Bible in duytsche (Delftse bijbel 1477)

§ Capitte .xix.

1

ALs die here dijn god sal hebben verdreuen die heydenen welker lant hi di gheuen sal. ende du dat besittes ende du woenste in sijn poorten ende in sijn husen:

2

so sultstu drie steden verscheiden in midden den lande dat di die here dijn god gheuen sal in possesie

3

ordinerende naerstelijc den wech: ende du sults alle die prouincien van dijnen lande effen deylen. dat die ghene die vluchtich is om manslachte. bi hebbe daer hij ontulien mach.

4

Dit sal des manslachtichs wet wesen die vliet: ende wies leuen men behouden sal. Die onwetende sijnen naesten slaet ende men vint dat hi ghisteren noch eergisteren gheen haet en hadde.

5

mer dat hi simpeliken inden busch ghegaen was mit hem om hout te houwene: ende daer hi dat hout hiewe die aex wt sijnre hant vloech. ende dat yser vanden hechte valt. ende slaet sijnen vrient ende doot hem: dese sal vlien tot enen van desen poorten voerseit ende leuen:

6

dat machschien des geens naeste dies bluet datter gestort is ouermits rouwe dien porret. hem niet na en volge ende begripe waert dat die wech verre waer. ende hi dan sijn ziele sloech die den doot niet sculdich en is: want men thoent dat hi te voren teghen den ghenen die daer gesleghen was doot: gheen hate en hadde

7

Hier om beuele ic di dattu drie steden deels die ghelijc verre die een vanden anderen sijn.

8

Mer als die here dijn god sal hebben ghebredet dinen terminen also hi dijnen vaderen ghesworen heeft ende hi di al dat lant ghegheuen heeft dat hi hem belouet heeft:

9

op dattu nochtan sine geboden wachtes ende du doets dat ic di beuele. dattu minnes den heer dinen god. ende du altijt wandels in sinen weghen: so sulstu di daer toe doen drie ander steden ende vanden voerseiden drie poorten sulstu dat ghetal dubbelleren:

10

ende gheen ontsculdich bluet en storte in midden den lande dat di die here dijn god gheuen sal te besitten. dattu des bluets niet sculdich wesen en moetes.

11

Mer so wie sinen naesten haet. ende steect na sijn leuen ende staet op ende slaten ende blijft hi doot. ende vliet hi te een vanden voerseiden poorten:

12

so sullen die ouders van sijnre stat senden ende begripen hem vander stat der toevlulcht ende si sullen hem leueren in des gheens

[p. *255]

naesten hant dier ghedodet is: ende hi sal steruen.

13

Ende en ontferm sijns niet: ende du sults dat misdadighe bluet wech doen van israhel: dat di wel sijn moet

14

Du en sults niet annemen noch ouersetten dijns naesten terminen die die vroetste hebben ghepaelt in dijnre possessien: die die here dijn god di geuen sal ende du ontfaen sults int lant te besitten

15

Een oerconde en sal teghen nyemant staen soe wat sonde of misdaet dattet si: mer in tween of in drien oerconden mont sal elc woert staen.

16

Ist dat een loghenachtich oerconde staet ieghen enen mensche ende wroghet hien voer sijn misdaet:

17

so sullen si beide dies is die sake: staen voerden here inder papen aensceuwen ende der rechteren die in dien daghe sijn sullen.

18

Ende als si harde naerstelijc ondersokende ondervinde valsche oerconde. dat hi ieghen sijnen brueder heeft gheseit loghen:

19

so sullen si hem ghelden alsoe hi sinen brueder had ghepenst te doen. ende du sultste dat quaet van midden di ofdoen

20

dat hem die ander ontsien als sijt horen. ende dat si en geensints soedanigen dinc en dorren doen

21

Du en suls sijns niet ontfermen: mer ziel om ziele. oghe om oghe. tant om tant. hant om hant voet om voet