Bible in duytsche (Delftse bijbel 1477)

§ Ca .vi.

1

DIt sijn die gheboden ende die vonnissen ende die oefeninghen die v god geboden heuet dat icse v leren soude. ende dat ghise doen sult int lant daer gi toe ouergaet om te besitten: dat ghi ontsien sult den here dinen god.

2

ende dattu wachten suls alle sine wette ende alle sine gheboden die ic dij ghebiede ende dinen kinderen ende dinen wiuen ende dine neuen alle die daghen dijns leuens: dat dine daghen moeten worden verlenghet.

3

Hore israhel ende onthoude dattu does datti die here beuolen heeft datti wel wesen mach ende dattu meer wordesgemenichfoudicht alsoe di belouet heuet die here dijnre vaderen god dat lant dat vloeyt van melc ende van honich.

4

Hore israhel. Die here onse god. is een god.

5

Du suls minnen den here dinen god van alle dijnre harten: ende van alle dijnre zielen: ende van alle dijnre macht

6

Ende dese woerden die ic di huden beuele. sullen wesen in dijn harte:

7

ende du sulstese vertellen dinen kinderen. ende du suls daer om pensen als du in dijn huys sittes. ende als du inden wege wanders. ende du slaepes ende opstaes:

8

ende du sulstese binden als een teyken in dijn hant: ende si sullen wesen ende worden bewaert tusschen dijn oghen:

9

ende du sulstese scriuen inden dorpel ende anden doren dijns huys.

10

Ende als di die here dijn god ingheleyt heeft. int lant daer hij dijn vaders abraham ysaac ende iacob op ghesworen heeft. ende als hi di ghegeuen heuet grote steden ende alte guet die du niet ghesticht en hebste:

11

ende husen die vol sijn van alle rijcdommen die du niet getimmert en hebste. ende fonteynen die du niet gemaect en hebste. ende wijngaerden ende olyuegaerden die du niet gheplant en hebste.

12

ende als du ghegeten hebste ende du ghesaet biste:

13

so wachte naerstelike dattu des heren niet en vergeets die di vten lande van egypten. vten huse des dienstes geleit heeft. Du sulste den here dinen god ontsien ende hem allene dienen: ende bi sinen name en sulstu niet sweren.

14

Du en sulste niet gaen na die vreemde goden van alle den heidenen die al om ende om v sijn:

15

want god die

[p. *238]

benider is die here dijn god in midden di: dat des heren dijns gods gramscap tegen di niet en worde vergrammet ende dat hi v dan ofdoe van bouen den lande.

16

Du en suls den here dinen god niet becoren: alsoe du hem becoerdes in die stat der becoringhen.

17

Wachte des heren dijns gods gheboden ende oercontscappen ende sijn oeffeninghen die hi di beuolen heeft:

18

ende duet dat ghenoechlic ende guet is in des heren dijns gods aenscouwen datti wel sijn moet: ende dattu ingaende besitten moetes dat guede lant ende al tguet

19

daer die here dinen vaderen of ghesworen heeft dat hi alle dine vianden ofdoen soude alsoe hi gesproken heeft.

20

Morghen als di dijn soen vraghen sal ende segghen wat willen hem dese oercontscappen. ende oeffeninghen ende dese vonnissen die ons die here gheboden heeft: so sulstu hem segghen.

21

Wij waren pharaonis dienstluden in egipten ende die here leide ons in starcker hant van daer wt:

22

ende hi dede teykenen ende vonnissen ende grote wonderen ende harde quaet in egipten in onsen aenscouwen ieghen pharao ende alle sijn huys:

23

ende hi leide ons wt van daer: om dat hi ons inleiden soude ende gheuen ons dat lant daer hi onsen vaderen of gesworen heeft

24

Ende die here beual ons dat wij alle dese wetlijcheden doen moeten: ende dat wi ontsien den here onsen god dat ons wel moet sijn alle die dagen ons leuens also het huden is

25

Ende hi sal ons ontfermhertich wesen: ist dat wi wachten ende doen alle sine gheboden voerden here osen god also hij ons beuolen heeft