Bible in duytsche (Delftse bijbel 1477)

§ Capittel .xxiij

1

ENde balaam seide tot balac. Maken wi hier seuen outaren: ende ghereide also vele calueren: ende also vele van getale rammen.

2

Ende doe hi ghedaen hadde na balaams woert: so setten si te gader opten outaer een calf ende een ramme

3

Ende balaam seide tot balac stant een luttekijn neuen dijn holocaust tot dat ic ga ende tot dat mi die here machschien yet te ghemoet comen sal: ende so wat hi mi beuelen sal dat sal ic te di spreken. Ende doe hi haestelijc wech ghegaen was:

4

so quam hem god te ghemoete Ende balaam seide tot hem. Ic heb seuen outaren ghemaket: ende heb daer bouen gheset een calf ende een ramme.

5

Ende die here settede dat woert in sinen mont. ende seide. Keert weder tot balac: ende dit sulstu spreken.

6

Ende hi keerde weder ende hi vant balac staende neuen sijn holocaust ende alle die princen vanden moabiten:

7

ende hi voernam sijn parabole ende seide. Balach die coninc vanden moabiten heeft mi ghehaelt van aran: vanden berghe van oesten. Ende hi seide coemt ende vloect iacob: haeste di ende lachtert israhel.

8

Hoe sal ic gheuloken dien god niet en heeft gheuloect? Ende mit wat redene sal icken lachteren: dien die heer niet en lachtert?

9

Ic sallen sien van den hoechsten stenen: ende vanden bergen sal icken mercken. Dat volc sal alleen wonen: ende men salt onder die heidenen niet micken.

10

Wie sal moghen ghetellen iacobs ghemul. ende bekennen dat ghetal van israhels geslachte? Mijn ziel moet steruen mitter rechtuaerdigher luden doot. ende mine achterste moeten deser lude achterste ghelijc worden.

11

Ende balac seide tot balaam. Wat ist dattu doetste? Om dattu mine vianden vermalediden soudes heb ic di gheropen. ende wederkeert so

[p. *208]

benedijtstu hem?

12

Ende balaam antwoerde hem. Mach ic yet anders spreken: dan dat mi die here beuolen heeft ?

13

Daer om seide balac. Coemt mit mi in een ander stat. daer du een deel van israhel moghes sien ende niet al en moges sien ende van daer sultuse vloken.

14

Ende doe hien tot eenre hogher stat gheleit hadde opten top vanden berch phasga. soe stichte balaam seuen outaren: ende doe hi die calueren ende die rammen daer op gheset hadde:

15

soe seide hi tot balach. Stant hier neuen uwe holocaust: tot dat ic den here te ghemoet bin ghegaen

16

Ende doe hem die here te gemoet was ghecomen: ende hi dat woert gheset hadde in sinen mont. so seide hi. Keert weder tot balac: ende dit sulstu hem spreken.

17

Ende hi keerde weder ende vanten staen neuen sijn holocaust: ende die princen vanden moabiten mit hem. Ende balac seide tot hem. Wat heeft die here gheseit?

18

Ende balaam voernam sijn parabole ende seide. Balach stant ende luyster: hoer sephors sone

19

God en is niet als een mensche dat hi lieghen mach: noch als een menschen soon dat hi verwandelen mach. Heeft hijt geseit en sal hijs dan niet doen: ende heeft hijt ghesproken en sal hijs dan niet voldoen?

20

Om te ghebenedien soe bin ic hier ghebracht: ic en mach die benedictie niet beletten.

21

Gheen afgod en is in iacob: noch men en siet gheen beelde in israhel. Die here sijn god. is mit hem ende dat trompet gheluyt vander victorie des conincx is in hem.

22

God heeften gheleit wt egipten: wes starcheit is gelijc den eenhoren.

23

Gheen waersagherie en is in iacob: noch afgodie in israhel. Te sinen tide salment iacob ende israhel segghen: wat die here gewracht heeft.

24

Siet dat volc sal opstaen als een leeuwinne: ende het sal worden opgherecht als een leeu Ende ten sal nederlegghen voer dattet den roef verslint heeft: ende voer dattet sal drincken der gheenre bluet die versleghen sijn

25

Ende balac seide tot balaam. Ende vloecse niet noch en benedijtse niet.

26

Ende balaam seide. En heb ic di niet gheseit: so wat dat mi god ghebieden soude dat ict doen soude?

27

Ende balac seide tot hem Com ende ic sal di leiden tot eenre ander stat: oft machschien gode lief sal moghen wesen dattuse van daer vlokes.

28

Ende doe hi hem gheleit had opten top des berghes phogor die ter wildernissen wert scouwet:

29

so seide hem balaam. Make mi heer seuen outaren: ende ghereide also vele calueren: ende also vele van ghetale van rammen telken outaer.

30

Balach dede also balaam gheseit hadde: ende hi sette die calueren ende die rammen op elken outaer.