Bible in duytsche (Delftse bijbel 1477)

§ Ca .xxxi.

1

ENde die here sprac tot moysen ende seide.

2

Wreke eerst die kinder van israhel van dien van madian: ende also sulstu worden vergadert te dinen volke.

3

Ende te hant seide moyses. Wapent wt v luden mannen te gheuechte: die des heren wrake moghen verhalen van dien van madyan.

4

Ende kiese dusent man wt elken gheslachte van israhel: diemen testride sende.

5

Ende si gauenre dusent wt elken gheslachte dat was twaelf dusent bereet ten stride:

6

ende moyses sendese mit phinees eleazars des papen sone: ende hi leuerde hem die heilighe vaten ende die trompen om te trompen.

7

Ende doe si gheuochten hadden ieghens die van madyan ende sijse verwonnen hadden:

8

so sloghen si alle haer mannen doot ende hare coninghen eui ende recem. ende sur ende vr. ende rebe die vijf princen van die luden. Si slogen doot oec balaam beors sone mitten swaerde

9

ende si vinghen haer wijuen ende haer cleyne kinderen ende alt vee ende alt hauelijc guet.

10

So wat dat si mochten gecrighen dat woesten si: ende die vlamme

[p. *219]

verteerde die poorten die dorpen ende die borghen.

11

Ende si namen den roef ende al dat si gheuaen hadden beide van menschen ende van beesten:

12

ende si brochtent tot moysen ende eleazar den paep ende tot alle die menichte der kinder van israhel. Ende dat ander hauelic guet brochten si ten tenten inden campaengen van moab: neuen die iordane teghen iericho.

13

Ende moyses ende eleazar die paep ende alle die princen vander synagoghen ghinghen hem te ghemoet buyten den tenten.

14

Ende moyses wort vergramt ieghens den prince vander menichten ieghen dusent heren ende die hondert heren die vanden stride ghecomen waren

15

ende hi seide: waer om hebt ghij die wiuen ghehouden?

16

Ende en sijn si dit niet die die kinder van israhel bedroghen bi balaams rade. ende en deden si v niet ouerdaet doen. iegen den here om die sonde van phogor daer dat volc om verslegen wort?

17

Daer om dodet al dat van mans maecsel is oec die cleyne kindere. ende wiuen die mannen natuer bekent hebben die worget:

18

mer die meyskens ende alle die wiuen die maechden sijn hout tot uwer behoef:

19

ende bliuet seuen daghen buyten den tenten. Die enen mensche gedodet heeft of enighen doden ghenaect: die salmen des derden daghes ende des seuenden daghes suueren.

20

Ende van alle den roef salmen suueren weder dattet een cleet is of een vat. of soe wat ghemaket is te besighen van gheiten vellen ende van horen haire ende van houte.

21

Ende eleazar die paep sprac oec aldus totten mannen vanden heere die gheuohten hadden. Dit is dat ghebot vander wet: dat die heer moysen beuolen heeft.

22

Gout ende siluer ende coper ende yser ende tyn ende loot ende

23

al dat doer dat vuer liden mach. dat salmen mitten vuer suueren: mer so wat dattet vuer niet ghedoghen en mach. dat salmen heilighen mitten water der suueringhen:

24

ende inden seuenden daghe suldi uwe cleder dwaen. ende ghesuuert suldi binnen den tenten comen daer na.

25

Ende die here seide tot moysen.

26

Neem die somme van dien datter gheuaen is van den menschen toten beesten du ende eleazar die paep. ende die princen vanden volke:

27

ende du suls effen den roef deilen tusschen die ghene dier gheuochten hebben ende die inden strijt waren ende tusschen alle die menichte:

28

ende du suls den here een deel verscheiden vanden ghenen dier gheuochten hebben ende die inden strijt waren een ziel van vijfhondert beide van menschen ende van ossen ende van ezelen ende van scapen:

29

ende du sulstese gheuen eleazar den paep: want het sijn des heren primicien.

30

Ende van half den delen der kinder van israhel sulste nemen dat vijftihste hoeft vanden menschen ende vanden ossen ende vanden ezelen ende vanden scapen ende van allen beesten ende du sulstese gheuen den leuiten die wacker sijn inder hueden vanden tabernakel des heren.

31

Ende moyses ende eleazar deden also die here beuolen hadde.

32

Want die roef die dat heer gewonnen hadde. was van scapen ses hondert dusent ende vijf ende tseuentich dusent:

33

van ossen twe ende tseuentich dusent.

34

van

[p. *220]

ezelen een ende tsestich dusent:

35

der menschen zielen van wijfs maecsele die ghene mannen en bekenden. waren twe ende dertich dusent.

36

Ende half deel. was gegheuen den ghenen die inden striden gheweest hadden scapen drie hondert dusen seuen ende dertich dusent ende vijf hondert.

37

ende daer of waren in des heren deel gherekent ses hondert ende vijf ende tseuentich scapen:

38

ende vanden ossen ses ende dertich dusent ende twe ende tseuentich ossen:

39

ende van dertich dusent ende vijf hondert ezels. een ende tsestich ezels.

40

Ende van sestien dusent menschen zielen. so vielen in des heren deel twe ende dertich zielen.

41

Ende moyses leuerde dat getal van des heren voerdeel eleazar den pape also hem beuolen was

42

vanden haluen deel der kinder van israhel: dat hi ofghescheiden had den ghenen die in den strijt hadden gheweest.

43

Mer vanden haluen deel datter andere menichten toebehoerde dat is van drie hondert dusent seuen ende dertich dusent ende van vijf hondert scpaen.

44

ende van ses ende dertich dusent ossen.

45

ende van dertich dusent ende vijf hondert ezels.

46

ende van sesthien dusent menschen.

47

soe nam moyses dat vijftichste hoeft: ende gafse den leuiten die wacker waren in die tabernakel des heren: also die here beuolen hadde

48

Ende doe die princen vanden heere quamen tot moysen ende die tribunen ende die hondert heren. soe seiden si.

49

Wi dijn knechten hebben ghetelt dat ghetal vanden vechters die wi onder onse hant hadden: ende een en ghebreect ons niet.

50

Ende om dese sake so offeren wi in des heren ghiften dat elke van ons luden inden roef vanden goude mochten vinden perisceliden. ende armillen. ende vingherlinghen ende die rechter armhecselen ende die kettene: om dattu den here voer ons bidden suls.

51

Ende moyses ende eleazar die paep ontfinghen al dat gout in menigherhande manieren ten ghewichte vander sanctuarie vanden tribunen ende vanden hondert heren:

52

dat woech sesthien dusent ende seuen honder ende vijftich siclen.

53

Want wat dat elc inden roef ghecreech dat was sijn.

54

Ende als sijt ontfaen hadden soe leiden sijt in die tabernakel der oercondscap: in ouerdencken der kinder van israhel voer den here.