Bible in duytsche (Delftse bijbel 1477)

Ca .xi

[p. *244]

1

MInne hier om den here dijnen god: ende houde sijne gheboden ende sine oefeninghen ende sijn vonnissen ende sijn gheboden in alder tijt.

2

Bekent huden dat dijn kinderen niet en weten. die niet ghesien en hebben die discipline des heren dijns gods. ende sine g rote dinghen ende sijn vrome hant ende sijn wtghestrecten arme.

3

ende sijn teykenen ende sijn wercken die hi midden in egipten dede. den coninc pharaoni ende alle sijnen lande.

4

ende alle den heere van egipten. ende den paerden ende den waghenen: hoese dat water vander roder zee ouerdecte. doe si v nauolgheden ende hoese die here heuet ofghedaen tot in desen daghe:

5

ende wat hi v ghedaen heeft inder wildernissen. tot dat ghi ghecomen sijt te deser stat:

6

ende dathan ende abyron helyabs sonen die rubens sone was: die die aerde verzwalch haren mont opdoende mit haren husen ende haren tenten ende mit alle haer guet dat si in midden van israhel hadden.

7

Uwe oghen hebben gesien alle des heren grote wercken die hi ghedaen heeft:

8

om dat gi wachten sult alle sijne gheboden die ic v huden ghebiede. ende dat ghij moghet ingaen ende besitten dat lant daer gi toe ingaet:

9

ende dat gi daer in vele tides moghet leuen dattie here onder eedt uwen vaderen ghelouet heeft ende haren sade dat van melc ende van olye vloyet.

10

Want dat lant daer du ingaen suls om te besitten. en is niet ghelijc den lande van egipten daer du wtghecomen biste. daermen dat water ouer duet lopen om te veruerschen alsomen ouer houinghe pleghe daer dat saet in gheworpen is:

11

mer het is montaengen lant ende campaengen lant. ende ontbeit reghen vanden hemel:

12

ende die here dijn god voersiet altoes ende sijn oghen sijn int lant vanden beghinne totten eynde vanden iaer.

13

Hier om ist dat gi ghehoersaem sijt mijnen gheboden die ic v huden beuele. dat gi minnet den here uwen god. dat gi hem dient in alle uwer herten ende in alle uwer zielen:

14

so sal hi reghen gheuen uwen lande tijtliken ende spadighen. dat ghi vergaderen sult tarwe wijn ende olye

15

ende hoey vten ackeren om die beesten te voeden: ende dat ghi sult moghen eten ende worden ghesadet.

16

Ende wacht v dat machschien v herte niet en worde bedroghen ende dat ghi dan van den here scheydet. ende vreemde goden dient ende aenbeedse:

17

ende dat dan die here vergrammet worde ende slutet den hemel dat gheen regen en vallet neder. ende dattet lant haer vruchte niet en geue: ende dat ghi dan haestelijc verdreuen wort vanden alte gueden lande dat v die here gheuen sal.

18

Legt dese mine woerden in nwen herten ende in uwen zielen ende hanctse in uwen handen voer een teyken: ende setse voer uwen oghen.

19

Ende leertse uwen kinderen: dat sijse ouerpensen. Als du sittes in dijnen huse ende wandelste inden weghe. ende als du legghen suls ende opstaen:

20

so sulstuse scriuen aen die stilen ende aen die doren van dijnen huse:

21

dat dijn iaren moeten worden ghemenichuoudicht ende dijnre kindere int lant dat die here dijnen vaderen ghsworen heeft: dat hijt hem gheuen soude

[p. *245]

also lange als die hemel ouer die aerde is.

22

Want ist dat ghi wacht die gheboden die ic v beuele. ende ghise duet ende dat ghi minnet den here uwen god ende gi wandert in alle sine weghen v an hem hanghende:

23

so sal die here alle dese luden verdriuen voer uwen aenscouwen ende ghij sultse besitten die meerre ende starcker sijn dan ghi.

24

Alle die stat die v voet treden sal. sal v wesen. Vander wildernisse ende van libano ende vander groter vluet eufrate totter wester zee. sullen uwe terminen wesen

25

Niemant en sal teghen v staen Uwen anxt ende v vrese sal die here god gheuen op al dat lant dat ghi treden sult: alsoe hi v ghesproken heeft.

26

Sich ic sette huden in uwen aenscouwen benedictie ende maledictie:

27

die benedictie ist dat gi gehoersaem sijt des heren dijns gods geboden die ic v huden beuele:

28

die maledictie ist dat ghi des heren uwes gods geboden niet en sijt ghehoersaem: mer dat ghi ofgaet vanden weghe die ic v nu tone: ende dat ghi wandert na vreemde goden die ghi niet en kent

29

Als di die here dijn god ingheleyt sal hebben in dat lant daer du toe tides om te wonen soe sulstu die benedictie setten opten berch garizim. die maledictie opten berch hebal:

30

die ouer die iordane legghen achter den wech die gaet ter sonnen onderganc. int lant der chananeen die wonen inden campaengen die teghen galgalam leit. dat neuen die valleye is dat gaet ende strect verre.

31

Want ghi sult ouer die iordane gaen om te besitten dat lant dat v die here v god gheuen sal: ende ghijt sult hebben ende besitten.

32

Daer om siet dat ghi voldoet die oeffeninge ende die vonnissen die ic v huden legghen sal in uwen aenscouwen