Bible in duytsche (Delftse bijbel 1477)

§ Ca .xix.

1

DIe here sprac tot moysen ende aaron ende seide.

2

Dit is die wet der victimen die die here gheset heeft. Beuele den kinderen van israhel. dat si tot di brengen een rode coe van volre outheit daer gheen smet an en si. ende die gheen ioc ghedraghen en heeft:

3

ende ghi sultse leueren eleazar den paep. Ende hi salse leiden buyten den tenten. ende dodense in haer alre aenscouwen:

4

ende hi sal sijn vingher netten in haer bloet. ende hi sal der mede besprenghen seuen weruen teghen die dore vanden tabernakel.

5

ende salt verbernen daer sijt alle sien sullen: ende hi sal den vyer leueren haer vleysche ende haer bloet ende haer mischse.

6

ende die paep sal werpen in die vlamme die die coe verteert cedrinen hout ende ysope ende enen roden draet tweeweruen ghever wet.

7

Ende dan sal hij echter dwaen sijn cleder ende sijn lichaem. ende gaen inden tenten: ende hi sal besmet wesen totten auonde.

8

Mer die ghene diese sal hebben verbrant die sal wasschen sijn cleder ende lichaem: ende sal onreyn wesen totten auonde.

9

Ende een suuer man sal vergaderen die asschen vander coe. ende hi salse stortten buyten den tenten in een harde suuer stat: om dat si die menichte der kinderen van israhel sullen sijn in hoede ende in spreng water: want die coe is voer die sonde ghebrant.

10

Ende als die ghene die der coe asschen ghedragen heeft: sijn cleder ghedwoghen heeft soe sal hij onsuuer sijn totten auonde. Dit sullen die kinder van israhel ende die toecomelinghen die onder hem wonen hebben mit eweliken rechte voer heilich.

11

Die eens menschen corre ghenaket heeft ende daer om onsuuer is seuen daghen:

12

men sallen besprenghen mit desen water opten derden dach ende op den seuenden dach: ende also sal hi ghesuuert worden. Ist dat hi opten derden dach niet besprenghet en is: so en mach hi niet worden ghesuuert ten seuenden daghe.

13

So wie van menscheliken zielen sal ghenaken den doden. ende niet besprenget en wort mit deser gemenghelheit. hi sal des heren tabernakel besmetten: ende hi sal veruaren wt israhel. Om dat hi niet besprenghet en was mitten water der suueringhe so sal hi onsuuer wesen: ende sijn onreynicheit sal op hem bliuen

14

Dit is eens menschen wet die sterft in die tabernakel. Alle die in sijn tenten comen. ende al datter binnen is. sullen onsuuer wesen seuen daghen.

15

Ende tvat dat gheen ouerdecsel en heeft noch bant bouen dat sal onsuuer wesen.

16

So wie inder ackeren naken sal eens menschen corre die doot ghesleghen is. of bi hem seluen doot. of sinen mont of sinen graue: hi sal seuen daghen onsuuer wesen.

17

Si sullen nemen vander asschen der verbarninge ende der sonden. ende si sullen daer bouen ghieten leuende water in een vat:

18

ende daer in sal een suuer mensche ysope netten. ende daer mede sal hi besprenghen alle die tente ende den huysraet al. ende die menschen die mit deser onsuuerheit besmet sijn:

19

ende in deser manieren sal een

[p. *202]

suuer. den onsuueren versuuren des derden daghes ende des seuenden daghes. ende dier ghesuuert wort hij sal opten seuenden dach hem ende sine clederen dwaen: ende hi sal onsuuer sijn totten auont.

20

Soe wie dat in deser manieren niet en sal worden ghesuuert. sijn siel sal veruaren van midden der vergaderinghe: want hi heeft des heren sanctuarie besmet: ende hi is en niet besprenghet mitten water der suueringhe.

21

Dit sal v ewich wettelijc wesen. Hi oec diet water sprenghet. sal sijn cleder dwaen. Al die naket die wateren der suueringhe: hi sal onsuuer wesen totten auont.

22

Soe wat een onsuuer mensche genaect. dat sal hi onsuuer maken: ende een ziel die dustanich yet ghenaect si sal onsuuer wesen totten auont.