal segghen am.

23

Vermaledijt si hi die slaept mit sijnre swegher. Ende alt volc sal segghen amen.

24

Vermaledijt si hi die al heymelike sinen naesten slaet

[p. *265]

Ende al dat tvolc sal segghen amen. Vermaledijt si hi die slaept mit sijns naesten wijf. Ende al tvolc sal segghen amen

25

Vermaledijt si hi die gauen neemt om doot te slaen dat onnosel bluet: ende al tvolc sal segghen amen.

26

Vermaledijt si die ghene die niet en blijft inden redenen van deser wet: ende diese mit wercke niet en voldoet. Ende al tvolc sal segghen amen.