Bible in duytsche (Delftse bijbel 1477)

§ Capit .xxi.

1

DOe dit chananeus die coninc van arad had ghehoert. die ten suyden woende: als dat israhel ghecomen was biden weghe der spiers. so vacht hi ieghen hem: ende hi verwan. ende voerde enen roef van hem.

2

Ende israhel verbant hem mit beloften anden here ende seide. Ist dattu dit volc in minen hande leuers: soe sal ic sijn poorten of doen

3

Ende die here hoerde israhels bedinghen. ende leuerde hem die chananeen ende hi dodese: ende hi warp sijn poorten auerecht: ende hi hete die naem van dier

[p. *204]

stat orma. dat is vermeensaemheit

4

Ende si tiden vanden berch or. alle den wech die ter roder zee waert leidet: om dat si dat lant van edom omgaensouden. Ende den volc begonste te verdrieten des weges ende der pijnen:

5

ende si spraken iegens den heer ende moysen. ende seyden Waer om leitstu ons wt egipten: om dat wi steruen souden inder wildernilsen? Broot ghebrect ons: ende wi en hebben gheen water: onse ziele walget te hants op dese lichte spise.

6

Om dese sake soe sende die here int volc vuerighe serpente. ende om die wonden van desen serpenten ende om die doot veelre luden.

7

so quamen si tot moysen ende seiden. Wi hebben ghesondicht: om dat wi ghesproken hebben ieghen den here ende ieghens di. Bidde dat hi dese serpenten van ons wech doe. Moyses bat voer dat volc.

8

Ende die here sprac tot hem. Maec di enen metalen serpent ende setse tot enen teiken. Die ghesteken is ende dat aensiet hi sal leuen.

9

Dus maecte moysens enen metalen serpente ende settese tot enen teiken. Ende alst aensaghen die ghesteken waren: so worden si ghenesen.

10

Ende die kinder van israhel toghen wech voert: ende sloghen tenten in oboth.

11

Ende si ghinghen van daer ende si setten tenten in ieabarim in der wildernissen die moab scouwet teghen die oestzide:

12

ende van daen porreden si ende quamen ter vloet zareth.

13

Ende si lietense ende sloghen tenten ieghen arnon. dat inder wildernissen is: ende strecket haer inden eynde van amorreen Want arnon is die termijn van moab ende sceydet die van moab ende van armorreen.

14

Ende daer bi seitmen inden booc van des heren stride. Also hi dede in die rode zee: also sal hi doen inden vloeden van arnon.

15

Die ouerhanghende roetsen vanden vloeden daelden neder om dat si rusten souden in arnon: ende dat si souden werscappen int eynde van moab.

16

Van dier stat openbaerde die put: daer die here moyses of sprac. Vergadere dat volc: ende ic sal hem water gheuen.

17

Doe sang israhel dit liet Si songhen die put come op:

18

die put dien die princen grouen: ende die leitsmannen ghereiden der menichten. inden gheuer der wet ende in haren stocken. Ende si tiden voert vander wildernissen in mathana

19

van mathana in nahalihel. Van nahalihel in bamoth

20

Bamoth is een valeye in moabs lant. inden tob van phasga dat scouwet ieghens die wildernisse

21

Ende israhel sende boden tot seon den coninc van amorreen ende seide.

22

Ic bidde dat ic doer dijn lant liden mach. Wi en sullen niet afkeren inden ackers noch inden wijngaerden: wi en sullen dat water niet drincken vten putten. Wi sullen den conincliken wech gaen: tot dat wi doer dijnen landen leden sijn.

23

Ende hi en wilde niet oerlouen dat israhel doer sijn lant liden soude: mer lieuer so vergaderde hi een heer ende ghinc wt ieghens hem inder wildernissen ende hi quam in iasa: ende vacht ieghen israhel.

24

Ende hi wort van israhel versleghen in des sweerts mont: ende men besat sijn lant van arnon tot ioboc. ende ammons kinderen lant was beset mit starcke

[p. *205]

bolwercken.

25

Dus nam israhel al seons steden: ende hi woende in der amorreen poorten: dit was in esebon ende in haren dorpen.

26

Die poorte esebon was seons des conincs van amorreen. die ieghen den coninc moab gheuochten hadde: ende nam hem al dat lant sijns rijcs dat was tot arnon.

27

Hier om seitmen in bispele. Coemt in esebon: datmense stichte ende datmen seons stede make.

28

Een vyer quam wt esebon. een vlamme wt seons poorte: ende verteerde die moabiten. arnon ende die oefenaers vanden hoechsten in arnon.

29

Wee dij moab: chamos volc du biste veruaren. Si gaf haer sonen in vlucht: ende haer dochteren in gheuangenisse den coninc seon vanden amorreen.

30

Haer iock is veruaren van esebon tot dybon: si quamen moede tot in iophe ende tot in medaba.

31

Ende dus woende israhel in amorreen lant.

32

Ende moyses sende spiers die iazer bespien souden: wies dorpen si wonnen: ende besaten die ghene die daer in woenden

33

Ende si keerden hem ende ghinghen weder op alle den wech te basan wert: ende og die coninc van basan quam ieghen hem mit alle sijn volc om te vechten in edray.

34

Ende die here seide tot moysen. En ontsieten niet: want ic hebben gheleuert in dijn hant ende alle sijn volc ende alle sijn lant: ende du sulste hem doen also du hebste ghedaen seon den coninc van amorreen die woende in esebon.

35

Ende israhel versloech desen oec mit sinen sonen. ende al sijn volc tot dattet al doot was ende si besaten sijn lant

36[22:1]

Si tiden voert ende sloghen tenten inden campaengen van moab: daer ouer die iordane iericho staet