Bible in duytsche (Delftse bijbel 1477)

§ Capittel .ix.

1

HOre israhel du suls huden ouer die iordane gaen om te besitten alte grote gheslachten. ende starcker dan du biste. grote steden totten hemel toe gemuert:

2

groot volc ende lanc. enachims kinder. die du ghesien hebts ende ghehoert: dat nyemant wederstaen en mach

3

Daer om sulstu huden weten dat die here dijn god voer dij gaen sal als een vyer verslindende ende verterende: diese verderuen sal ende ofdoen ende verdriuen haestelijc voer dijn aensichte: alsoe hi di ghesproken heeft

4

Ende en segt in dijn herte niet alse die here dijn god of gedaen heeft in dijn aenscouwen. om mine gherechticheit heeft mi di here ingheleit dat ic dit lant besitten sal: om dat dese gheslachten sijn in hore quaetheit ofgedaen

5

Want du en sulste niet om dine gerechticheit ingaen noch om die doechde dijnre herten om te besitten haer lant: mer om dat si quaetheit ghedaen hebben. so worden si ofgedaen doe du daer in quaemste: om dat die here sijn woert voldoen soude dat hi onder eede dinen vaderen geloeft hadde abraham ysaac ende iacob.

6

Hier om suldi weten dat die here dinen god di dit alte guede lant niet en heeft ghegeuen in possessie om dine gherechticheden: als du volc sijs van alten harden necken.

7

Ouerdenct ende en vergeets niet hoe du den here dinen god te gramscap geporret hebtste inder wildernisse: ende van dien daghe dattu vten lande van egipten ghegaen biste tot deser stat. so hebstu altoes ieghen den heer gestreden

8

Want in oreb so vergramdestu hem. ende vergramt so woude hi di ofdoen

9

doe ic opten berch ghinc daer ic ontfaen soude twe stenen tafelen. die tafelen der beloften dat die here mit v maecte. Ende ic gheduerde opten berch veertich dagen ende veertich nachten: geen broot etende noch gheen water drinckende.

10

Ende die here gaf mi twe stenen tafelen ghescreuen mit gods vingere. ende die hielden alle die woerden. die v die here opten berch sprac van midden den vyer. doe dat volc vergadert wort.

11

Ende doe veertich daghen ende alsoe vele nathten gheleden waren soe gaf mi die here twe stenen tafelen. die tafelen der beloften:

12

ende hi seide mi. Stant op ende ganc neder van hier haestelijc: want dat volc dattu geleit hebts wt egipten si hebben haestelijc ghelaten den wech

[p. *242]

die du hem thoendes: ende si hebben hem enen ghegoten afgod ghemaect

13

Ende echter seide die here tot mi. Ic merc dat dit volc van harder necken is

14

Laet mi dat ict verderue: ende dat ic sinen naem ofdoen mach van onder den hemel: ende ic sal di setten bouen luden die meerre ende starcker sijn dan dese lude.

15

Ende doe ic of quam vanden bernenden berghe. ende ic beide die tafelen in beide die handen hielt:

16

ende ic sach dat gij den here uwen god ghesondicht hadt ende dat gi v hadt ghemaect een ghegoten calf. ende dat ghi haestelic hadt ghelaten sinen wech die hij v gewijst had:

17

so werp ic die tafelen wt minen handen ende ic bracse in uwen aenscouwen.

18

Ende ic viel voerden here also ic te voren dede veertich daghen ende veertich nachten. broot niet etende noch water drinckende. om alle uwe sonden die gij dedet teghen den here: ende daer gi en mede te gramscappen beruerde.

19

Want ic ontsach sine gramscap ende sine onwaerdicheit: daer hi mede gheporret was ieghen v ende woude v ofdoen Ende die here hoerde mi oec dese weruen.

20

Hi was oec teghen aaron anxtelike gram ende hi wilden verderuen: ende voer hem so bad ic oec:

21

Ende uwe sonde die ghij ghemaect hadt was dat calf. dat begreep ic ende verbrandet: ende wreeft in stucken ende maectet al in poluere ende ic warpt inder vluet die vanden berghe neder comt

22

Ghi beruerde den here oec inden brande. ende inder berueringe ende ten graue van begheerten.

23

ende doe hi v sende van cadesbarne ende seide. ganc op ende besitte dat lant dat ic v gegheuen heb: ende ghi veronwaerde des heren uwes gods ghebot ende ghi en geloefde hem niet: noch ghi en woudet sine stemme niet horen:

24

mer ghi hebt altoes rebelle gheweest van dien daghe dat ic v begonste te kennen.

25

Ende ic lach voerden here veertich daghen ende veertich nachten inden welken ic hem oetmoedeliken bad dat hi v niet ofdoen en soude also hi ghedreyghet had:

26

ende biddende seide ic. Here god en verderue dijn volc niet ende dine erfachticheit die du verlost hebste in dijnre grootheit: die du in starcker hant wt egipten hebste gheleit.

27

Ghedencke dijnre knechten abraham ysaac ende iacob. Ende en siet niet an die hartheit des vols ende sijn quaetheit ende sijn sonde:

28

dat machschien die ghene niet segghen en mogen die in dat lant wonen daer duse wtgeleit hebste die here en hadse niet moghen inleiden int lant dat hi hem gheloeft hadde. ende hi hatese: ende hier om leide hise wt dat hijse doden soude inder wildernissen:

29

die dijn volc sijn ende dijn erfachticheit die du wt hebts geleit in dine grote macht ende in dinen wtghestrecten arme