Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermd1[22:2]DOe balac sephors sone sach al dat israhel den amorreen ghedaen had: | |
2[22:3]ende die van moab veruaert hadde. ende dat si israhels aenstoet niet en souden moghen ghedoghen. | |
3[22:4]soe seide hi totten meesten vanden gheslachte van madian. Dit volc sal ofdoen alle die ghene di binnen onsen lande wonen: also een coe dat cruyt of pleghet te biten totten wortelen. Want te dien tiden so was hi coninc van moab. | |
4[22:5]Hier om sende hi boden tot balaam beors sone den waersagher. die woende op die riuier van ammons kinderen lant: dat sij hem roepen souden ende segghen. Sich volc is ghecomen wt egipten dattet bouenste vanden lande ouerdect heeft ende sittet ieghens mi. | |
5[22:6]Daer om come ende vloke dit volc want het is starcker dan ic: ende of ict in enigher manieren verslaen mach ende verdriuen wt minen lande. Want ic weet dat die ghebenedijt is dien du benedies: ende vermaledijt daer du die maledictie ieghen does. | |
6[22:7]Die ouders van moab ende die meeste van geslachte van madian tiden darwaert: ende hadden die ghiften vander waersegghinghe in die handen. Ende doe sij tot balaam ghecomen waren. ende hem alle balacs woerden vertelt hadden | |
7[22:8]soe antwoerde hi. Blijft hier te nachte: ic sal v antwoerden so wat mi die here segghen sal. Ende doe si bi balaam bleuen: | |
8[22:9]soe quam die here ende seide tot hem wat willen dese luden totti? | |
9[22:10]Hi antwoerde balach sephors soon die | |
[pagina *206]
| |
coninc van moab heeftse tot mi ghesent seggende. | |
10[22:11]Sich dat volc dat wt egipten ghecomen is. heeft dat bouenste vanden lande ouerdect: com ende vloectse: of ict in enigher manieren vechtende verdriuen mach. | |
11[22:12]Ende die here seide tot balaam. En wilt mit hem niet gaen noch en vloke dat volc niet: want het is ghebenedijt. | |
12[22:13]Ende hij stont vroech op: ende seide totten princen. Gaet in v lant: want god heeft mi verboden mit v te comen. | |
13[22:14]Die princen keerden weder ende seiden tot balac. Balaam en wilde mit ons niet comen. | |
14[22:15]Ende balac sende echter veel meerre ende edelre dan hij te voren ghesent hadde. | |
15[22:16]Ende doe si tot balaam ghecomen waren. so seiden si. Dus seit balac sephors soon. En merret niet te comen tot mi | |
16[22:17]Die ghereet bin di te eeren: ende so wat du suls willen dat sal ic di geuen Com ende vermaledide dat volc | |
17[22:18]Balaam antwoerde. Al gaue mi balac sijn huys vol siluers ende gouts. ic en soude niet moghen uerwandelen des heren mijns gods woort: dat ic yet meer of min sal moghen spreken. | |
18[22:19]Ic bidde v dat ghi oeck hier blijft desen nacht: dat ic weten mach wat mi echter die here antwoerden sal. | |
19[22:20]Ende des nachts quam god tot balaam: ende seide hem. Of di dese luden sijn comen halen. so stant op ende ganc mit hem: ia nochtan dattu does dat ic di beuelen sal. | |
20[22:21]Ende balaam stont vroech op: ende hi ghereide sijn ezelinne ende tide mit hem: | |
21[22:22]ende god wort gram. Ende des heren enghel stont inden wech ieghens balaam die op die ezelinne sat: ende had twe kinderen mit hem. | |
22[22:23]Doen die ezelinne sach den enghel inden wege staende mit enen bloten swaerde: so keerde si haer vanden weghe. ende ghinc ouer dat velt. Ende doese balaam sloech ende woudse ten weghe waert brenghen | |
23[22:24]so stont die enghel in dat gat vanden twe heininghen daer die wijngaert mede omlopen was. | |
24[22:25]Ende doe die ezelinne sach den enghel soe drancse haer iegen den tune: ende wranc sinen voet die op haer sat. Ende hi sloechse weder: | |
25[22:26]ende die enghel ghinc ouer ter nauster stat ende stont teghen haer daer. soe dat si niet en mocht ofgaen ter rechter hant noch ter luchter hant. | |
26[22:27]Ende doe die ezelinnne den enghel sach staende: soe viel si onder sijn voeten dier op sat. Ende hi wort veel grammer. ende sloech haer ziden mit enen stocke. | |
27[22:28]Ende die here ondede der ezelinnen mont: ende si sprac. Wat heb ic dij misdaen? Waer omme slaestu mi sich nv derde werf? | |
28[22:29]Balaam antwoerde. Om dattu des verdient hebste: ende mi bespot. Vergaue god dat ic een swaert had dat ic di dootslaen mochte. | |
29[22:30]Ende die ezelinne seide. En bin ic dijn beeste niet. daer du altoes op plaghes te sitten: tot in desen daghe? Segt wat dede ic di ye des ghelijcs. Ende hi seide nye. | |
30[22:31]Ende haestelic ondede die here balaams oghen: ende hi sach den enghel inden wech staen hebbende in die hant een bloot zwaert: ende hi aenbede hem langhes op die aerde. | |
31[22:32]Ende die enghel seide hem. Waer om sloechstu derde | |
[pagina *207]
| |
werf dijn ezelinne? Ic bin ghecomen om di ieghen te sijn: want dijn wech is verkeert. ende iegen mi. | |
32[22:33]Ende en hadde haer die ezelinne vanden weghe niet ghekeert ende mi niet stat gegeuen diese wederstont: ic soude di gedoot hebben ende si soude leuen | |
33[22:34]Ende balaam seide Ic heb gesondicht want ic en wiste niet dattu iegen mi stondes. Ende ist di leet dat icker gae. soe sal ic wederkeren. | |
34[22:35]Die enghel seide. Ganc mit desen: ende wachte di dattu anders niet en sprekes dan ic di beuelen sal. Dus ghinc hi mitten princen. | |
35[22:36]Doe balac hoerde dat balaam quam: so ghinc hi wt hem te ghemoet in een poort van moab die int achterste eynde van arnon gesticht was. | |
36[22:37]Ende hi seide tot balaam. Ic sende boden om di te ropen. Waer om en quaemstu niet te hant tot mi? Of en mach ic den loon dijnre consten niet gheuen? | |
37[22:38]Ende hi antwoerde hem. Sich ic bin hier. Mach ic anders iet spreken sonder dat god settet in minen mont? | |
38[22:39]Dus voeren si te gader: ende quamen in die poorte die int achterste eynde van sinen lande was. | |
39[22:40]Ende doe balac scapen ende ossen hadde gedodet: so sende hi tot balaam ende totten princen die mit hem waren ghiften. | |
40[22:41]Ende doet smorghens gheworden was. soe leide hi hem totten hoechsten van baal: ende hi sach dat achterste deel vanden volke. |
|