Bible in duytsche (Delftse bijbel 1477)

§ Capit .xxv.

1

TE dien tiden soe lach israhel in sethim: ende dat volc wort vernoyeert mit den dochteren van moab.

2

diese riepen te haren sacrificien. Ende si aten mit hem: ende si aenbeden hare goden.

3

Ende israhel wort gheconsacreert beelphegor. Ende die here wort gram

4

ende seide tot moysen. Neem alle die princen vanden volc: ende hangse aen galghen ieghe die sonne: dat mijn gramscap kere van israhel.

5

Ende moyses seide totten rechters van israhel. Elc slae doot sinen naesten die gheconsacreert sijn beelphegor.

6

Ende siet een man van israhel ghinc in voer sijn broeders tot enen lichten wiue van madian. daert moyses sach ende alle die scare der kinder van israhel: die weenden voer die doren der tabernaculen.

7

Doe dat phinees eleazers soon aarons des papen sone ghesien hadde. soe stont hi op van middewert der menichten: ende greep een steecswaert

8

ende ghinc inden bordeel na den man van israhel: ende doerstacse beide te gader den man ende dat wijf in hare begheernissen. Ende die plaghe cesseerde vanden kinderen van israhel:

9

ende het waren versleghen vier ende twintich dusent menschen.

10

Ende die here seide tot moysen.

11

Phinees eleazars sone die aarons des papen sone was heeft mijn gramscap ghekeert vanden kinderen van israhel: want hi wort mit minen toerne ieghens hem beruert: dat ic die kinder van israhel niet ofdoen en soude in minen toerne.

12

Hier om so spreect tot hem. Siet ic gheue hem den paeys mijnre beloften:

13

ende het sal beide hem ende sinen sade wesen die ewelike belofte des paepscaps: want hij heeft toerne ghehat voer sinen god. ende hi heeft ghesuuert die misdaet der kinderen van israhel

14

Ende des mans van israhel. die gedodet was mitten wiue van madian sinen naem was zambri sone salumi: die prince was vander maechscap ende gheslachte van symeon.

15

Ende twijf van madyan die daer mede gedodet was hete cozbi: surs dochter eens herden edelen prince van madyan.

16

Ende die here sprac tot moysen ende seide.

17

Die van madyan moeten gheuoelen. dat ghij haer vianden sijt ende slaetse:

18

want sij hebben viantlic ieghens v ghedaen. ende hebben v bedroghen mit verradenisse biden afgode phogor. ende bi chozbi des princen dochter van madyan sijn suster: die geslagen was inden daghe der plaghen om die vermeensaemheit vanden afgode phogor