Bible in duytsche (Delftse bijbel 1477)

§ Ca .iij.

1

ALdus ghinghen wi om alle den wech van basan. Ende og die coninc van basan quam wt mit alle sijnen volke ons te ghemoete om te vechten in edray:

2

ende die here seide tot mi. En ontsich hem niet: want hi is in dijn hant gheleuert mit alle sinen volke ende sijnen lande: ende du suls hem doen als du ghedaen hebste seon den coninc van amorreen. die in esebon woende

3

Dus so leuerde die here oec in onsen handen og den coninc van basan ende al sijn volc:

4

ende wi slogense al totter doot: ende wi woesten alle sijn steden te enen tide Gheen poorte en was die ons ontvlien mochte. tsestich poorten wonnen wij: al dat lant van argob die van ogs rike waren in basan.

5

Alle die poorten waren gemuert mit harde hoghe muren mit poorten ende mit grendels verwaert: al sonder ouertallike poorten die sonder muren waren.

6

Ende wi dedense of also wi ghedaen hadden seon den coninc van esebon ende verderfden elke stede ende die mannen ende die wijuen ende die cleyne kinderen:

7

mer wi namen die beesten ende die rouen vander poorten.

8

Ende in dien tide namen wij tlant van tween coninghen hant vanden amorreen die ouer

[p. *232]

die ioerdane waren

9

vander vluet arnon totten berghe hermon die die van sidonien sarion hieten

10

ende die amorreen sanyr: alle die steden die ghesticht sijn int slechte lant. ende al dat lant van galaad ende van basan tot selcha. ende edray die steden van og des conincrijcs in basan wonnen wi

11

Want og die coninc van basan was allene ouerghebleuen van der gyganten gheslachte. Men toent sijn yseren bedde dat in rabath van enmons kinderen is: dat in die lengte heeft neghen cubitus: ende vier in die brede ter maten van eens manlics hants cubitus.

12

Ende in dien tide besaten wi dat lant van aroer die is op dat ouer vander vluet van arnon: tot inder poorten te middewert van galaad. Ende sine stede heb ic ghegheuen ruben ende gad:

13

ende dat ander deel van galaad ende al basan van ogs rike heb ic ghegheuen half den gheslachte van manasses al dat lant van argob. Ende al basan hiete der gyganten lant.

14

Iair manasses soon besat al dat lantscap van argob totten termine van gessuri ende miachati. Ende hi heuet basan na sijnen naem gheheten anothyair dat is yairs poorten: tot in desen daghe

15

Ic heb oec machir galaad ghegheuen

16

ende rubens ende gads gheslachten heb ic ghegheuen dat laut van galaad totter vluet arnon die middewaert vander vluet ende dat eynde totter vluet ieboc die dat eynde is van ammons kinderen:

17

ende dat slechte vander wildernisse totter iordanen ende die treminen cenereth totter zee vander wildernisse dat die soutste zee is ten voete vanden berghe phasga teghen dat ooste.

18

Ende in dien tide beual ic v ende seide. Die here v god gheeft v dat lant in erfachticheit:

19

bereet soe gaet voer uwe brueders die kinder van israhel gi alle starcke mannen sonder uwen wijuen ende uwen kinderen ende uwe beesten. Want ic weet dat gi vele vees hebt ende si sullen blijuen inden poorten die ic v gheleuert heb:

20

tot dat die here rust gheue uwen bruederen alsoe hi v ghegeuen heeft. ende dat si oec besitten dat lant. dat hem die here gheuen sal ouer die iordane: dan sal een yghelijc wederkeren in sine possessie die ic v ghegheuen heb.

21

Ic beual oec iosue in dien tide ende seide. Dijn oghen hebben ghesien dat die here onse god desen tween coninghen ghedaen heeft: aldns sal hij allen den rijke doen daer du ouergaen suls toe.

22

En ontsietse niet. Want die here v god sal voer v vechten

23

Ende ic bat den here in dien tide ende seide

24

Here god du beghinste dijnen knechten te tonen dijn grootheit ende dine alte starcke hant. Want ghene ander god en is inden hemel noch inder aerden die dijn wercken mochte doen: ende die gherekent mochte worden teghen dijne starcheit.

25

Hier om sal ic ouergaen ende sien dat alte guede lant. ouer die iordane: ende desen voerbarighen berch ende den libanus.

26

Ende om uwen wille is mi die here vergrammet ende hi en ghehoerde mi niet: mer hi seide mij Het is dij ghenoech: en spreec te mij ghene sins meer van desen dinc.

27

Ganc opten top van phasga: ende keer dijn oghen al om ende om ten westen ende ten

[p. *233]

noerden. ende ten suden ende ten oosten wert. ende besich. Want du en suls ouer dese iordane niet gaen.

28

Ghebiede iosue ende maecten sterc ende stout: want hi sal voer dit volc gaen: ende hi sal hem dat lant deylen dattu sien suls.

29

Ende wi bleuen in die valeye ieghens phogors temple