Bible in duytsche (Delftse bijbel 1477)

§ Ca. xxxv

1

OEc seide die here tot moysen inden campaengen van moab op die iordane tegen iericho.

2

Beuele den kinderen van israhel dat sij den leuiten gheuen van haren possessien ende ghemuerden poorten om daer in te wonen

3

ende haer buyten lant al om ende om: ende si sullen inden poorten wonen. ende die buten landen sullen wesen om te voeden vee ende quicke ende beesten:

4

ende die sullen hem strecken buten den muren vanden steden al om ende om dusent screden verre.

5

Teghen dat oost. so sullen twe dusent cubitus verre wesen. ende teghen tsyuden oec twee dusent cubitus. Ende die selue mate sal oec wesen ter zee waert. die westwaert scouwet: ende die noortzide sal in sulken terminen einden. Ende die poorten sullen in midden wesen: ende die buten landen daer buten.

6

Ende van dien poorten die ghi den leuiten gheuen sult. soe sullenre ses verscheiden sijn inder ballinghen hulp. dat si te dien vlien moghen die onwillens bluet ghestort hebben:

7

ende sonder dese noch ander twe ende veertich poorten dat is te gader acht ende veertich mit haren buten landen.

8

Ende dese poorten diemen vanden kinderen van israhels possessien geuen sal. salmen dat meest nemen vanden ghenen dier meest hebben: ende dier minste hebben salmen minste nemen. Want elc sal den leuiten poorten gheuen na dat ghetal van haerre erfachticheit.

9

Ende die here sprac tot moysen.

10

Spreect den kinderen van israhel: ende du suls tot hem segghen

11

Als ghi ouer die iordane sult sijn gheghaen int lant van chanaan. soe onderscheit welke poorten sullen wesen der ballinghen vlucht. die onwillens bluet ghestort hebben:

12

ende als daer een vluchtighe sal in sijn gheulogen. soe en sullen des gheens maech dier doot ghesleghen is niet moghen doden: voer dat hi staen sal inder menichten aenscouwen. ende men sijn sake vonnisse

13

Een van deser poorten die ter vlucht van ballinghen sullen wesen verscheiden

14

so salre drie wesen ouer die iordane. ende drie int lant van chanaan.

15

beide den kinderen van israhel ende den toecomelinghen ende den vreemden: dat si te dien vlien moghen. die onwillens bluet ghestort hebben.

16

Soe wie mit yser enen mensche slaet. ende hi dootbleef die men sloech. hi sal sculdich wesen der manslacht: ende hi sal oec steruen

17

Werpt hi enen steen ende doot hi en daer mede: so salmen oec also castien

18

Slaet hi en mit enen houte ende blijft hi doot:

[p. *226]

so salmen wreken mit des gheens bluet dien sloech.

19

Des geens naeste der doot is ghebleuen sal den man slachtigen dootslaen: te hant als hien begrijpt sal hien slaen.

20

Ende ist dat yemant bi hate enen mensche huert of bi verradenisse yet in hem werpt:

21

of slaet hien mitter hant om dat sijn viant was. ende die ghene sterft: die sloech sal der manslacht sculdich wesen. Des gheens maech dier doot is ghebleuen te hant als hi hem vint so sal hi hem doden

22

Mer duet hi yet van desen bi misual sonder hate

23

ende sonder viantscap. ende dat geprooft wort daert dat volc hoort.

24

ende men die sake onderuint tusschen die manslachtighen ende des gheens naeste dier doot is.

25

soe sal die sculdighe verlost worden van des gheens hant die dat wreken soude: ende men sallen wederleiden mit vonnisse ter poorten daer hi toegheulogen was. ende hi sal daer wonen tot dat die grote paep die mitter heiligher olyen gheconsacreert is sterft.

26

Mer vintmen den manslachtighen buten den terminen vanden poorten die den ballingen sijn gegeuen

27

ende hi gheslegen wort vanden genen die wreker is vanden bluede: den doot slat hi sal sonder misdaet wesen

28

Want hi was sculdich in die poorte te bliuen vluchtich tot des bisscops doot. Mer als die bisscop gesturuen sal sijn: soe sal die manslachtighe weder keren in sijn lant.

29

Dit sal v ewelijc wettich wesen. in allen uwen woninghen.

30

Enen manslachtighen salmen mit oerconde castien. Men sal niemant domen om eens mans oercontscap.

31

Ghi en sult gheen ghelt ontfaen vanden genen die bleut sculdich is: hi sal oec steruen te hant.

32

Die ballinghe ende die vluchtighe en sullen gheen sins wedercomen in haren poorten voer des bisscops doot.

33

dat ghi niet en besmit dat lant van uwer woninghen dat mitter onnoselre bluet wort besmet: ende ten mach anders niet worden gesuuert sonder mits des gheens bluet die eens anders bluet stort:

34

ende aldus sal uwe possessie ghesuuert worden ende ic sal mit v wesen. Want ic bin die here: die wone onder die kinder van israhel