Bible in duytsche (Delftse bijbel 1477)

§ Capittel .xxix.

1

DIe eerste dach vander seuender maent sal eersaem wesen ende heilich v luden. Gheen dienstelijc werc en suldi daer in doen: want het is die dach des gheluyts ende der trompen.

2

Ende ghi sult holocaust den here offeren in harden sueten roec. een calf van den vee. enen ram. ende seuen onbesmette eeniarige lammeren:

3

ende in haren sacrificien drie thiendendeel blomen die besleghen sijn mit olye telken calue: ende twe telken ramme:

4

ende een thiendendeel telken lamme dat te gader seuen lammeren sijn:

5

ende enen boc voer die sonde diemen offert voer die suueringhe des volcs: al sonder die holocauste van den calenden mit sinen sacrificien:

6

ende al sonder dat ewelike holocaust mit sinen ghewoenliken libamenten. Mit deser ghewoenten so suldi brant offeren den here in harden sueten roke.

7

Die thiende dach oec van deser seuender maent sal v luden wesen eersaem ende heilich ende ghi sult uwe zielen quellen. Geen dienstelic werc en suldi daer in doen.

8

Ende gi sult den here offeren holocaust in harden sueten rooc. een calf vanden vee. ende enen ramme. ende seuen onbesmette eeniarighe lammeren:

9

ende in haren sacrificien telken calue drie thiendendeel blomen mit olye besleghen: ende twe telken ramme:

10

ende een thiendendeel des thiendendeels telken lamme dat te gader sijn seuen lammeren:

11

ende enen boc voer die sonde: al sonder datmen pleghet te offeren voer die misdaet inder suueringhe: ende al sonder die ewelike holocaust ende haren libamenten inder sacrificien.

12

Die vijfthiende dach van deser seuender maent sal v luden eersaem ende heilich wesen: gheen dienstelijc werc en suldi daer in doen. Mer ghi sult den here vieren die solemniteit seuen daghen.

13

Ende ghi sult den here offeren holocaust in harden sueten rooc dertien calueren. twe rammen. viertien onbesmette eeniarighe lammeren:

14

ende in haren sacrificien suldi offeren telken calue. drie thiendendeel blomen beslegen mit olye dat te gader sijn dertien calueren: ende twe thiendendeel te enen ramme. dat is te gader twe rammen:

15

ende een thiendendeel des thiendendeels telken lamme. die te gader sijn viertien lammeren:

16

ende enen boc voer die sonde al sonder die ewelike holocaust. ende sijn sacrificien ende sijn libamenten.

17

Opten anderen dach sulstu offeren twaelf calueren vanden vee. twe rammen. ende viertien onbesmette eeniarighe lammeren:

18

ende elken haer sacrificien ende liba-

[p. *217]

menten ten calueren ende ten rammen ende die lammeren suldi na die castume offeren:

19

ende enen boc voer die sonde al sonder die ewelike holocaust ende sijn sacrificien ende libamenten.

20

Ten dorden daghe sulstu offeren elf calueren. twe rammen. ende viertien onbesmette eeniarighe lammeren.

21

ende du sulste na castume offeren telken sacrificien ende libamenten ten calueren ten rammen ende ten lammeren:

22

ende enen boc voer die sonde al sonder die ewelike holocaust. ende sijn sacrificien ende sijn libamenten

23

Ten vierden daghe sulstu offeren tien calueren. twe rammen. ende viertien onbesmette eeniarighe lammeren:

24

ende du suls na castume doen elken sacrificie ende libamente ten calueren ten rammen ende ten lammeren:

25

ende enen boc voer die sonde al sonder die ewelike holocaust. ende sijn sacrificien ende libamenten

26

Ten vijften daghe sulstu offeren neghen calueren. twe rammen. viertien onbesmette eeniarighe lammeren:

27

ende du suls na castume doen elken sacrificie ende libamente ten calueren ten rammen ende ten lammeren:

28

ende enen boc voer die sonde al sonder die ewelike holocaust ende sijn sacrificien ende libamenten.

29

Ten sesten daghe sulstu offeren acht calueren. twe rammen. ende viertien onbesmette eeniarighe lammeren:

30

ende du suls na castume doen elken sacrificicien ende libamenten ten calueren ten rammen ende ten lammeren:

31

ende enen boc voer die sonde al sonder die ewelike holocaust ende sijn sacrificie ende libamete.

32

Ten seuenden daghe sulstu offeren seuen calueren. twe rammen. ende viertien onbesmette eenearighe lammeren:

33

ende du suls na castume doen elken sacrificien ende libamenten ten calueren ten rammen ende ten lammeren:

34

ende enen boc voer die sonde al sonder die ewelike holocaust. ende sijn sacrificien ende libamenten.

35

Ten achsten dage die harde feestelijc is: en sult ghi gheen dienstelijc werc doen.

36

ende ghi sult offeren holocaust in harden sueten rooc den here een calf. ende enen ram. ende seuen onbesmette eeniarighe lammeren:

37

ende du suls na die castume die sacrificien ende die libamenten van elken doen ten calue ten ramme ten lammere:

38

ende enen boc voer die sonde al sonder die ewelijc holocaust ende sijn sacrificie ende sijn libamente

39

Dese dinghen suldi den here offeren in uwen solempniteiten: al sonder uwe beloften ende sonder uwe willighe hostien in holocaust. in sacrificie in libamente ende in danckeliken hostien