Bible in duytsche (Delftse bijbel 1477)

§ Ca .xiiij

1

WEest kinderen des heren dijns gods. Om den doden en suldi v niet sniden noch calu maken:

2

want heilich volc bistu den here dinen god: ende die here heuet di vercoren wt allen luden van aertrike om dattu hem suls wesen een sonderling volc.

3

Ende en eet niet die beloften die onsuuer sijn

4

Dit sijn die beesten die ghi eten sult: den osse dat scaep ende die gheyte

5

dat harte den hinde. den buffel. ende den tragelaphum. die pygargom. ende den origem. ende die camelo. ende den pardulnm.

6

Elc beeste die in twe stucke die claeuwe deylt ende edercauwet suldi eten:

7

mer van dien die edercauwen ende die claeuwen niet en deylen dese en suldi niet eten: den camelum den haze den cyrogillum. Want sij edercauwen ende en deylen haer claeuwen niet. die sullen v onsuuer wesen.

8

Dat varken oec want het deylt die claeuwen ende en edercauwet niet: soe ist onsuuer. Haer vleysche en suldi niet eten: ende haeren corren en suldi niet naken.

9

Dese suldi eten van alle dien. die int water wonen. Die vinnen ende scellen hebben eetet:

10

die sonder vinnen ende scellen sijn en eet niet. want si sijn onsuuer.

11

Eet alle suuere voghelen.

12

Die onsuuere en eet niet. dat is den aerne ende den grijp ende den smerele.

13

ende den ixon ende den ghiere ende den wuwe elc in sijn maniere

14

ende alle maniere van rauene:

15

den struys ende den iupere. ende den laer ende den sparwer na sijn maniere.

16

Ende den herodiaen ende den zwaen. ende den oudeuader.

17

ende den duker. ende den pellicaen. ende den vle.

18

ende den valc ende den reygher. ende den caradrium. elc in sijn maniere ende die vpupa ende die vledermuys

19

ende alle dat crupet ende vlogelen heeft dat sal onsuuer wesen ende men en sals niet eten.

20

Al dat suuer is eet.

21

Mer wat ghestoruen is: en eet daer niet of. Gif dat den vreemden die binnen dinen poorten is dat hijt eet of vercoeptet hem: want du biste heilich volc dijns heren dijns gods. Ende du en suls enen boeke

[p. *249]

niet zieden in sijnre moeder melc.

22

Du suls verscheiden dat thiendendeel van alle dine vruchten die in die aerde wassen elcx iaers.

23

ende du suls eten inden aenscouwen dijns heren dijns gods in die stat die hi kiesen sal datmen daer sinen name in aenrope: die thiende van dinen coren ende vanden wijn ende vander olyen. ende die eerstgheboren van dinen vee ende dinen scapen: dattu te alre tijt leerste den here dinen god ontsien.

24

Mer als die wech verre is. ende die stat die de here dijn god kiesen sal ende hi di ghebenedijt heeft. ende du alle dit tot daer niet dragen en moges:

25

so sulstuut al vercopen ende te gelde maken ende du sulstet draghen in dijn hant. ende du suls tiden ter stat die die here dijn god kiesen sal:

26

ende du suls mitten ghelde copen so wat di genoecht of van vee of van scapen. Ende wijn ende clareit ende alle dat dijn ziele begheert: ende du suls eten voerden here dinen god: ende werscappen du ende dijn huys.

27

ende die leuijt die binnen dinen poorten is. Wacht dattu hem niet en laetste: want hi en heuet gheen ander deel in dine possessie.

28

Int derde iaer sulstu een ander thiende verscheiden van allen dien die di wassen te dier tijt ende du sulstese oplegghen binnen dinen doren:

29

ende die leuijt sal comen die geen ander deel noch possessie en heeft mit di. ende die vreemde ende die weese ende die weduwe die binnen dinen poorten sijn ende si sullense eten ende worden ghesadet: dat dij die here dinen god ghebenedien moet in allen werken dijnre handen die du doen suls