Bible in duytsche (Delftse bijbel 1477)

§ Capit .xvi.

1

BEhoude die maent der niewer vruchten ende des eersten tijts vander lenten. soe dattu doets phase den here dijnen god: want in deser maent so leide di die here dijn god wt egipten bi nachte.

2

Ende du sulste den here dijnen god offeren phase van scapen van ossen in die stat die die here dijn god kiesen sal: dat sijn name daer in wone.

3

Du en sulste daer in geen gehefselt broot eten. Seuen daghen sustu eten broot van quellinghe sonder hefsel: want in anxt ghincstu wt egipten: om dattu ghedencken sults des dages datstn wt egipten ghinghes alle die daghen dijns leueus.

4

Binnen seuen daghen en salmen niet ghehefsels vinden in dijnen terminen: ende van sijnen vleysch dat des auondes ghedoot is en sal niet blijuen. tot

[p. *251]

inden eersten daghe smorghens.

5

Du en sulste phase niet moghen offeren in elc van dijnen poorten die die here dijn god gheuen sal:

6

mer in die stat die die here dijn god kiesen sal. dat daer sijn name wone. du snlts phase des auonts offeren ter sonnen onderganc doe du wt egipten ghinghes:

7

ende du sults ghereiden ende eten in die stat die die here dijn god kiesen sal: ende des morghens sulstu opstaen ende gaen te dijnen woninghen waert.

8

Ses daghen sulstu derf broot eten: ende inden seuenden daghe en lulstu gheen werc doen. want het is vergaderinge des heren dijns gods

9

Du sults di rekenen seuen weken van dien daghe dattu die sichte int coren slaes

10

ende du suls den here dinen gode vieren die feesten vanden weken. die willighe offerhande dijnre handen die du offeren sults na des heren dijns gods benedictie

11

ende du sults werscapen voer den here dijnen god du ende dijn soon ende dijn dochter dijn knape ende dijn ioncwijf ende die leuijt die binnen dinen poorten is: ende die toecomelinghe ende die weese ende die weduwe die mit v wonen in die stat die die here dijn god kiesen sal dat sijn name daer in wone:

12

ende du sults ghedencken dattu knecht waers in egipten: ende du suls doen ende wachten dat di beuolen is.

13

Du sults oec seuen daghen vieren die feeste vanden tabernaculen als du vergadert sults hebben die vruchten vanden dorschvloeren ende vter wijnperssen

14

ende du sults werscappen in dijnre feesten du ende dijn soon ende dijn dochter ende dijn knecht ende dijn ioncwijf: die leuijt ende oec die toecomelinc. ende die weese ende die weduwe die binnen dinen poorten sijn.

15

Du sults seuen daghen die feesten vieren den here dinen god in die stat die die here kiesen sal: ende die here dijn god sal di benedien in alle dine vruchten ende in alle dine wercken dijnre handen: ende du sulste in vruechden wesen

16

Drie weruen binnen den iaer sal alle dijne manlicke personen openbaren in des heren dijns gods aenscouwen in die stat die hi kiesen sal: ende in die sollempniteit vanden deruen brode. ende in die solempniteit vanden weken: ende in die solempniteit vanden tabernaculen. Niemant en sal voerden here ydel openbaren:

17

mer elc sal offeren na dat hi heeft na des heren sijns gods benedictie. die hi hem ghegheuen heeft

18

Du sults oec setten rechters ende meesters in alle dine poorten die die here dijn god di gheuen sal. in elc van dinen geslachten dat si dat volc vonnissen mit rechten vonnissen:

19

ende si en sullen in gene zide ofkeren. Du en sults gene personen wtnemen noch giften ontfaen: want ghiften verblinden wijser luden oghen: ende verwandelen der gerechtiger woerden

20

Du sults gherechtelijc dat rechte is veruolghen: dattu leuen moghes. ende besitten dat lant dat die here dijn god di gheuen sal

21

Neuen dijns heren dijns gods outaer en sulstu geen bossche noch bome planten:

22

du en sulste di oec niet maken noch setten beelden: die die here dijn god haet