Bible in duytsche (Delftse bijbel 1477)

§ Ca xxxvi

1

HEt quamen princen van galaads familien die machirs sone was manasses sone van iosephs sonen gheslachthe: ende si spraken tot moysen voer den princen van israhel ende seiden.

2

Die here heuet di onse here beuolen dattu den kinderen van israhel dat lant delen soudes mitten lote: ende dattu salphaads onses brueders dochteren gheuen soudes die possessie die haer vader ghehat soude hebben:

3

ende ist dat si ander mannen wt enen anderen gheslachte nemen. soe sal hem haer possessie volghen: ende sij sal worden ghemindert van onse erfachticheit als si ouergaen in een ander geslachte:

4

of het sal aldus moeten wesen dat als iubileus dat is dat vijftichste iaer comen sal dat dan te broken worden sal die deylinghe vanden lotten: ende der eenre luden possessie sal ouergaen totten anderen.

5

Moyses antwoerde den kinderen van israhel: biden beuele van den here ende seide. Dat gheslachte van iosephs sonen heeft gherechtelijc ghe-

[p. *227]

sproken:

6

ende dese wet is wtghegaen vanden here op salphaads dochteren. Si nemen te huwelijc wat mannen dat si willen: allene in haren gheslachte:

7

op dat der kinder van israhels possessie niet en worde onder menghet vanden enen gheslachte int ander gheslachte. Want alle mannen sullen wiue nemen van haren geslachte ende hare maechscap.

8

ende alle wiuen sullen mannen nemen van haren gheslachte: dat die erfachticheit blijue inden familien ende die gheslachten en sullen hem niet ondermengen:

9

mer si sullen al so blijuen

10

also si vanden here ghedeilt sijn.

11

Ende salphaads dochteren deden also hem vanden here beuolen was: ende maala ende thersa ende egla ende melcha ende noha namen haers vaders brueders sonen

12

van manasses familie die iosephs sone was: ende die possessie die hem gegeuen was bleef inden gheslachte ende familie haers vaders.

13

Dit sijn gheboden ende vonnissen: die die here gheboet bi moyses hant totten kinderen van israhel inden campaengen van moab op die ioerdane teghen iericho.

§ Hier gaet wt numerus dat men heet tboeck van den ghetale.