Bible in duytsche (Delftse bijbel 1477)

§ Ca .xvi

1

CHore ysaars soen die caaths soen was. leuijs soen. ende dathan. ende abiron elyabs sonen. ende hon pheleths soen van rubens sonen

2

stonden op teghen moysen: ende ander kinder van israhel oec twee hondert ende een half voerbarigher mannen vander synagogen. ende diemen bi namen riep inden tide vanden rade.

3

ende doe si stonden ieghen moysen ende aaron so seiden si. Laet v ghenogen want alle die menichte der heilighen is. ende die here is in hem luden. Waer omme wardi verheuen bouen des heren volc?

4

Doe dit moyses hoerde soe viel hi langhes op sijn aensichte:

5

ende hi sprac tot chore. ende tot alle der menichte. ende seide. morghen salt die here kenlijc maken wie tot hem behoren: ende die heiligen sal hi te hem waert halen: ende die hij kiesen sal si sullen hem naken.

6

Hier om doet dit. Elc neme sijn wieroecvat du chore ende alle dijn raet:

7

ende morghen sceppet vuer ende legt daer thimiama bouen voerden here: ende soe wye hi kiesen sal. hi sal heilich wesen. Leuijs sonen ghi verheffet v seer.

8

Ende hi seide echter tot chore. Hoert leuijs sonen.

9

Is dat v een cleyn dinc dat v god van israhel van alle den volc heeft gesceiden. ende heeft v te hem geuoghet dat ghi hem dienen soudt inder oeffeninghe vander tabernakel: ende dat ghij staen soudt voer al dat volc ende soudt hem dienen?

10

So dede hi di tot hem comen ende alle dine bruederen leuijs sonen: om dat gi v oec antrecken soudt die paepscap:

11

ende al dijn hoop staen soude tegen den here? Want wat is aaron dat gij teghens hem murmureert?

12

Hier om sende moyses om te ropen dathan ende abiron eliabs sonen. Ende antwoerden Wij en comenre niet.

13

Ist v een cleyn dinc dattu ons gheleit hebste vten lande van egipten dat melc ende honich vloeyde om datttu ons doden soutste inder wildernissen: ten si dattu oec heerscappie hebs bouen ons?

14

Waerlic hebste ons gheleit int lant dat vloeyt riuieren van melc ende van honich: ende du hebste ons gegeuen possessien van ackers ende van wijngaerden? wilstu oec onse oghen wt steken? wi en comere niet.

15

Ende moyses wort harde gram: ende seide totten here. En aenscouwe haer sacrificie niet. Du wetes dat ic nye een ezel van hem en nam: ende dat ic nye

[p. *197]

niemant van hem luden en heb gemoeyt

16

Ende hi seide tot chore. Du ende alle dine vergaderinghe staet besiden voer den here morghen: ende aaron oec versceiden.

17

Neemt elc uwe wieroecs vaten. ende legter wieroec bouen ende offert den here. twe hondert ende vijftich wieroexuaten: ende aaron sal oec sijn wieroexuat houden.

18

Doe si dat ghedaen hadden aldaer moyses ende aaron stonden.

19

ende si teghen hem hadden vergaert alle die menichte ter doren vanden tabernakel: so openbaerde hem allen. des heren glorie.

20

Ende die here sprac tot moysen ende aaron ende seide.

21

Verscheit v van midden deser vergaderinge: dat icse haestelic mach verderuen.

22

Ende sij vielen langhes op haer aensichte: ende seiden. Alre starcste god der gheesten van allen vleysche: als een sondicht. sal dan dijn gramscap ieghen hem allen vallen?

23

Ende die here seide tot moysen.

24

Beuele alle den volc dat si hem versceiden van chore ende van dathan ende abirons tenten.

25

Ende moyses stont op ende ginc wech tot dathan ende abiron: ende daer hem die ouste van israhel volgheden

26

soe seide hi totter scaren. Gaet wech vander quader menschen tenten: ende en wilt hem neit ghenaken dat hem toebehoert: dat gi in haren sonden niet en wort gheuonden.

27

Ende doe si van haren tenten al om ende om wech gegaen waren: soe quamen dathan ende abiron wt ende stonden inden inganc van haren tenten. mit wiuen ende mit kinderen: ende mit alle haer gesinne.

28

Ende moyses seide. Hier in suldi weten dat mi die here ghesent heeft. dat ic doen soude al dat ghi siet: ende dat ic wt mijnre propere herten niet en doe

29

Ist dat dese verderuen mitter menschen doot diese pleget te doden. ende visiteertse die here mitter plaghen daer die ander mede plegen te worden geuisiteert: soe en heeft mi die here niet ghesent.

30

Mer doet die here een nyeu dinc soe dat die aerde haer mont ondoet ende verslintse ende al dat hem toebehoert. ende dalen si in die helle nederwaert leuende: so suldi weten dat si den here hebben gheblasfemeert.

31

Ende soe haest doen hi ophielt te spreken soe wort die aerde ghescoert onder haer voeten:

32

ende si ondede haren mont ende verslantse mit haren tenten. ende mit alle haren guede.

33

Ende si daelden neder in die helle leuende ouerdect mitter aerden: ende si veruoeren van midden der menichten

34

Ende alle die van israhel die al om stonden vloen opten roep der gheenre die verdoruen ende seiden. Dat ons die aerde niet en verswelghe.

35

Mer oec quam vyer wt vanden here ende dode die twe hondert ende vijftich mannen die den wieroec offerden