Bible in duytsche (Delftse bijbel 1477)

§ Capittel .xv.

1

DIe here sprac tot moysen ende seide.

2

Spreect totten kinderen van israhel: ende du suls tot hem segghen Als ghi comen sult int lant uwer woninghen dat ic v gheuen sal.

3

ende gi den here offerhande doen sult in holocauste. of victime van danckelicheden ende ghi uwe beloften ghelt. of al willens offert ghiften. of als gi in uwen solempniteiten verbranden sult den here roke der sueticheit: soe suldi offeren van ossen of van scapen soe wie dat victime offeren sal:

4

hi sal gheuen telken lam ende telken ram sacrificie van bloem een thienden deel van ephi die besleghen sullen wesen mit olye. die in maten sal hebben een vierendeel van hin:

5

ende hi sal wijn gheuen vander seluer maten om die versche offerhande te schencken mede inden holocauste of in victime.

6

Ende hi sal offeren enen ram in roke der sue-

[p. *195]

ticheit den here. sacrificie van tween thiendendeel blomen. die besleghen sullen wesen mit oly een derdendeel van hin

7

ende wijn te libamente een derdendeel van der seluer maten.

8

Mer alstu van ossen holocaust doen sulste of hostie om die belofte te doen. of danckelike victimen:

9

so sulstu telken osse gheuen drie thiendendele blomen besleghen mit olye. die hebbe half die maet hin:

10

ende wijn om die versche offerhande te schenken vander seluer maten in offerhande van harden sueten roke den here.

11

Dus sult ghi doen telken osse ende ram ende lam

12

ende telken hueke.

13

Beide ingheboren ende vreemde

14

die sullen die sacrificie offeren na eenre zeden.

15

Een ghebot sal wesen ende een vonnisse beide v ende den toecomelinghen vanden lande.

16

Ende die here sprac tot moysen ende seide.

17

Spreect totten kinderen van israhel: ende du sulste tot hem segghen.

18

Als ghi comen sult int lant dat ic v gheuen sal.

19

ende gi eten sult vanden broden van dien lande: so suldi van uwen spisen versceiden die primicien den here.

20

Ghelijc dat gi vanden dorschvloeren den here die primicien sult verscheiden:

21

also suldi van uwen voetsele spise die eerste den here geuen

22

Ist dat gi van rokeloesheden yet ouerlijt van dien die die here ghesproken heeft tot moysen.

23

van dien daghe dat hi begonste te ghebieden ende voertmeer.

24

ende die menichte dat vergheet te doen: so sal hi offeren een calf vanden vee te holocauste in harden soeten roec den here. ende sijn sacrificien ende die libamenten also die oeffeningen eysschen. ende enen bock voer die sonde:

25

ende die paep sal voer al die menichte der kinder van israhel bidden ende het sal hem worden verlaten. want si en sondigen al willens niet: want in dien dat si offeren brant den here voer hem ende voer haer sonden ende haer dolinghe.

26

so salt alle den volc der kinder van israhel verlaten worden. ende den toecomelinghen die vreemde sijn onder v: want het is al des volcs misdaet bi rokeloesheden.

27

Ist dat een ziele onwetende ghesondicht heuet: soe sal sij voer haer sonde offeren een eeniarich geyt:

28

ende die pape sal voer haer bidden dat sij sonder weten gesondicht heeft voer den here. ende hi sal haer ghenade beiaghen. ende het sal haer worden verlaten.

29

Beide ingheboren ende toecomelinghen. sal een wet wesen die onwetende ghesondicht hebben.

30

Mer een ziele die bi houaerde yet ghedaen heeft. weder dattet een poorter is of een vreemde. om dat hi teghen den here rebelle was: soe sal hi veruaren van sinen volc.

31

Want hi versmade des heren woert. ende hij maecte sijn ghebot te niet: hier om sal men ofdoen: ende hi sal sijn sonden draghen.

32

Het ghesciede doe die kinder van israhel waren inder wildernissen. dat si vonden enen man hout rapende inden saterdaghe:

33

ende si brochten moysen ende aaron ende alle der menichten.

34

Ende si besloten hem in enen karker: om dat si niet en wisten wat si hem doen souden.

35

Ende die here seide tot moysen. Dese man sal den doot steruen: alle die menihte bewerpen mit stenen buten den

[p. *196]

tenten.

36

Ende doe si hem buten wt gheleedt hadden so beworpen si hem mit stenen: ende hi is doot also die here geboden hadde.

37

Ende die here seide tot moysen.

38

Spreect totten kinderen van israhel: ende du suls tot hem segghen. dat si maken frangien ten vier hornekens van haren mantels. ende dat sij daer in doen blaeuwe snoeren.

39

Ende als si die sien sullen. so sullen si ouerdencken alle des heren gheboden. ende si en sullen haer ghepeinse niet volgen noch haer oghen te menigherhande dingen wert vernoyerende:

40

mer sij sullen te mere des heren gheboden ouerdincken ende doense: ende si sullen haer gode heilich wesen.

41

Ic bin die here v god. die v vten lande van egipten gheleit heb om dat ic v god wesen soude