Bible in duytsche (Delftse bijbel 1477)

§ Capit .xiiij.

1

HIer om riep alle die menichte ende weende alle die nachte:

2

ende murmureerden ieghen moysen ende aaron ende alle die kinder van israhel seiden. Vergaue god dat wi doot waren in egipten: ende niet in deser woester wildernissen. Vergaue god dat wij verderfden:

3

dat ons die here niet en leide in dat lant. dat wi niet en vallen mitten swaerde: ende dat onse wiuen ende onse kinderen niet en worden geleidet gheuanghen. En ist niet beter dat wi wederkeren in egipten?

4

Ende die een seide totten anderen. Laet ons setten onse luden enen leytsman: ende keren wi weder in egipten.

5

Doe dit moyses ende aaron hoorden: so vielen si langhes op die aerde voer alle die menichte der kinder van israhel.

6

Mer iosue nuns sone. ende caleph iephons sone. die oec dat lant besien hadden. si scoerden haer clederen

7

ende spraken totter menichte der kinderen van israhel. Dat lant dat wij omgaen hebben is harde guet.

8

Is ons die here guedertieren so sal hi ons leiden daer in: ende leueren ons die gront die vloeyt van melc ende van honich.

9

En wilt niet rebel wesen ieghen den here: noch en ontsiet niet dat volc van desen lande: want gheliken broot moghen wise verteren. Want alle troost is van hem gegaen:

[p. *193]

mer die here is mit v en wilt niet vresen.

10

Ende dor alle die menichte riep ende woudense mit stenen werpen ende verderuen: doe openbaerde des heren glorie bouen den dake der beloften: daert alle die kinder van israhel saghen

11

Ende die here seide tot moysen. Hoe langhe sal mi dit volc lachteren? Hoe lange en salt mi niet ghelouen in alden teykenen dien ic voer hem ghedaen heb?

12

Hier om sal icse slaen mit sterften. ende verterense: mer di sal ic prince maken bouen groten luden die starcker sijn dan dese.

13

Ende moyses seide totten here. Dat die van egipten moghen horen van weclker middewaert du dit volc hebste gheleit.

14

ende die ghene die wonen in desen lande die ghehoert hebben dattu here in desen volc biste. ende datmen di siet van aensichte te aensichte: ende datse dijn wolc bedect. ende dattu des daghes voer hem gaetste in een columme der wolken. ende des nachts in een columme vuers:

15

dattu dus groten menichte ghedoot hebste ghelijc enen mensche. ende dat sij dan segghen moghen.

16

Hij en had dat volc niet leiden moghen in dat lant daer hi of ghesworen had: hier om so heeft hijse gedoot inder wildernissen.

17

Hier om soe moet des heren starcheit verheuen worden also du gesworen hebs. ende gheseit

18

Die here is ghedoechsaem ende van vele ontfermicheden. wechdoende die quaetheit ende die misdaden. ende ghenen onnoselen latende: die der vadere sonde visiteers inden kinderen int derde ende int vierde gheslachte.

19

Ic bidde verlate dijns volcs sonde na die grootheit dijnre ontfermicheit: also du guedertieren waers doe si wt egipten ghinghen tot in deser steden.

20

Ende die here seide. Ic heb se verlaten na dijn woert.

21

Leue ic: soe sal des heren glorie veruolt worden in al dat lant.

22

Mer nochtant alle die menschen die mijn moghentheit ghesien hebben. ende die teykenen die ic dede in egipten ende inder wildernissen. ende mi becoert hebben te hant tienwaruen ende niet ghehoersaem en hebben geweest minen woerden:

23

si en sullen dat lant niet sien daer ic haer vader of gesworen hebbe: noch nyemant van dien die mi lachteren en sal dat lant sien.

24

Ic sal minen knecht caleb die van enen anderen geest is ende mi is gevolcht in leiden in dat lant dat hij ommegegaen heeft. ende sijn saet salt besitten:

25

om dat die van amalech ende die chananeen wonen inden nederen lande. So roert morghen die tenten: ende keert weder inder wildernissen al doer den wech van der roder zee.

26

Ende die here sprac tot moysen ende aaron ende seide

27

Hoe lang sal desen alte quaden menichte iegen mi murmureren? Ic heb ghehoert die claghen der kinder van israhel.

28

Daer om segt hem. Leue ic seit die here: also gi ghesproken hebt daer ict hoerde: alsoe sal ic v doen.

29

Inder wildernissen sullen uwe corren legghen. Alle die ghetelt sijn van twintich iaren ende daer bouen. die ghemurmureert hebben iegens mi.

30

en sullen niet int lant gaen daer ic mijn hant op gheheuen heb. dat icker v in soude doen wonen: behaluen caleb

[p. *194]

iephone soen. ende iosue nuns soen.

31

Mer uwe cleyne kinderen daer ghi of gheseit hebt dat si der vianden roef souden wesen. sal icker in leyden: dat sij dat lant sien sullen dat v niet en ghenoechde.

32

Mer uwe corren sullen legghen in deser wildernissen.

33

Ende uwe kinder sullen vluchtich wesen doer die wildernisse veertich iaer: ende si sullen dragen uwe vernoyheit. tot dat haerre vadere corren worden verteert inder wildernisse:

34

na ghetal van veertich dagen inden welken dat ghi dat lant merckede Een iaer sal voer enen dach gerekent worden. Ende veertich iaer suldi uwe quaetheit ontfaen: ende sult mijn wrake weten.

35

Want also ic ghsproken heb. soe sal ic deser quader menichten doen: die ieghen mi op verriset. In deser wildernisse sullen si ghebreken ende steruen

36

Hier om worden ghedoot ende geslagen in des heren aenscouwen:

37

alle die mannen die moyses ghesent had om dat lant te besien. ende die kinder van israhel deden murmureren doe sij weder ghecomen waren ende dat lant lachterden dattet quaet was.

38

Mer iosue nuns soen ende caleb iephone soen bleuen alleen te liue van alle den genen die gegaen waren om dat lant te besien

39

Ende moyses sprac alle dese woerden totten kinderen van israhel: ende dat volc weende seer.

40

Ende siet in die morghenstonde stonden sij op. ende ghinghen opten top vanden berghe: ende seiden. Wij sijn ghereet op te gaen ter stat daer die here of ghesproken heuet: want wi hebben ghesondicht.

41

Ende moyses seide hem. Waer om gaet gi ouer des heren gebot: dat v te profijt niet comen en sal?

42

en wilter niet op gaen: want die here en is mit v luden niet: dat ghi niet en valt voer uwe vianden.

43

Die van amalechs ende die chananeen sijn voer v mit welker zwaerde ghi vallen sult: om dat gi den here niet en hoert: ende die here en sal mit v niet sijn.

44

Mer sij die verdonckert waren. ghinghen opten top vanden berghe. Mer die arke van des heren testament ende moyses en ghingen vanden tenten niet.

45

Ende die van amalech ende die van chananeen die op ten berch woenden quamen neder: ende si sloghense ende hiewense: ende volchden hem na tot horma