Bible in duytsche (Delftse bijbel 1477)

§ Ca .xiij

1

VAn aseroth reisde dat volc voert: ende sloghen tenten inder wildernisse van pharan.

2

Ende daer sprac die here tot moysen ende seide.

3

Sende mannen die besien dat lant van chanaan Dat ic den kinderen van israhel gheuen sal: wt elken gheslachte enen vanden princen

4

Ende moyses dede also die here geboden had: ende hi sende vander wildernissen pharan mannen princen:

5

welker dit die namen sijn. Van rubens gesalchte semmua zechurs soon.

6

Van symeons gheslachte: saphat vrijs soen.

7

Van iudas gheslachte: caleph iephone soen.

8

Van ysachars geslachte: ygal iosephs soen.

9

Van effrayms geslachte: ozee nuns sone.

10

Van benyamins geslachte: phaltiraphus sone.

11

Van zabulons geslachte: geddihel sodijs sone.

12

Van iosephs gheslachte van manasses heerscappie: gaddi susijs soen.

13

Van dans gheslacht: amihel gemalli soen

14

Van azers geslachte: schur michaels soen.

15

Van neptalyms gheslachte: naabi bapsi soen.

16

Van gads geslachte: guhel machis sone.

17

Dit sijn der mannen namen. die moyses sende om dat lant te besien: ende hi heet ozee nuns soen iosue.

18

Dus sendese moyses om dat lant van chanaan te besien: ende seide tot hem. Gaet op alle die zwtzide. Ende als ghi sult comen ten geberchten:

19

so merket dat lant hoe danich dattet is: ende dat volc datter in woent. weder het starc of cranc si: luttel van getale of vele:

20

dat lant weder het guet si of quaet: ende hoedanich dat die poorten sijn ghemuert of sonder mueren:

21

die gront weder hi vet is of ondrachtich boemachtich of sonder bomen. Wordet vrome: ende brenct ons vanden vruchten van dien lande. Want het was tijt datmen die eerste druuen mochte eten.

22

Ende doen si daer op ghegaen waren so bespiden si dat lant. ende besaghent vander wildernissen van sin: tot roob den ghenen die in emath gaen.

23

Ende si ghinghen opwaert ten zuyden ende quamen in hebron. ende daer waren achyman ende sysai ende tolmai. enachs sonen. Want hebron was seuen iaer ghesticht voer thanim die poerte van egipten.

24

Ende sij tiden voert totter valeyen vander druuen

[p. *192]

ende si sneden enen wijngaert stoc of mit sinen druuen: ende twe mannen droghen die an enen grendel. Ende si drogen oec vanden appelen van garnate ende vanden vighen van dier stat.

25

die geheten wort nehelescol dats vluet der druuen. om dat die kinder van israhel een wijndruuenstoc van daen ghedraghen hadden

26

Ende die spyers keerden weder na veertich daghen doen si al dat lant besien hadden ende om ghegaen.

27

ende si quamen tot moysen ende aaron ende tot alle der vergadering der kinder van israhel inder wildernissen van pharan: die in cades is.

28

Ende si seiden hem ende toenden hem die vruchten vanden lande: ende seiden. wij quamen ten lande daer gi ons toe ghesent hebt: dat waerlijc vloeyt van melc ende van honich. also men bekennen mach an desen vruchten:

29

mer het heeft alte starcke oeffenaers. ende grote poorten ende ghemuerten. Wij saghen daer dat geslachte van enach.

30

Amalech woent in die zwtzide: ende die etheen iebuzeen ende amorreen wonen inden gheberchten. mer die chananeen wonen neuen die zee: ende neuen die riuiere vander iordanen.

31

Onder dese so bedwanc caleph des volcs murmuracie die begonde te worden ieghen moysen ende seide. Gaen wi op ende laet ons dat lant besitten: want wi sullent wel mogen behouden.

32

Mer die ander die mit hem geweest hadden seiden. Wi en sullen gheensijns tot desen volc mogen opcomen want het is starcker dan wij.

33

Ende si lachterden voerden kinderen van israhel dat lant dat si ghesien hadden. ende seiden. Dat lant dat wij doergaen hebben verteertdie gene dier in wonen. Ende dat volc die wij ghesien hebben is van groten maecsele.

34

Wi saghen die grote menschen van enachs kinderen vander gyganten geslachte: ende wi gherekent ieghen hem soe schenen wi spelthanen