Bible in duytsche (Delftse bijbel 1477)

§ Ca .xviij.

1

TOt aaron seide die here. Du ende dijn sonen ende dijns vaders huis mitti ghi sult draghen die quaetheit vander sanctuarie: ende du ende dijn sonen ghi sult te gader doghen die sonden uwes paepscaps

2

Mer du sulste mitti nemen dijn broederen leuijs kindren ende dat heerscap van dijns vaders huys ende si sullen ghereet sijn dat si di dienen Mer du ende dijn sonen ghi sult dienen in die tabernakel der oercondscap.

3

Ende die leuiten sullen wacker wesen in dinen gheboden. ende te allen werke vanden tabernakel: also nochtan dat si niet toe en gaen ten heilighen vaten noch ten outaer dat si oec niet en steruen: ende dat gi oec daer mede verderft.

4

Mer si sullen mitti wesen ende si sullen wacker wesen in hoeden vanden tabernakel: ende in allen sijnen oefeninghen Gheen vreemde en sal mit v worden ghemenghet.

5

Weset wacker inder sanctuarien huede. ende ten dienste vanden outaer: dat opten kinderen van israhel ghene onwaerdicheit en valle.

6

Ic heb v ghegheuen uwe broederen die leuiten van midden der kinder van israhel: ende ic hebse te ghiften den here gheleuert. om dat si dienen sullen inden dienste sijns tabernakels.

7

Mer du ende dine sonen wachtet uwe paepscap: ende al datter oefeninghe van den outaer behoert. ende dat binnen der gordinen is. sal biden paep worden ghedient. So wie vreemdes daer toe gaen sal men sallen doden.

8

Ende die here seide tot aaron. Sich ic heb di ghegheuen die huede van minen primicien. Alle dinc dat ghehelicht wort. vanden kinderen van israhel heb ic di gheleuert ende dinen sonen. ewelijc voer den papen dienst.

9

Daer om sulstu dit ontfaen van dien die gheheilicht worden ende den here sijn gheoffert. Alle offerhande ende sacrificie. ende watmen mi gheuet voer die sonde ende die misdaet. ende dat valt in heilich der heilighen. dat sal dijn wesen ende dijnre sonen.

10

Inder sanctuarien suldi dat eten. Die mannen sullenre alleen of eten: want het is den heere geconsacreet.

11

Mer die primicien die die kinder van israhel belouen ende offeren: die heb ic di ghegheuen ende dijnen sonen ende dijnen dochteren mit eweliken rechte. Die suuer wesen sal in dijn huys. die salre of eten.

12

Ic heb di ghegheuen alle dat morch van oli ende van wijn ende van tarwe. soe wat van primicien dat die kinder van israhel den here offeren hebbe ic di ghegheuen.

13

Alle die primicien van vruchten dien die aerde groeyt ende die men den here brenct: sulsen vallen

[p. *200]

te dijnre behoef. Die suuver is in dijn huus. sal daer of eten.

14

Alle dat die kinder van israhel van beloften sullen gheuen: dat sal dijn wesen.

15

Ende so wat dat eerst comen sal vter vroulicheit van alrehande vleysch dat die kinder van israhel offeren den here. beide van menschen ende van quicke. dat sal dijns rechts wesen: also nochtan dattu eens menschen eerst gheboren sulstu ghelt voer nemen: ende alrehande beeste die onsuuer is sulstu doen verlossen:

16

ende dat verlossen daer of sal wesen na een maent: mit vijf siclen siluers na dat ghewichte vander sanctuarie. Ende siclus heuet twintich hellinghen.

17

Mer dat eerst gheboren vander coe of vander scape of vander gheyten en sulstu niet doen verlossen: want si sijn den here gheheilicht Allene sulstu haer bloet stortten opten outaer: ende dat vette sulstu verbranden inden harden sueten roke den here.

18

Mer dat vleysch sal te dijnre behoef vallen: also sullen dijn wesen die borst der consecracien ende die rechter scouder.

19

Al die primicien vander sanctuarien die die kinder van israhel den here offeren: heb ic dij ende dinen sonen ende dinen dochteren gegheuen met eweliken rechte. Ende is ewelike belofte des souts voer den here di ende dinen sonen.

20

Ende di here seide tot aaron. In haren lande en suldi niet besitten: ende ghi en sult onder hem luden gheen deel hebben. Ic sal wesen v deel ende uwe erfachticheit in midden der kinder van israhel.

21

Mer leuijs sonen heb ic ghegheuen alle israhels thienden in possessien. om den dienst daer si mi mede dienen in die tabernakel der beloften:

22

op dat die kinderen van israhel niet vorder en gaen tot den tabernakel ende dat si ghene dootsonde en doen.

23

Want leuijs sonen allene sullen mij dienen in die tabernakel ende draghen des volcs sonden. Dit sal ewelijc wettich wesen in uwen gheslachten. Ende si en sullen niet anders besitten

24

ende hem laten ghenoghen mitter offerhande vanden thienden: die ic verscheiden heb te haerre behoef ende te haerre noot

25

Ende die here sprac tot moysen ende seide

26

Beuele den leuiten ende segt hem. Als gi ontfaen hebt vanden kinderen van israhel die thienden die ic v ghegeuen heb: soe offert daer of die primicien den here. dat is dat thiendendeel vander thienden:

27

dattet v worde gherekent voer offerhande der primicien: beide van droschvloeren ende van wijnpersen

28

ende van allen dien dat ghi ontfaen sult offert den here die primicien: ende gheeftse aaron den pape.

29

Alle dat ghi offert in des heren ghiften vanden thienden dat verscheit: ende het sal dat alre beste wesen ende wtghecoren.

30

Ende du suls tot hem segghen. Ist dat ghi die voerbarichste ende alle dat best offert vanden thienden. so salment v rekenen als of gi gaeft die primicien vanden dorschvloeren ende vanden wijnperssen:

31

ende ghi sultse eten in allen uwen steden. beide ghi ende uwe ghesinne mede: want het is den loen voerden dienst die gi dient in die tabernakel der beloften:

32

ende gi en sult daer op niet sondighen. die voerbarichste ende die vetste suldi tot uwes selfs

[p. *201]

behoef houden: dat ghi niet en besmet der kinder van israhels offerhande. ende dat ghi dan sterft.