Bible in duytsche (Delftse bijbel 1477)

§ Ca .xx.

1

GAetstu wt ten stride teghen dine vianden. ende sietstu enen gheredenen ende waghenen. ende meerre menichte des heers dat teghen di is. dan du hebste: so en sulstuse niet ontsien want die here dijn god is mit di die di vten lande van egipten gheleit heeft

2

Ende als die strijt naect so sal die paep voer dat heer staen: ende aldus totten volke spreken.

3

Hoert israhel. Gi duet huden strijt ieghen uwe vianden: v herte en ontsie hem niet. Ende en wilt niet ontvruchten en wiltse niet wiken noch en ontsietse niet:

4

want die here v god is in midden v luden: ende hi sal voer v vechten ieghen uwe vianden om dat hi v verlossen sal van vresen.

5

Ende die leytmannen in elken here sullen ropen so dattet dat volc hore. Wye is die man die een nyeu huus ghesticht heeft. ende diet niet volmaect en heeft Hi gae ende keer weder in sijn huus: dat hi machschien inden stride niet en sterue ende dattet een ander volmaket.

6

Wie is die man die enen wijngaert gheplant heeft: ende die noch niet ghemene en heeft doen wesen ende daer allen luden of is gheoerloft te eten? hi gae ende keer weder in sijn huus: dat hi machschien niet en sterue inden strijt ende dat dan een ander sijn ambocht doe.

7

Wie is die man die een wijf ondertrouwet heeft: ende noch niet ghenomen en heuet? hi gae ende keer weder in sijn hnus: dat hij machschien niet en sterue inden stride ende datse een ander man neme.

8

Als dit gheseit is so sullen si daer noch toe segghen: ende spreken totten volc. Wie is een blode man van bloder herten? hi ga ende keer weder in sijn huys: dat hi sijnre brueder herte niet en doe ontsien. Also als hi van vresen veruaert is

9

ende als die princen vanden here swighen. ende si dat einde vanden spreken hebben ghedaen: soe sal elc in sijn heer bereiden te striden.

10

So wanneer dattu gaen sults om een stede te

[p. *256]

winnen: soe sulstu haer eerst vrede presenteren:

11

ontfaet si di soe sal alt volc datter binnen is behouden bliuen: ende sijn di die poorten opene: ende het sal di dienen onder tribuut.

12

Mer en willen si gene belofte aengaen ende beghinnen si ieghen di strijt: soe sultstu daer op vechten.

13

Ende alsse die heer dijn god di heuet geleuert in dijn hant: soe sutlstuse slaen indes zwaerts mont al datter binnen is van mans maecsele:

14

al sonder die wiuen ende die kinderen ende die beesten ende dat ander dat binnen der stat is. Alle den roef sultstu delen dat heere: ende du sults vanden roef dijnre vianden eten die di die here dijn god ghegheuen heeft.

15

Aldus sultstu doen allen den steden die verre van di sijn: ende die niet en sijn van dien poorten die du in possessie ontfaen sults.

16

Mer van dien steden die di sullen worden ghegheuen so en sultstu nyemant al met allen laten leuen. mer du sultstese doden indes swaerts mont:

17

dat is te weten die etheen. ende die amorreen. ende die chananeen. ende die phereseen. ende die eueen. ende die iebuzeen also die here dijn god di beuolen heeft:

18

dat si machschien v niet en leren alle haer onwaerdicheden die si ghedaen hebben haren goden. ende dat ghi dan sondicht ieghen den here uwen god.

19

Alstu veel tijts een stede sultste beleggen ende du vele bolwerken maects om dattuse winnen sults. so en sutlstu niet of houden bomen daermen of eten mach ende du en sults al om ende om dat lant niet woesten mit aexen. want het is hout ende niet mensche: ende het en mach teghen di niet doen wassen dat ghetal van vechters.

20

Mer sijnre enighe bomen die gheen appelen en dragen mer wilt sijn ende te enigher behoef bequaem: so houtse of ende maecter bolwerc mede tot dattu die stede winnes die teghen di oerloghet