Bible in duytsche (Delftse bijbel 1477)

§ Ca .I.

1

DIt sijn die woerden die moyses sprac tot alle israhel ouer die ioerdane in den aseroth. daer veel gouts is.

2

in elf daghen van oreb: al den wech des berchs van seyr campaengen inder wildernisse. ieghens die rode zee: tusschen pharan ende thofel ende laban ende tot cadesbarne.

3

Inden veertichsten iare in die elfste maent in die eerste dach vander maent so sprac moyses totten kinderen van israhel al dat hem die here beuolen hadde. ende dat hi hem segghen soude:

4

na dien dat hi versleghen hadde seon den coninc vanden amorreen. die woonden in esebon: ende og den coninc van basan die woonde in aseroth ende in edrai

5

ouer die iordane int lant van moab. Ende moyses beghonste die wet te verclaren ende te segghen.

6

Die here onse god sprac tot ons inden berghe oreb ende seide.

7

Het si v ghenoech dat ghi in desen berch gheduert hebt. Keert weder ende coemt ten berghe vanden amorreen ende ten anderen campaengen ende ten montangen die hem naest legghen ende ten nederen steden teghen dat suden ende neuen die ouer vander zee: ten lande vanden chananeen ende vanden libano ter groter riuieren eufraten.

8

Siet ic heb v geleuert. Gaet daer in ende besittet: daer die here uwen vaderen op ghesworen heeft abraham ysaac ende iacob: dat hijt hem gheuen soude ende haren sade na hem

9

Ende in dien tide seide ic v.

10

Ic en mach

[p. *228]

v luden allene niet ghedoghen want die here v god heeft v ghemenichfoudicht: ende ghi sijt huden vele ghelijc den sterren des hemels.

11

Die here uwer vaderen god moet daer noch toe doen dat ghetal van velen dusentighen: ende hij moet v luden ghebenedien also hi gesproken heeft.

12

Ic en mach allene uwen oerbaer niet ghedraghen. ende den last ende die scellinghe

13

Gheeft wt v luden. mannen wijs ende wel gheleert. ende welker wanderinghe gheproeft si in uwen gheslachten: ende ic salse v luden te princen setten.

14

Doe antwoerde ghi mij. Het is een guet dinc dattu doen wils.

15

Ende ic nam van uwen gheslachte wijse mannen ende edele. ende ic settese princen dusent heren ende hondert heren ende vijftich heren ende decaniers die v alle dinc leren souden: ende ic beual hem ende seide

16

Hoertse: ende dat gherecht is dat vonnist. Weder dattet een poorter of een vreemde is:

17

gheen onderscheit en sal v wesen der personen. Gij sult enen cleynen horen ghelijc den groten: ende ghi en sult nyemants persone wtnemen: want dat vonnisse is gods. Ende ist dat v iet zwaer duncket wesen soe brengtet tot mij: ende ic salt horen.

18

Ende ic beualt al dat gi doen sout.

19

Ende doe wij voert tiden van oreb soe leden wij doer een anxtelike wildernisse ende alte groot die ghi ghesien hebt alden wech neuen den berch van amorreen: also ons beuolen hadde die here onse god.

20

Ende doe wi gecomen waren in cadesbarne so seide ic v.

21

Ghi sijt comen tot amorreeus berghe: dien die here v god v gheuen sal Sich dat lant. dat god dijn here dij gheuen sal. Ganc op ende besittet: alsoe die here onse god dijnen vaderen ghesproken heeft.

22

Ende en wil di niet vresen: noch en ontsich di niet. Ende ghi quaemt alle tot mi ende gi seidet Senden wij mannen die dat lant mercken: ende weder boetscapen ons al welcken wech wi opgaen sullen: ende te wat steden tiden.

23

Ende doe mi die reden genoechde: soe sende ic wt v luden twaelf mannen elken wt sijnen gheslachten.

24

Ende doe si wech ghetijt waren ende opghegaen inden gheberchten: so quamen si totter valeyen vander druuen: ende doe si dat lant ghemerct hadden. soe namen si van sijnen vruchten

25

om dat sij die drachticheit des lants tonen souden ende brochtense tot ons ende seiden. Dat lant is guet dat die here onsen god ons gheuen sal.

26

Ende gi en woudet daer niet opgaen: mer ghi wort onghelouich den woerden des heren onses godes ende gi murmereerde in uwen tenten: ende seidet.

27

Die here haet ons: ende hier om heeft hi ons gheleit vten lande van egipten om dat hi ons leueren soude in des amorreus hant ende afdoen.

28

Warwaert sullen wi opgaen? Die boden hebben ons herte veruaert ende gheseit. Het is alte groten menichte: ende si is meerre van maecsele dan wij sijn. Die poorten sijn groot totten hemel toe gemuyert. Wi saghen daer enachims sonen

29

Ende ic seide v. en wilt niet vresen: noch en ontsiet hem niet.

30

Die here god die onse leider is. die sal voer v vechten: also hi in egipten dede daert alle die luden saghen:

31

ende also gi seluer inder wildernisse hebt

[p. *229]

ghesien. Die here dijn god heeft dij ghedraghen in alle die weghen daer du in gewandelt hebst als een mensche pleghet sijn cleyne kint te dragen tot dat ghi comen sijt tot deser stat.

32

ende noch aldus so en hebdi niet gheloeft den heer uwen god die voer v ghegaen is inden wech

33

ende die stat wijsde daer gi uwe tenten slaen sout: ende die v des nachtes den wech wijsede ende thoende bij vyer: ende des daghes bider colummen eenre wolken.

34

Ende doen die here ghehoert hadde den gheluyt van uwen redenen: soe wort hij gram ende swoer ende seide.

35

Niemant van allen desen menschen des alren quaets gheslachten en sal sien dat guede lant dat ic mit ede belouet hebbe uwen vaderen:

36

sonder caleph iephone soon. Want hi sallet sien: ende ic sal hem dat lant gheuen dat hi betreden heeft ende sijnen kinderen: want hij is den here gheuolghet.

37

Ende des heren onwaertscap en is niet te verwonderen ieghens volc: om dat mi oec die here om uwen wille vergramt is ende mi gheseit heuet. Du en sulster oec niet ingaen: mer voer di salre ingaen iosue nuns soon dijn dienre.

38

Desen gherade ende maecten vrome: ende hi sal israhel dat lant deylen mitten lotte.

39

Vwe cleyne kinderen daer gi of gheseit hebt datmense gheuanghen leiden soude ende die kinderen die huden niet en weten onderscheit onder guet ende quaet sij sullen daer ingaen: ende hem sal ic dat lant gheuen ende si lullent besitten:

40

mer keert ghi weder ende gaet wech inder wildernissen alden wech vander roder zee.

41

Ende ghi antwoerde mi. Wi hebben den here ghesondicht. Wi lullen opgaen ende vechten: also die here onse god ons beuolen heeft. Ende doe ghi ghereit mit wapenen op den berch tide: so seide mi die here.

42

Segt tot hem En wilter niet opgaen noch en vechtet niet. Want ic en bin mit v niet: dat gi voer uwe vianden niet en valt.

43

Ic seidet v ende ghi en hoerdes niet: mer gi dedet tegen des heren gebot ende in houaerdicheden soe gijnc ghi opten berch.

44

Ende die amorreus quam wt die opten gheberchte woende ende hi quam v teghen ende iaghede v alsomen byen pleghet te volgen ende hi sloech v van seyr tot horma.

45

Ende doe gi weder gekeert waert ende ghi voerden here weendet so en hoerde hi v niet: ende hi en wilde na uwe stemme niet horen.

46

Dus saet gi vele tides in cadesbarne.