Bible in duytsche (Delftse bijbel 1477)

§ Capittel .xij.

1

MAria ende aaron spraken tot moysen om sijns wijfs willen der moerinnen:

2

ende seiden. Heeft die here bi moysen alleen ghesproken? Ende heuet hij ons oec niet ghesproken? Doe dit die here ghehoert hadde. so wort hi gram

3

Want moyses was die sachtmoedichste man bouen allen menschen die woenden int lant

4

Ende te hant sprac die here tot hem ende tot aaron. ende mariam. Gi drie allene coemt wt den tabernakel der beloften Ende doe si wtgecomen waren

5

so quam die here neder inden colummen vanden wolke: ende hi stont inden inganc vanden tabernakel ende riep aaron ende mariam. Ende doen si wtghegaen waren

6

so seide hi tot hem. Hoert mijn redenen. So wie onder v sijn sal des heren propheet die sal ic openbaren in een visioen: of bi drome sal ic hem toesprken.

7

Mer mijn knecht moyses en is sodanich niet: die in al minen huse die alretrouweste is.

8

Want mitten monde spreke ic te sinen monde. Ende openbaerlic. want hi en siet niet bij ghelikenisse den here ende bi figuren. Waer om dan en ontsaechdi v dan niet achter te spreken minen knecht moyses?

9

Ende die here wort vergrammet iegen hem ende ginc wech.

10

Ende die wolke ghinc wech die

[p. *191]

bouen die tabernakel was. Ende siet maria scheen lasarus blinckende als die snee. Ende doense aaron besien hadde ende hi sach datse doergoten was mit lasarien:

11

so seide hi tot moysen. Ic bid de here mijn. Dattu ons dese sonde niet an en legghes die wi sottelic ghedaen hebben:

12

dat dese niet en worde als ene dode: ende als onvruchtelijc saet dat gheworpen wort vter moeder vroulicheit. Siet te hant is half haer vleysche verteert in lazarien.

13

Ende moyses riep anden here ende seide. Here god ic bidde: dattu dese ghesont makes.

14

Ende die here antwoerde hem. Of haer haer vader int aensicht bespoghen had: en soude si niet te minsten seuen daghen haer scamen mit rootheden? Men versceidese seuen daghen buten den tenten: ende daer na salmense weder ropen.

15

Dus wort maria seuen daghen buten den tenten ghesloten: ende dat volc en porrede hem van dier stat niet. voer dat maria weder geropen wort