Bible in duytsche (Delftse bijbel 1477)

§ Ca .xxviij

1

ENde die here seide tot moysen

2

beuele den kinderen van israhel: ende du suls tot hem segghen offert te sinen tide. mijn offer hande ende mijn broden ende den brant vanden harden sueten roke.

3

Dit sijn die sacrificien die ghi offeren sult. Da-

[p. *215]

ghelijcs sul di offeren twee onbesmette eeniarighe lammeren in ewelike holocaust:

4

dat een sult di offeren des morghens. ende dat ander des auonts:

5

ende een thiendendeel van ephi blomen. die besleghen si mit harde puere olye. Die dat vierendeel hebbe van hin.

6

Het is eenpaerlijc holocauste dat ghi offerde inden berghe van synai inharden sueten roke van des heren brande.

7

Ende ghi sult van wijn scencken dat vierendeel van hin te elken lam in des heren sanctuarie.

8

Dat ander lam suldi oec des auonts offeren na alle die zede vander sanctuarien of der sacrificien van smorghens ende sijnre libamenten: in offerhande van harden sueten roke den here.

9

Ende inden saterdaghe suldi offeren twe onbesmette eeniarighe lammeren. ende twe thiendendeel blomen besleghen mit olye in sacrificie:

10

ende die libamenten diemen nader zeden scheinct elcs saterdages in ewelijc holocaust.

11

Inden kalenden dat is inden beghinselen vanden maenden soe suldi den here offeren in holocaust. twe calueren vanden vee. enen ram. ende seuen onbesmette eeniarighe lammeren:

12

ende te elken calue in sacrificie drie thiendendeel blomen besleghen mit olye: ende te elken ramme twe thiendendeel blomen besleghen mit olye

13

ende thiendendeel van een thiedendeel blomen sonder olye in sacrificie te elken lamme. Het is holocaust van herden sueten rooc ende van brande den here.

14

Ende die libamenten vanden wijn die te elken victimen te schencken zijn. sullen dit sijn. Half die mate van hin telken calue: ende dat derdendeel telken ram: ende dat vierndeel telken lam. Dat sal holcaust wesen telken maent: die die een naden anderen volge alst iaer keert.

15

Men sal oec enen boc offeren den here voer die sonden in eweliken holocaust mit sinen libamenten.

16

Ende in die eerste maent. opten viertiensten dach vander maent sal des heren phase wesen:

17

ende inden vijftiensten daghe die feeste vanden deruen broden Seuen daghen sullen si deruen broot eten:

18

die eerste dach daer of sal eersaem ende heilich wesen. Gheen dienstelic werck en suldi daer in doen.

19

Ende gi sult in brande den heer holocaust offeren twe calueren vanden vee ende enen ram. ende seuen onbesmette eeniarighe lammeren:

20

ende tot elken sine sacrificie die mit olye besleghen si: telken calue drie thiendendelen. ende twe thiendendeel den ramme.

21

ende een thiendendeel vanden thiendendeel telken lamme. dats van seuen lammeren:

22

ende een boc voer die sonde om dat men voer v suueren sal:

23

al sonder des morghens holocaust dat gi altoes offert.

24

Aldus sult ghi doen elcs daghes vanden seuen daghen. in voetsele des vyers ende in harden sueten roke den here: die opgaen sal vanden holocaust ende van elken offerhande.

25

Die seuende dach sal oec harde vierlijc wesen v luden ende heilich. Ghi en sult daer gheen dienstelijc werc in doen.

26

Die dach vanden nyewen dat is als ghi den here offert nyewe vruehten na dat die seuen weken sullen voldaen sijn: die sal eersaem sijn ende heilich. Gheen dienstelic werc

[p. *216]

en suldier in doen.

27

Ende ghi sult holocaust offeren den here in harden sueten roec. twe calueren vanden vee. ende enen ram. ende seuen onbesmette eeniarighe lammeren:

28

ende in haren sacrificien drie thiendendeel blomen beslaghen mit olye telken calue: ende telken ramme twe:

29

ende een thiendendeel des thiendendeels telken lamme dat te gader sijn seuen lammeren:

30

ende enen boc diemen dodet voer die suueringe: al sonder die ewelike holocauste ende sijn libamenten.

31

Gi sultse al onbesmet offeren mit haren libamenten