Bible in duytsche (Delftse bijbel 1477)

§ Cayittel .xx.

1

ENde die kinder van israhel ende alle die menichte quamen in die eerste maent in die wildernisse van sin: ende dat volc bleef in cades Ende maria starf daer: ende si is begrauen in die selue stat

2

Ende doe den volc water ghebrac so quamen si ieghen moysen ende aaron:

3

ende sij verkeerden die perlementen ende seiden. Vergaue god dat wi voer den here verdoruen waren onder onse bruederen.

4

Waer om hebdi des heren menichte wtgeleit inder wildernissen: dat wi ende onse beesten steruen sullen?

5

Waer om dedi ons opcomen wt egipten. ende hebt ons geleit in dese alte quaden stat diemen niet saeyen en mach. die oec gheen vigheboem en groeyt. noch wijngaert noch appel garnaten: ende bouen dit en heeft se gheen water om te drincken?

6

Ende moyses ende aaron lieten alle die menichte ende ghinghen in die tabernakel der beloften. ende vielen langhes op die aerde: ende si riepen aenden here ende seiden Here god hoer des volcs roepen: ende ondoet hem dijn tresoer die fonteyn vanden leuende water: dat haer murmuracie stillen moet als si ghesadet sijn. Ende des heren glorie openbaerde bouen hem.

7

Ende die here sprac tot moysen ende seide.

8

Neem die ruede ende vergader dat volc du ende aaron dinen brueder: ende spreec den steen toe voer hem luden: ende hi sal water gheuen. Ende alstu sulste hebben doen comen water vten stene: so sal alle die menichte drincken ende alle haer beesten.

9

Dus nam moyses die ruede die in des heren aensconwen was also hi hem beuolen hadde.

10

daer die menichte vergadert was voer den stene: ende hi seide hem. Hoert ghi rebelle ende ghi onghelouighe. Sullen wi moghen wt desen stene water doen comen?

11

Ende doe moyses die hant opghegeuen hadde ende den steen mitten ruede twewerf gheslaghen hadde. soe quammer alte oueruloedelijc grote water wt: alsoe dattet volc dranc ende die beesten

12

Ende die here seide tot moysen ende aaron. Om dat ghi mi niet en ghelouet dat ghi mi gheheilicht had voer den kinderen van israhel: daer om en suldi dat volc niet leiden int lant dat ic hem gheuen sal.

13

Dit is dat water der wedersegghinghe. daer die kinder van israhel schelden ieghens den here: ende hi wort in hem geheilicht.

14

Hier en binnen sende moyses van cades borne totten coninc

[p. *203]

van edom boden. die segghen souden Dit ontbiet dijn broeder israhel. Du wetes alle die pine die ons begrepen heuet.

15

hoe onse vaderen nederghingen in egipten. ende hoe wij daer ghewoent hebben veel tijts: ende hoe ons die van egipten quelleden ende onse vaders:

16

ende hoe wi anden here riepen ende hi heuet ons ghehoert. ende hoe hi sinen enghel heeft ghesent ende heeft ons geleit wt egiten. Siet wij legghen in die poorte cades die in dat achterste eynde is in dinen lande:

17

ende wi bidden dat wi moghen liden doer dijn lant. Wi en sullen niet gaen doer ackers noch doer wijngaerden: noch wij en sullen gheen watere drincken van dijnen putten mer wi sullen gaen den openbaren wech ende niet daer of keren ter rechter hant noch ter luchter hant voer dat wi leden sullen wesen doer dinen terminen.

18

Edom antwoerde hem. Ghi en sult doer mijn lant niet liden. Of anders sal ic teghens di ghewapent comen.

19

Ende die kinder van israhel seiden. Wi sullen al den ghetreden wech gaen: ende drincken wi ende onse beesten dijn water: so sullen wi gheuen dat recht is. Gheen pijnlicheit en sal inden prise wesen: in dien dat wij alleen haestelijc daer moghen ouerliden

20

Ende hi antwoerde Ghi en sulter niet ouerliden. Ende te hant voer hi wt iegen hem mit eenre ontelliker menichten ende mit starcker hant:

21

ende hi en wilde niet ghehoren den ghenen die hem bat: dat hi hem oerlouen wilde te liden doer sijn lant Ende om dese sake so keerde hem israhel van hem.

22

Ende doe si die tenten gheruert hadden van cades: so quamen si ten berghe or die int eynde vanden lande edom is:

23

ende daer sprac die here tot moysen segghende.

24

Aaron sal varen te sinen volke. Want hi en sal niet int lant gaen dat ic den kinderen van israhel ghegheuen heb: om dat hi onghelouich was minen monde ten wateren der wedersegghinghe.

25

Neem aaron ende sijn sonen mit hem: ende du sulstese leiden opten berch or.

26

Ende alstu den vader ontcleet hebste van sijnen clede. soe sulstu daer mede cleden eleazar sinen soon ende aaron sal worden vergadert. ende steruen daer.

27

Ende moyses dede also die here beuolen had: ende si ghinghen opten berch or voer alle die menichte.

28

Ende doe moyses ontcleet hadde aaron sine clederen soe clede hi daer mede eleazar sinen soon.

29

Ende als aaron ghestoruen was opten top vanden berch: so quam moyses neder mit eleazar

30

Ende doe alle die menichte sach dat aaron doot was: soe weenden si ouer hem dertich dagen al haer familien doer.