Bible in duytsche (Delftse bijbel 1477)

§ Capittel .xxxiiij.

1

ENde die here sprac tot moysen ende seide.

2

Beuele den kinderen van israhel: ende du suls tot hem segghen. Als gi gecomen sijt int lant van chanaan ende het v mitten lotte in possessie gheuallen is: so salment terminen in desen eynden.

3

Die zuytzide sal beghinnen van der wildernisse van syn die neuen edom is: ende si sal haer termine hebben teghen dat ooste die soute zee:

4

ende dese terminen sullen al om ende om die zyutzide gaen alle den opganc vanden scorpioen. also dat si ouergaen sullen in senna ende sij sullen int suyden comen tot cadesbarne: ende van daer sullen die eynden wtgaen te eenre poorten die adar heet ende si sullen trecken te asemona.

5

Ende die termine sal al om gaen van asemona totter riuieren van egipten: ende hi sal worden gheeyndet an dat ouer vander groter zee.

6

Die terminen vander westziden sullen beghinnen vander groter zee: ende in dien eynde sullen si worden ghesloten

7

Mer die terminen ter noortziden sullen beghinnen vander groter zee ende comen tootten hoochsten berch:

8

ende van daer sullen si comen in emath totten terminen van sedada:

9

ende die eynden sullen gaen tot ebrona ende totter poort henan. Dit sullen die terminen wesen in die noortzide.

10

Van daer salmen die eynde slaen teghen die oost zide vander poorten henan tot sephama:

11

ende van sephama sullen die terminen neder gaen in reblatha teghen die fonteyne daphnim.

12

Van daer sullen sij comen teghen dat oost ter zee cenereth ende si sullen hem strecken totter ioerdanen ende ten achtersten sullen si ghesloten worden mitter souter zee. Dat lant suldi al om ende om bi sijnen eynden hebben.

13

Ende moyses beual den kinderen van israhel ende seide. Dit sal dat lant wesen dat ghi mitten loth besitten sult ende dat die heer heuet beuolen den neghen gheslachten ende half den gheslachte van manasses.

14

Want dat gheslachte van rubens kinderen bi haren familien ende dat gheslachte van gads kinderen na hare maechscap ende haer ghetal: ende half dat gheslachte van manasses dat sijn twe gheslachten

15

ende een half dese hebben haer deel ontfaen ouer die ioerdane ter oostziden iegen ihericho

16

Ende die heer seide tot moisen

17

Dit sijn der mannen namen die v dat lant deilen sullen.

18

Eleazar die paep ende iosue nuns sone: ende elke prince van elken gheslachte. van welken dit die mannen sijn.

19

Van

[p. *225]

iudas geslacht: caleph iephone soen

20

Van symeons gheslacht: samuhel amiuds soen.

21

Van benyamins gheslachte: helidad thaselons soen.

22

Van dans kinderen gheslachte: bocci iogli soen.

23

Van iosephs kinderen van manasses gheslachte: bannihel ephots soen

24

Van ephrayms geslachte: camuhel septhans soen

25

Van sabulons geslachte: helyzaphan pharnaths soen.

26

Van ysachars gheslachte: hertoech phalathiel ozons soen

27

Van azers geslachte: abiud salomi soen.

28

Van neptalims gheslachte: phedahel amiuds soen.

29

Dit sijn die den here beual dat si dat lant van chanaan deylen souden den kinderen van israhel