Bible in duytsche (Delftse bijbel 1477)

§ Ca .v.

1

MOyses riep alle israhel: ende seide tot hem. Israhel hore die geboden ende die vonnissen: die ic di huden: spreke in dijnen oren. Leertse ende voldoetse mit werke.

2

Die here onse god hi maecte mit ons belofte in oreb.

3

Hi en aenghinc gene beloefte mit onsen vaderen. mer mit ons luden: die in deser tijt sijn ende leuen.

4

Van aensichte te aensichte sprac hi ons toe inden berge van midden vanden vyere.

5

Ic was nauolgher ende middelaer in dien tide tusschen den here ende v: dat ic v sijn woerden boetscappen soude Want ghi ontsaghet dat vyer: ende ghi en ghinct opten berch niet. Ende die here seide.

6

Ic bin die here dijn god: die di vten lande van egipten heb gheleit vanden huse des dienstes.

7

Du en suls gene vreemde

[p. *236]

goden hebben in minen aenscouwen.

8

Du en suls te dijnre behoef gene beelde maken noch gene gelikenis van al dat bouen inden hemel is ende die in die aerde beneden sijn: ende die vloten int water onder die aerde

9

Du en sulstese niet aenbeden: noch oefenen. Want ic bin die here dijn god. god die benider gheldende der vader quaetheit op die kinderen inden derden ende inden vierden geslachte den ghenen die mi haten:

10

ende doende ontfermherticheit in vele dusentigen die mi minnen ende mine gheboden houden.

11

Du en suls niet te vergheefs in den monde nemen die name des heren dijns gods: want hi en sal niet onghecastijt wesen die op een ydel dinc sinen name anneemt

12

Behoude den saterdach dattuen heylighes: also di heuet beuolen die here dijn god

13

Ses dagen sulstu werken: ende doen alle dijn werken.

14

Die seuende dach is die saterdach dat is des heren dijns gods ruste. Du en sulster geen werck in doen du ende dijn sone ende dijn dochtere ende dijn knape ende dijn ioncwijf: ende osse ende ezele ende elc dijn beeste. ende die vreemde die binnen dinen poorten is: dat dijn knape ende dijn ioncwijf ruste ghelijc du.

15

Ghedencke dattu oec ghedient hebste in egipten: ende datti daer wt geleit heuet die here dijn god in starcker hant ende in wtghestrecten arme. Hier om heeft hi die beuolen dattu den saterdach houden soudes.

16

Eer dijn vader ende dijn moeder alsoe die here dijn god die beuolen heeft: dattu langhe tijt leuen moghes: ende dat di wel moet sijn int lant dat die here dijn god di gheuen sal.

17

Du en sulste niet doden

18

Du en sulste gheen onkuysheit doen

19

Ende du en sulste gheen diefte doen.

20

Noch du en sulste ieghen dijn naesten gheen valsche oetcontscap spreken

21

Du en suls niet begheren dijns naesten wijf noch sijn huys. noch sinen acker. noch sijn knape. noch sijn ioncwijf. noch sijn osse noch sijn ezele. noch yet dat sijn is.

22

Dese woerden sprac die here mit groter stemmen. tot alle uwer menichten op den berch van midden den vyer. ende der wolken. ende der duysterheden. ende hi en deder niet meer toe: ende hi screefse in tween stenen tafelen die hi mi gaf.

23

Ende doe hi hoerde die stemme van midden der donckerheden. ende ghi den berch barnen saghet: soe quaemdi tot mi alle gi princen der gheslachten ende die meeste van gheboerte: ende seide.

24

Sich die here onse god heuet ons ghetoent sine moghentheit ende sijn grootheit. Wi heben sijn stemme ghehoert van midde den vyere: ende wi hebben huden geproeft dattie mensche is ghebleuen leuende als god tot hem ghesproken heeft

25

Waer om dan sullen wi steruen: ende waer bi sal ons dat alte grote vyer verteren? Want horen wij voertmeer des heren ons godes stemme soe sullen wi steruen.

26

Wat is alle vleysch dattet horen moge des heren des leuende gods stemme die van midden enen vyer spreect also wij ghehoert hebben: ende moghen dan leuen?

27

Daer om so ganc du totten here. ende hoer al dat die here onse god di segghen sal: ende du suls tot ons spre-

[p. *237]

ken: ende wi als wijt horen. sullen wijt doen.

28

Doe dit die here ghehoert hadde so seide hi tot mi. Ic hebbe gehoert die stemme van des volcs woerden dat si ghesproken hebben. Si hebbent al wel gesproken.

29

Wie geuet hem te hebben alsulcke ghedachten dat si mi ontsien ende dat si wachten alle mine geboden in alre tijt: dat hem ende haren kinderen ewelijc wel mach sijn?

30

Hier om ganc ende segt tot hem.

31

Keert weder in uwen tenten. Mer stant du hier mit mi: ende ic sal di segghen alle mine vonnissen ende mine oefeninghen ende mine gheboden die du hem leren suls dat sise doen sullen int lant dat ic hem in possessien gheuen sal.

32

Hier om wacht ende duet dat v die here gheboden heeft. dat gi leuen moghet ende dat v wel wesen mach Ghi en sulter niet ofkeren ter rechter hant noch ter luchterhant:

33

mer sult wanderen alle den wech die v die here beuolen heeft: dat dijn daghen moeten worden verlangt int lant uwer possessien