Bible in duytsche (Delftse bijbel 1477)

§ Capittel xxvij.

1

SAlphaad dochteren. ephers sone. galaads sone. machirs sone. manasses sone die iosephs sone was quamen voert. van welken dit die namen sijn. maala ende noa. ende egla. ende melcha. ende thersa:

2

ende si stonden voer moysen ende eleazar den paep ende voer alle die prin-

[p. *214]

cen vanden volc ten doren vanden tabernakel der beloften: ende seiden.

3

Onse vader is doot inder wildernissen: ende hi en was int gheruchte niet dat gheporret was ieghen den here onder chore. mer hi is doot in sine sonde. Dese en hadde geen manne te sine sonen.

4

Waer om doetmen sine name of onder sine familien: om dat hi ghenen soen en hadde? Gheuet ons possessie onder onse vaders maghen.

5

Ende moyses droech haer sake tot des heren vonnisse.

6

Ende die here seide tot hem.

7

Salphaads dochteren eysschen een gherecht dinc Geuet haer possessie onder haers vaders maghen: ende si sullen hem nauolghen in die erfachticheit.

8

Ende du sulste dit segghen totten kinderen van israhel. Als een man ghestoruen is sonder sone. so sal sijn erfachticheit gaen te sijnre dochter:

9

ende heeft hi gheen dochter: so sal hi nauolgers hebben te sine brueders.

10

Ende en heeft hi gheen brueders: so suldi die erfachticheit gheuen sijns vaders bruederen.

11

Ende en heuet hi ghene ome van des vaders weghen: soe salmen die erfachticheit gheuen die hem naest sijn. Ende dit sal den kinderen van israhel heylich wesen mit eweliker wet: alsoe die here moysen beuolen had.

12

Ende die here seide tot moysen. Gaet op desen berch van abarim: ende merke van daer dat lant dat ic gheuen sal den kinderen van israhel.

13

Ende alstu dat sulste hebben ghesien. so sulstu oec gaen tot dinen uolc also aaron dinen brueder ghing:

14

want hi uerbolgede mi inder wildernissen sin. inder wedersegghinghe der menichten: ende gi en wout mi niet heilighen voer hem ten wateren der wedersegginghe. Dit zijn die wateren der wederseginge te cades inder wildernisse sin.

15

Ende moyses antwoerde hem.

16

Die here god der gheesten van allen vleysch hi voersie van enen man die sijn mach bouen dese menichte:

17

ende die mach wtgaen ende ingaen voer hem. ende diese mach wtleiden of inleiden: soe dat des heren volc niet en si als scapen sonder herde

18

Ende die here seide tot hem Neem iosue nuns soen ene man daer gods geest in is: ende legt dijn hant op hem.

19

Ende hij sal staen voer eleazar den pape. ende voer alle die menichte: ende du sulste hem gheboden geuen daer sijt alle sien sullen.

20

ende een deel van dijnre glorien: om datten alle die synagoghe der kinder van israhel horen sal.

21

Voer desen ist dat yet te doen wesen sal: soe sal eleazar die paep den here te rade gaen. Te sinen woerde sal hij wtgaen ende ingaen. hi ende al sijn kinder mit hem: ende die ander menichte.

22

Moyses dede also die here beuolen had. Ende doe hi iosue genomen had. so sette hien voer eleazar den paep ende voer alle die verghadering vanden volc:

23

ende hi leide sijn handen op iosuees hooft. ende ouerseide al dat die here beuolen hadde