Bible in duytsche (Delftse bijbel 1477)

§ Ca xij

1

DIt sijn die gheboden ende die vonnissen die ghi doen sult int lant dat die here dijnre vaderen god di geuen sal: dattu dat besitten sulste alle die dagen dattu opter aerde gaen suls.

2

Werpt om. alle die steden daer die heydene woenden die gi besitten sult ende haer goden ofenden: op die hoghe berghen ende houelen ende onder alle ghelouerde hout

3

Werpt auerecht haer outaren ende breec haer afgoden: ende houwet of haer bosshe ende verbrantse mitten vyer ende breect die afgoden in stucken: ende verderft haer namen van dien steden.

4

Ghi en sult soe niet doen den here uwen god:

5

mer ter stat die v die here v god kiesen sal van alle uwen geslachten dat hi daer sinen name in setten sal ende daer in wonen sal. daer suldi comen

6

ende in dier stat suldi offeren uwe holocausten ende uwe victimen. die thienden ende die voerbarichste dijnre handen. ende uwe beloften ende uwe ghiften. die eerste gheboren van dinen ossen ende van dinen scapen:

7

ende ghi sult eten daer voerden here uwen god. ende gi sult verbliden te alle dien daer ghi uwe handen toesteket ghi ende uwe husen daer v die here v god in gebenedijt heuet.

8

Ghi en sult in dat lant niet doen dat wij huden hier doen dat elken guet dunct.

9

Want tot deser tijt en sidi noch niet comen te ruste ende te possessie: die v die here uwe god gheuen sal

10

Ghi sult ouer die iordane gaen

[p. *246]

ende gi sult wonen int lant dat v die here uwe god gheuen sal: dat gi rusten sult van allen vianden al om ende om. ende ghi sult wonen sonder enighe vrese

11

in die stat die v die here kiesen sal: dat sinen name daer in si. Daer suldi al offeren dat icti beuele: uwe holocausten ende uwe hostien ende uwe thienden ende die primicien van uwen handen: ende so wat dat voerbarich is in uwen ghiften die ghi den here belouet hebt.

12

Ende daer suldi werscappen voerden here uwen god. gi ende uwe sonen ende uwe dochteren ende uwe knapen ende uwe ioucwiuen. ende die leuite die in uwen poorten woont. Want hi en heeft gheen ander deel noch possessie onder v.

13

Wachte dij dattu dine holocausten niet en offers in elker stat die du sien suls:

14

mer in die stat die die here kiesen sal in een poort van dinen gheslachten daer sulstu die hostien offeren: ende daer sulstu al doen dat ic di beuele.

15

Mer wilstu eten ende hebstu ghenoecht in vleysche te eten. soe dodet ende eet na des heren benedictie dijus gods die hi di ghegheuen heeft in dijnen poorten. weder dattet onsuner is dat is besmet ende cranc: of suner dat is gheheel ende sonder smet dat gheoerloft is te offeren als die hijnde ende dat herte dat sulstu eten:

16

ia sonder dat bluet daer mede te eten ende dat sulstu wtstortten op die aerde als water.

17

Du en sulste in dijnen poorten niet moghen eten. die thiende van dijnen tarwe van wijn ende van olye. ende die eerstgheboren vanden vee ende vanden quicke ende alle dattu beloefs ende dattu offeren wils ende die primicien dijnre handen:

18

mer du sulstese eten voer den here dijnen god in die stat die die here dijn god kiesen sal. du ende dijn sonen ende dijn dochteren ende dijn knape ende dijn ioncwijf ende die leuite die woent in dijnen poorten: ende du sulste verblijden ende worden vermaect voerden here dinen god in alle dien daer du dijn hant toesteken suls.

19

Wachte die dattu den leuite in ghenen tide en lates also langhe als du int lant wonen suls.

20

Als die here dijne terminen ghewijt sal hebben also hi di ghesproken heeft. ende du vleysch wils eten dat dijne ziele begheert:

21

mer ist dat die stat verre is die die here dijn god verkiesen sal. soe sustu doden van dijnen vee ende van dijnen quicke dattu hebben suls alsoe hi di beuolen heeft: dat sijn name daer si. Ende du suls eten in dinen poorten also het di ghenoghet.

22

Alsoe men dat hijnde ende dat hert etet alsoe sulstuut eten: ende die suuere ende die onsuue sullen int gemene eten:

23

mer alleene sulstu dat wachten dattu dat bluet niet eten en suls. Want haer bluet is voer die ziele: ende hier om en sulstu dat bluet niet eten mitten vleysche:

24

mer stortet op die aerde als water

25

datti wel moet sijn ende dijnen kinderen na di: om dattu ghedaen suls hebben dat bequaem is in des heren aescouwen.

26

Mer dattu gheheylicht hebste ende belouet den here. sulstu nemen ende comen ter stat die die here verkiesen sal:

27

ende du sulste dine offerhande offeren dat vleysch ende bluet op des heren dijns gods outaer. Dat bluet vander offer-

[p. *247]

hande sulstu stortten opten outare: mer dat vleysch sulstu selue eten.

28

Behoude ende hore al dat ic di beuele op dat di wel moet sijn ende dijnen kinderen na di ewelijc: alstu duetste dat goet ende bequame is in des heren dijns gods aenscouwen.

29

Als die here dijn god sal hebben verdreuen voer dijn aensichte die luden daer du toe ingaen sults om te besitten ende duse besitten suls ende du wonen suls in haren lande:

30

wachte di dattu haer wercken niet en does na dien dat si verderft sullen sijn als du daer in comes: ende dattu niet en sokes haer oeffeninghe ende segs. Alsoe dese luden haer goden gheoefent hebben: alsoe sal icse oec oefenen.

31

Du en suls alsoe den here dijnen god niet doen. Want si hebben ghedaen haren goden alle onwaerdicheden dien die here teghen is ende offerden haer sonen ende dochteren: ende verbrandense mitten vyere.