Bible in duytsche (Delftse bijbel 1477)

§ Ca .xxvi

1

ALs du sults comen sijn int lant datti die here dijn god gheuen sal te besitten: ende du dat ghewonnen hebtste. Ende du daer in wonen sults:

2

soe sultstu nemen die primicien van alle dine vruchten ende legghense in een paenre. ende du suls gaen ter stat die die here dijn god kiesen sal datmen daer sijnen naem aenrope:

3

ende du sults tot den paep gaen die in dien daghen wesen sal. ende du sults tot hem segghen. Ic oerconde huden voer den here dijnen

[p. *263]

god: dat ic int lant ghegaen bin daer hi onsen vaderen of ghesworen heeft: dat hi ons gheuen soude.

4

Ende die paep sal die paenre ontfaen van dijnre hant ende hi sallen setten voer des heren dijns gods outaer:

5

ende du sults spreken inden aenscouwen des heren dijns gods. Die man van syrien volghede mijnen vader na: ende hi ghinc neder in egipten. ende hi voer daer wonen in enen harde cleynen ghetale: ende hi wies in groot volc ende starc. ende in ouertallike menichte.

6

Ende die van egipten quelden ons ende persequeerden ons. ende leiden alte swaren last op ons:

7

ende wi riepen den heer onser vaderen god ende hi gehoerde ons ende aensach onse oetmoedicheit. ende onse pijn ende onse verdriet:

8

ende hi leide ons wt egipten in starcker hant ende in wtghestrecten arme. in groten anxt. ende in teykenen:

9

ende hi heeft ons ghebracht in deser stat: ende hi heeft ons gheleuert dat lant dat van melc ende van honich vloeyt.

10

Ende hier om offer ic nv die primicien vanden vruchten des lants: dat mi die here ghegheuen heeft. Ende du sultstese daer laten inden aenscouwen des heren dijns gods: ende alstu den here dinen god aenbedet hebste.

11

soe sultstu werscappen in alle den guede dat die here dijn god di ende dinen huse ghegheuen heeft: du ende die leuijt ende die toecomelinghe die mit di is. Inden derden iaer vanden thienden.

12

Als du voldaen hebts die thiende van alle dinen vruchten: soe sultstuse gheuen den leuiten ende den toecomelinge ende den weese ende der weduwen. dat sijse eten binnen dijnen poorten ende dat si ghesadet worden:

13

ende du sults spreken in des heren dijns gods aenscouwen. Ic heb gebracht dat gheheilicht is van minen huse ende ic hebt ghegheuen den leuite ende den toecomelinghe. ende den weese ende der weduwen also du mi beuolen hebts Ic en heb dine gheboden niet achter ghelaten: noch ic en heb niet vergheten dijn beuelinghe.

14

Ic en hebber niet ofghegheten op mijn bedde: ic en hebse oec niet verscheiden in enigher onsuuerheden. ende ic en hebber niet ouer ghedaen in onnutteliker dinc. Ic heb gehoersaem gheweest des heren mijns gods stemme: ende ic heb al ghedaen also du mi beuolen hebts

15

Besich van dijre sanctuarien van dijnre hogher woninghen der hemelen ende benedie dijn volc van israhel. ende dat lant dattu ons ghegheuen hebts also du onsen vaderen ghesworen hebts: den lande dat melc ende honich vloeyt.

16

Huyden so heeft di die here dijn god beuolen dattu dese geboden doets ende dese vonnissen: dattuse wachtes ende voldoets van alle dijnre herten ende van alle dijnre zielen

17

Du heues huden den here vercoren dat hi dijn god sijn sal ende dattu wandels in sine weghen: ende dattu sine oefeninghe wachten sults ende sine gheboden ende vonnissen: ende dattu sine ghebode sults ghehoersaem sijn.

18

Ende die here heeft di huden vercoren dattu hem wesen sults een sonderling volc also hi gesproken heeft ende dattu wachten sults alle sine gheboden:

19

ende hij sal di hogher maken dan alle die lude die hi ghescepen heeft in

[p. *264]

zijn lof ende in zijnen name ende in zijn glorie: dattu sijn sults heilich volc des heren dijns gods alsoe hi di ghsproken heeft.