Bible in duytsche (Delftse bijbel 1477)

§ Capittel .xxxiij

1

DIt sijn die woninghen der kinder van israhel die wt egipten quamen bi haren scaren in moyses hant ende aarons:

2

die moyses screef na die steden vanden ghetelden die ouermits des heren ghebot verandert worden

3

In die eerste maent opten vijftienden dach vander eerster maent des anderen dages na phase. so tiden die kinder van israhel wech van ramasse in hogher hant daert alle die van egipten saghen:

4

die haer eerst gheboren grouen die die here verslghen hadde. Want hi hadde oec wraec ghedaen in haren goden

5

so sloghen si tenten in soccoth:

6

ende van soccoth quamen sij in etham die in dat achterste deel is vander wildernissen.

7

Si ghinghen van daer ende quamen ieghens phyayroth dat beelsephon scouwet: ende si sloghen tenten voer magdalum.

8

Ende doen si van phyairoth tiden. so ghingen si midden doer die zee inder wildernissen: ende si ghinghen drie dagen doer die woestine van etham ende sloghen tenten in mara.

9

Ende doe sij tiden van mara soe quamen si in helym daer twaelf fonteynen waren van water ende tseuentich palmen: ende daer sloghen si tenten Ende doe si van daer ghinghen: so sloghen si tenten op die rode zee.

10

Ende doe si tiden vander roder zee:

11

so slogen si tenten inder wildernisse synai:

12

ende doe si van daer ghinghen. so quamen si in deptha.

13

Ende doe sij van deptha

[p. *223]

tiden so sloghen si tenten in halus:

14

ende doe si van halus ghinghen wech. soe slogen si tenten in raphidim: daer den volc water ghebrac te drincken.

15

Ende doe si wech ghinghen van raphidim: so sloghen sij tenten inder wildernissen van synai.

16

Ende doe si wech ginghen vander wildernissen van synai. so quamen si ten grauen der begheerten:

17

ende doe si wech tiden vanden grauen der begheerten so sloghen si tenten in asseroth:

18

ende van asseroth quamen si in rethma.

19

Ende doe si van rethma tiden. soe sloghen sij tenten in remonphares:

20

ende doe si van daer ghinghen so quamen si in lebna

21

Ende van lebna soe sloghen si tenten in ressa:

22

ende doe si van ressa wech ghinghen. so quamen si in ceelatha.

23

Ende doe si van daer tiden so sloghen si tenten inden berch sepher:

24

doe si vanden berch sepher ghinghen so quamen si in arada.

25

Ende doe si van daen tiden so sloghen sij tenten in maceloth:

26

ende doe si van macheloth tiden. so quamen si in thaath.

27

Ende van thaath sloghen si tenten in thare:

28

ende doe si van daer ghinghen soe setten si tenten in metcha.

29

Ende van metcha sloghen si tenten in esmona:

30

ende doe si van esmona ghinghen so quamen sij in mosoroth.

31

Ende van mosoroth slogen si tenten in baneiachan:

32

ende doe si van baneiachan ghingen soe quamen si inden berch gadgad.

33

Ende doe si van daer tiden sloghen si tenten in iethebatha:

34

ende van iethebatha quaemen si in ebrona.

35

Ende doe si van ebrona ghinghen so sloghen si tenten in asiongaber:

36

ende doe si van daer tiden so quamen si inder wildernissen syn. Dat is cades.

37

Ende doe si van cades ghinghen so sloghen si tenten in den berch or: int vterste eynde des lands van edom.

38

Ende aaron die clam op den berch or bi des heren ghebode: ende daer starf hi inden veertichsten iaer na dat die kinder van israhel wt egipten ghegaen waren. in die wijfste maent opten eersten dach vander maent

39

doe hi out was hondert ende drie ende twintich iaer

40

Ende het hoerde die chananeus die coninc arad. die ter zuytziden woende: int lant van chanaan dat die kinder van israhel gecomen waren.

41

Ende doe si tiden vanden berch or so sloghen si tenten in salmona:

42

ende doe si van daer ghinghen so quamen si in phinon.

43

Ende doe si van phinon tiden soe sloghen si tenten in oboth:

44

ende van oboth quamen si in yeabarim dat int eynde vanden lande van moab is.

45

Ende doe si van yeabarim tiden so setten si tenten in dybongad:

46

ende doe si van daer ghinghen so sloghen si tenten in elmon deblathaim.

47

Doe si van elmon deblathaim ghinghen. so quamen si ten berghe abarim teghens nabo:

48

ende doe si tiden vande berghe abarim so leden si ouer ten campaengen van moab op die iordane teghen iericho.

49

Ende daer sloghen si tenten van bethsimon to belsathim inden slechten steden vander moabiten lande:

50

ende daer sprac die here tot moysen.

51

Beuele den kinderen van israhel: ende segt tot hem. Als gi ouer die iordane ghegaen sijt ende ghi int lant van chanaan gaen sult.

52

so verderft alle die ghene die in dat lant wonen. Breect hare calueren. ende haer beelden slaet te

[p. *224]

stucken. ende woest alle haer hoecheden:

53

ende suuert dat lant ende woent daer in. Want ic hebt v ghegeuen in possessie:

54

ende ghij sultet v luden deelen mitten lote. Den meesten hoop suldijt twijtste deel gheuen: ende den minsten dat nauste deel. Men sal elken also die erfachticheit gheuen: also dat loth vallen sal. Men sal die possessie deilen biden gheslachten ende familie

55

Mer en wilt gi niet doden die ghene die int lant wonen: die daer blijuen sullen. si sullen v wesen als naghelen in die oghen ende als speren in die zijden. ende si sullen teghen v wesen int lant uwer woninghen:

56

ende so wat ic hem hadde ghepenst te doen dat sal ik v doen