Bible in duytsche (Delftse bijbel 1477)

§ Ca .xxx.

1

MOyses vertelde. den kinderen van israhel al dat hem die here beuolen hadde:

2

ende hi sprac totten princen der gheslachten der kinder van israhel. Dit is die redene die die here beuolen heuet.

3

So wat man den here enighe belofte beloeft heuet. ende hem seluen verbint mit ede: hi en sal sijn belofte niet breken: mer hi sal al voldoen dat hi beloeft heeft

4

Ist dat een wijf die noch in haers vaders huys is in eens meyskensstaet yet belouet heeft ende haer verbonden heeft mit ede:

5

ist dat die vader die belofte weet die si ghelouet heeft. ende den eet daer si haer ziele mede ghebonden heeft ende swighet hij:

[p. *218]

soe sal hi suldich wesen der beloften. So wat si ghelouet heeft ende gesworen: dat sal hi houden ende voldoen mitten werke

6

Mer als die vader dat hoort ist dat hijt rechteuoert wederseit: soe sullen haer beloften ende haer eden te niet wesen: ende si en sal niet misdadich wesen vander beloften om dattet haer vader wederseit heeft

7

Heeft si enen man ende ghelooft si yet ende ist dat dat woert dat eens wt haren mont ghegaen is. haer ziele verbonden heuet met eede:

8

in soe wat daghe dattet haer man hoert ende en wederseit hijs niet. soe sal si sculdich wesen vander beloften ende hi sal ghelden soe wat si belouet heeft.

9

Mer ist dat hijt hoort ende rechteuoert wederseit ende hi te niet maect haer belofte: ende die woerden daer si haer ziele mede verbonden had: so sal haer god guedertieren wesen.

10

Een weduwe ende een verstekene. so wat dat si belouen dat sullen si gheuen.

11

Een wijf die in haers mans huse haer verbonden heuet mit belofte ende mit ede:

12

ist dattet haer man hoert ende swiget hi ende wederseit hi der beloften niet: so sal si gelden so wat si belooft heuet.

13

Mer wederseit hijt rechteuoert: soe en sal si niet sculdich wesen noch worden ghehouden vander beloften want haer man heeftet wederseit: ende die here sal haer guedertieren wesen.

14

Ist dat sijt beloeft heeft ende ghesworen dat sij haer ziele quellen sal mit vasten of mit deruinghe ander dinghen: dat sal in haer mans wille wesen weder sijt doen sal of niet doen en sal.

15

Alst haer man hoert ist dat hijt swighet ende draghet hi daer of sijn sentencie ouer tot des anderen dages so sal hi gelden so wat dat si belouet heeft ende verghift. want te hant als hijt hoerde so sweech hi.

16

Mer ist dat hijt wederseit als die dinc ghedaen is: soe sal hi sijn quaetheit draghen

17

Dit sijn die wetten die die here settede moysen tusschen den manne ende den wiue: tusschen die vader ende die dochter die noch is inder ioncheit eens meyskens: of die in haers vaders huys woent